ត្រៀមសមាហរណកម្មអាស៊ាន ធាតុផ្សំសំខាន់ៗត្រូវមាន បើចង់ក្លាយខ្លួនជាសហគ្រិន

2015-03-16 17:09:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រាក់ សុខដូង មកពីសាកលវិទ្យាល័យបញ្ញាសាស្ត្រកម្ពុជា ជាយុវជនម្នាក់ចំណោមមនុស្សអាយុស្របាលៗគ្នារាប់រយនាក់ទៀត ដែលកំពុងអង្គុយស្ងៀមស្ងាត់ ស្ដាប់វាគ្មិនក្នុងវេទិកា «យុវជនកម្ពុជាក្នុងវិស័យធុរកិច្ច» នៅសាលវិទ្យាស្ថានបច្ចេកវិទ្យាកម្ពុជា រៀបចំដោយ AIESEC ម្សិលមិញនេះ។

សុខដូង វ័យ២១ឆ្នាំ និងមានក្ដីសុបិនបើកអាជីវកម្មមួយដោយផ្ទាល់ខ្លួននៅថ្ងៃណាមួយ និយាយថាយុវជនជាច្រើនបច្ចុប្បន្ននេះតែងប្រាថ្នារកស៊ីខ្លួនឯង។ ប៉ុន្តែ ដួង បែរជាចោទសួថាតើ យុវជន ត្រូវរៀបចំខ្លួនបែបណាដើម្បីក្លាយខ្លួនជា សហគ្រិន? តើសហគ្រិន ត្រូវប្រឈមមុខនឹងអ្វីខ្លះ?

លោក ជី សិលា នាយកប្រតិបត្តិក្រុម SABAY DIGITAL CORP. និងជាស្ថាបនិកសភាយុវពាណិជ្ជករអន្តរជាតិកម្ពុជា ថាភាពជាសហគ្រិនគឺត្រូវទទួលខុសត្រូវខ្ពស់។ ធុរកិច្ចជនដែលបានចាប់ផ្ដើមអាជីវកម្មដោយលុយ៥០០ដុល្លារកាលពីប្រមាណ១៥ឆ្នាំមុនរូបនេះ ថាមនុស្សលើពិភពលោកគឺមានតែ១%ប៉ុណ្ណោះ អាចក្លាយខ្លួនជាសហគ្រិន ហើយ៩៩%ទៀត បានត្រឹមជាអ្នកធ្វើការឲ្យសហគ្រិន។

លោក ជី សិលា ដែលបានបោះបង់ការសិក្សាមហាវិទ្យាល័យត្រឹមឆ្នាំទី១កាលពីទសវត្សរ៍ឆ្នាំ៩០ ទៅធ្វើការឲ្យគេ ថាចំណុចសំខាន់ គឺមនុស្សជាទូទៅចូលចិត្តធ្វើអ្វីតាមគ្នា។ ប៉ុន្តែដើម្បីក្លាយខ្លួនជាសហគ្រិន ជំហានដំបូងគេត្រូវ គិតនិងស្វែងរកអ្វីដែលខុសគេ មិនឲ្យដូចអ្នកផ្សេង និងអត់ធ្មត់ជម្នះអ្វីថ្មីៗជានិច្ច។

លោក ជី សិលា បានលើកយកចំណុចខ្លឹម៥យ៉ាងដែលយុវជនគួរដឹងដើម្បីក្លាយខ្លួនជាសហគ្រិនម្នាក់។

-មានសុទិដ្ឋិនិយមក្នុងការគិត

គឺត្រូវជឿជាក់ថាគ្មានអ្វីដែលមិនអាចទៅរួចនោះទេ និងមិនត្រូវបោះបង់វាចោលដោយងាយឡើយ។

-ធ្វើការកុំស្ដាយកម្លាំង

លោកថាការលត់ដំនឹងការងារឲ្យខ្លាំងច្រើនប្រភេទជា ការរៀននិងសន្សំបទពិសោធន៍។ «ឆ្នាំ១៩៩៤ ខ្ញុំធ្វើការឲ្យគេ១ថ្ងៃ១៥ម៉ោង ៧ថ្ងៃក្នុងមួយអាទិត្យ។ ១០ឆ្នាំដែលខ្ញុំធ្វើការ គឺបទពិសោធន៍ស្មើនឹង៦០ឆ្នាំដែលគេធ្វើការ ហើយ វាជាអ្វីដែលនាំឲ្យខ្ញុំគឺខ្ញុំថ្ងៃនេះ។»

-ដាក់វិន័យខ្លួនឯង

កំពុងចង្អុលទៅស្លាយបង្ហាញរូបភាពលោកជិះកង់មួយថ្ងៃជាង២០០គីឡូម៉ែត្រពីភ្នំពេញទៅ ក្រុងព្រះសីហនុ លោក សិលា ថាជាសហគ្រិនម្នាក់គឺត្រូវដាក់វិន័យខ្លួនឯងឲ្យធ្វើការងារធ្ងន់ធ្ងរគ្រប់បែបទាំងអស់ ពិសេសការងារដែលខ្លួនឯង និងអ្នកដ៏ទៃគិតថាលំបាកមិនចង់ធ្វើ។ សហគ្រិនត្រូវអត់ធ្មត់ ដើម្បីឆ្ពោះទៅគោលដៅថ្មីៗ។

-ធ្វើអ្វីៗដែលចង់ធ្វើកុំខ្វល់នឹងការតិះទៀន

«កុំខ្លាចអ្នកចាំសើចថាយើងក្មេង គ្មានលុយ គ្មានបទពិសោធន៍។ មនុស្សខ្លះគឺអីចឹង គេមិនដែលធ្វើទេ តែបើអ្នកផ្សេងអ្វីមួយគេចាំ តែបន្ទោសថាអីចឹង ថាអីចុះ ប៉ុន្តែគេមិនដែលធ្វើអ្វីឡើយ»

-ក្លាហាន

មនុស្សជាទូទៅ ខ្លាចក្នុងការប្រឈមនឹងហានិភ័យ ប៉ុន្តែចំណុចខ្លាំងរបស់ សហគ្រិន គឺត្រូវក្លាយហានជានិច្ច។

អ្វីដែលចាំបាច់ក្រៅពីធាតុផ្សំដែលរៀបរាប់លោក ជី សិលា ថា អ្នកដឹកនាំគឺងាយណាស់ក្នុងការប្រាប់គេថាជាអ្នកដឹកនាំ តែការធ្វើគឺមិនស្រួលដូចការនិយាយឡើយ។ សហគ្រិន គឺត្រូវតែជាបុគ្គលមានសមត្ថភាពដឹកនាំ និងមានអំណាចខាងបញ្ចុះបញ្ចូល។

រីឯលោក ទេព លីវីណា ដែលមានដើមទុន១៨០០ដុល្លារ ដើម្បីបើកមជ្ឈមណ្ឌលបណ្ដុះបណ្ដាលភាសាអង់គ្លេស EDNICHE ឡើងកាលឆ្នាំ២០១០នោះ ថាក្រៅពីមានបំណិនផ្សេងៗសហគ្រិន ត្រូវលះបង់ខ្ពស់ណាស់ ពិសេសពេលវេលា។ «គឺពេលខ្លះគេងមិនបានគ្រប់ទេ។ គឺគ្មានថ្ងៃសម្រាក គ្មានថ្ងៃអាទិត្យដើរលេង គ្មានការលម្ហែ ខ្លះគឺខ្ញុំគ្មានពេលសម្រាប់គ្រួសារខ្ញុំ គឺអ្នកត្រូវបាត់បង់វា ប៉ុន្តែអ្នកបានវិញនូវសេរីភាព គ្មាននរណាគ្រប់គ្រង់អ្នក គឺអ្នកខ្លួនឯង។ ត្រូវធ្វើខ្លួនឲ្យសំខាន់។ ខ្ញុំលើកយកមិត្តភ័ក្ដិខ្ញុំម្នាក់ ក្រណាស់កាលវិទ្យាល័យ មិនមានសូម្បី ម៉ូតូកង់ជិះ គឺទៅរៀនដោយដើរ ប៉ុន្តែចង់នរណាសួអីក៏វាដឹង វាស្គាល់អ្នកឲ្យចម្លើយបាន។ ឥឡូវគាត់ជិះ Audi គឺ Audi Q7 និងមានជំនួញបីបួនមុខ»។