ករណីជាប់បាក់ឌុបស្វ័យប្រវត្តិរបស់ ស៊ន សៀវម៉ី នាំឲ្យមានការពន្យល់ពីមន្រ្តីអប់រំ

2014-10-06 17:43:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងអប់រំ យុវជន និងកីឡា បានពន្យល់ ចំពោះករណី ពិសេស ដែលអនុញ្ញាតឲ្យម្ចាស់មេដាយមាស Asian Games 2014 កម្ពុជា កញ្ញា ស៊ន សៀវម៉ី ជាប់សញ្ញាបត្រមធ្យមសិក្សាទុតិយភូមិ(បាក់ឌុប) ដោយស្វ័យប្រវត្តិ។ ករណីពិសេសនេះត្រូវបានធ្វើឡើង ខណៈការប្រលងបាក់ឌុបត្រូវបានកែទម្រង់ និងមានការរឹតបន្តឹងខ្លាំង។

លោក រស់ សាលីន មន្រ្តីអ្នកនាំពាក្យក្រសួងអប់រំយុវជន និងកីឡា បានប្រាប់ Sabay ថា នេះគឺជាករណី ពិសេសដំបូងបង្អស់ និងពុំធ្លាប់មាននៅកម្ពុជា ចំពោះការការអនុញ្ញាតឲ្យម្ចាស់មេដាយមាសAsian Games ជាប់បាក់ឌុប ដោយស្វ័យប្រវត្តិ។ លោកថា កញ្ញា សៀវម៉ី បាននាំមកនូវកិត្តិយសដ៏ធំធេងជូនជាតិមាតុភូមិ។ ដូច្នេះហើយ ទើបមានការស្នើរឲ្យកញ្ញាជាប់បាក់ឌុប ដោយស្វ័យប្រវត្តិបែបនេះពីរាជរដ្ឋាភិបាល។ "តាំងពីមុនមក យើងពុំដែលមានករណីពិសេសបែបនេះ ប៉ុន្តែដោយសារគាត់គឺជាម្ចាស់មេដាយមាសAsian Games ។ ម្យ៉ាងនៅប្រទេសគេក៏មានការលើកទឹកចិត្តបែបនេះដែរ។ ជាក់ស្តែងនៅប្រទេសបារាំង កីឡាករដែលដណ្តើមបានជ័យលាភីប្រចាំសាលា គឺសាលាបានថែម ពិន្ទុឲ្យ ចុះទម្រាំមេដាយមាស?”។

ជាប្រវត្តិសាស្រ្តថ្មីជូនជាតិមាតុភូមិ បន្ទាប់ពីបានខកខានជាង៤០ ឆ្នាំ កញ្ញា ស៊ន សៀវម៉ី បានដណ្តើមបានមេដាយមាសក្នុង មហាព្រឹត្តិការណ៍កីឡាអាស៊ី Asian Games 2014 ក្នុងទីក្រុងអ៊ីនឆន ប្រទេសកូរ៉េខាងត្បូង ។ កញ្ញា និងក្រុមអត្តពលិកដល់ប្រលានយន្តហោះអន្តរជាតិភ្នំពេញកាលពីយប់មិញនេះ ជាមួយនឹងការស្វាគមន៍យ៉ាងកក់ក្តៅពី អ្នកគាំទ្រ និងរាជរដ្ឋាភិបាលកម្ពុជាតាំងពីប្រលានយន្តហោះ ដល់វិមានសន្តិភាព។

ជុំវិញករណីនេះ លោក រ៉ុង ឈុន ប្រធានសមាគមគ្រូបង្រៀនកម្ពុជាបានអបអរសារទរចំពោះ កញ្ញា សៀវម៉ី ដែលបាននាំមកនូវកិត្តិយសជូនជាតិ ។ ប៉ុន្តែការអនុញ្ញាតឲ្យជាប់សញ្ញាបត្របាក់ឌុប ដោយស្វ័យប្រវត្តិគឺជាប្រការមួយ ខុសលក្ខណៈបច្ចេកទេស។ ក្រសួងអប់រំអាចមាននិតិវិធីច្រើនជួយ កញ្ញា ឲ្យជាប់សញ្ញាបត្របាក់ឌុបបាន ប៉ុន្តែមិនគួរប្រកាសជាសាធារណៈនោះទេ។ "នេះគឺជាការទទួលបានជ័យលាភីថ្នាក់តំបន់ និងនាំមកនូវកិត្តិយសដ៏ឧត្តុង្គឧត្តមជាទីបំផុត។ ប៉ុន្តែការធ្វើបែបនេះហាក់បីដូចជាទាញទម្លាក់កិត្តិយសរបស់ កញ្ញាទៅវិញទេ។ យើងចង់ឲ្យមានការប្រកួតប្រជែងដោយសំណេរ និងមានវិធីជួយគាត់ច្រើន ជាជាងការប្រកាសជាសាធារណៈ”។

ការប្រលងបាក់ឌុបលើកទី១ មានបេក្ខជនជាង ២៥% ប៉ុណ្ណោះបានប្រលងជាប់។ ការប្រលងលើកទី២ នឹងប្រព្រឹត្តិទៅនៅថ្ងៃទី១៣ ខែតុលា ឆ្នាំ២០១៤ ៕

អានអត្ថបទ៖ ស៊ន សៀវម៉ី ទទួលបានឧបត្ថម្ភពីសម្តេច ហ៊ុន សែន ពិសេសជាងអ្នកជាប់និទ្ទេស A ទៀត ចុចត្រង់នេះ

អត្ថបទ៖មៃ សុខលីម