រឿង "៧ថ្ងៃ" ឈរលើគេនៅរោងភាពយន្តទំនើបៗនៅរាជធានី

2015-03-21 17:42:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ព័ត៌មានពីក្រុមផលិតបានឲ្យដឹងថា ភាពយន្ត "៧ថ្ងៃ" របស់ផលិតកម្ម Rich Kids Media បានក្លាយជាភាពយន្តមានសន្ទស្សន៍អ្នកចូលទស្សនាច្រើនជាងគេនៅតាមរោងភាពយន្តទំនើបៗទាំងអស់នៅរាជធានីមាន Major Cineplex By Cellcard, Platinum Cineplex និង Legend Cinema គ្រប់សាខា។

ចាន់ណា រ៉ូណាន អ្នកដឹកនាំរឿង បានថ្លែងថា “តាមព័ត៌មានដែលខាងរោងភាពយន្តទាំងអស់បញ្ជូនមកឲ្យយើង គឺរឿងរបស់យើងមានអ្នកចូលទស្សនាច្រើនជាងគេទាំងអស់ ក្នុងរយៈយើងដាក់បញ្ចាំងកន្លះខែមកនេះ!”។ យ៉ាងណាក៏ដោយតួលេខពិតប្រាកដនៃអ្នកចូលទស្សនា ក៏ដូចជាចំនួនសំបុត្រលក់ចេញ មិនត្រូវបានបញ្ចេញឲ្យដឹងទេ ដោយភាគីរោងភាពយន្តសុំទុកជាការសម្ងាត់។

ភាពយន្ត “៧ថ្ងៃ" ត្រូវបានបើកសម្ពោធដាក់បញ្ចាំងកាលពីថ្ងៃទី ៦ មីនាកន្លងមក។ រោងភាពយន្តទំនើបទាំងអស់នៅរាជធានីបានទទួលយករឿងនេះទៅដាក់បញ្ចាំង។ តាម រ៉ូណាន បានឲ្យដឹងថា ក្នុងរយៈពេលកន្លះខែមកនេះ ចំនួនអ្នកទស្សនាមិនមានការស្រកស្រុតទេ។ "តាំងពីថ្ងៃដាក់បញ្ចាំងមក មានអ្នកចូលទស្សនាច្រើនរហូត ហើយមកទល់ឥឡូវក៏នៅតែច្រើន និយាយទៅល្អមែនទែន"។

អ្នកនិពន្ធ និងដឹកនាំរឿងវ័យក្មេងរូបនេះ ប្រាប់ទៀតថា នៅរោងភាពយន្ត Major Cineplex By Cellcard តាំងពីដំបូងដាក់បញ្ចាំង ៧ដងក្នុង១ថ្ងៃ មកដល់ឥឡូវនៅតែ៧ដងក្នុង១ថ្ងៃដដែល។ ដោយឡែកនៅ Platinum Cineplex ដាក់បញ្ចាំងដំបូង ៧ដងក្នុង១ថ្ងៃដូចគ្នា ឥឡូវនៅ ៦ដងក្នុង១ថ្ងៃ។ ហើយ Legend គ្រប់សាខា ចុះពី ៦ដង មកត្រឹម ៤ដងក្នុង១ថ្ងៃ។

យ៉ាងណាដោយ តាម រ៉ូណាន អ្នកទស្សនាតាមម៉ោងនីមួយៗ នៅតែច្រើននៅឡើយ។ ក្រោយពីជោគជ័យ អ្នកនិពន្ធ និងដឹកនាំរឿងមានប្រវត្តិហុតទឹកគុយទាវសល់ពីគេរូបនេះ គ្រោងយកទៅដាក់បញ្ចាំងជូនប្រិយមិត្តនៅតាមបណ្តាខេត្តបន្តទៀត។ "ឥឡូវយើងកំពុងតែចុះទៅមើល...ហើយតាមដែលយើងគ្រោងមាន សៀមរាប ដាក់បញ្ចាំងក្រោយចូលឆ្នាំ បន្តមកទៀតមាន បាត់ដំបង កំពង់ចាម ស្វាយរៀង និងខេត្តព្រះសីហនុ"។

ភាពយន្តខ្នាតធំរឿង “៧ថ្ងៃ” និយាយពីការដឹងខ្លួនរបស់ខ្មោចដែលស្លាប់ទៅហើយគម្រប់៧ថ្ងៃតាមការ តំណាលតៗគ្នារបស់ចាស់ៗ។ អ្នកនិពន្ធ ចង់បង្ហាញពីកម្មពៀរពិតជាមានមែនលើលោកសន្និវាសយើងនេះ។ ភាពយន្តទី១របស់ Rich Kids Media នេះចូលរួមសម្ដែងដោយ នី មុន្នីនាថ សុទ្ធ ពេញបរមី ទេព រិនដារ៉ូ សុធា ពិសិដ្ឋ ប៊ូសាយ ខ្ញុង នាយ យ៉ាន និងតាចេក ជាដើម៕

អត្ថបទ៖ រឿង”៧ថ្ងៃ” ចំណាយទុនជិត ១០ម៉ឺនដុល្លារ ដាក់បញ្ចាំងផ្លូវការ

អត្ថបទ៖ ទារិកា