ប្រើរទេះឈើរុញម្ដាយជរាចូលលេងសួនកម្សាន្ត រំជួលចិត្តអ្នកទេសចរ

2014-10-06 22:07:49
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសម្នាក់នៅខេត្តសាងតុង ប្រទេសចិន បានទាក់ទាញចំណាប់អ្នកទេសចរឲ្យរំភើបចិត្តយ៉ាងខ្លាំង ក្រោយតស៊ូប្រើរទេះឈើរុញម្ដាយជរាដែលមានអាយុ៨៦ឆ្នាំ ទៅលេងសួនកម្សាន្តមួយកន្លែង។

កូនប្រុសចិត្តកតញ្ញូឈ្មោះ Zhang Jinbao បាននិយាយថា ម្ដាយរបស់លោកមានបញ្ហាជើងមិនអាចដើររួចឡើយ ដូច្នេះហើយទើបលោកសម្រេចចិត្តប្រើរទេះឈើជូនម្ដាយលំហែជុំវិញសួនកម្សាន្តនៅថ្ងៃបុណ្យមួយដែលមានមនុស្សដ៏ច្រើនកុះករ។

អ្នកប្រើប្រាស់អ៊ីនធឺណិតជាច្រើន បាននាំគ្នាជជែកពីរូបភាពដ៏គួរឲ្យរំភើបចិត្តនេះ។ ក្នុងចំណោមនោះ មានម្នាក់បានបញ្ចេញពីអារម្មណ៍ពិតថា "ខ្ញុំមិនអាចទប់ទឹកភ្នែកបានទេ ហើយមនុស្សជាច្រើនទៀតនៅកន្លែងផ្សេងក៏នឹងមានអារម្មណ៍ដូចខ្ញុំដែរ"។ ឯអ្នកលេងអ៊ីនធឺណិតម្នាក់ទៀតបានឲ្យសញ្ញាមេដៃ និងបានសរសេរថា "ពិតជាកូនកតញ្ញូមែន! បុរសអស្ចារ្យរបស់ប្រទេសចិន"។

អ្នកផ្សេងៗទៀតបាននិយាយថា មនុស្សជាច្រើនដែលរស់នៅតំបន់ដាច់ស្រយាលក្នុងប្រទេសចិន មានជីវភាពយ៉ាប់យ៉ឺនបំផុត។ ពួកគេធ្វើការក្នុងស្រែចម្ការដោយប្ដូរយកប្រាក់កម្រៃតិចតួច តាំងពីដើមឆ្នាំដល់ចុងឆ្នាំ។ អ្នកនៅតំបន់នោះ គ្មានលុយធ្វើដំណើរកម្សាន្តទៅកន្លែងផ្សេងៗឡើយ។ មនុស្សចាស់ៗជាច្រើន មិនបានទាំងស្គាល់រថភ្លើង ឬយន្តហោះផង។ ដូច្នេះ ការចំណាយពេលជូនម្ដាយឪពុកដើរលេងកម្សាន្ត និងឃើញពិភពផ្សេងក្រៅពីស្រែចម្ការ គឺជារឿងល្អបំផុត៕