Javier Hernandez ​ដែល​គេ​និយម​ហៅ​ថា Chicharito ​ត្រូវ​បាន​សារព័ត៌មាន​អេស្ប៉ាញ​ចុះ​ផ្សាយ​ថា​កំពុង​តែ​មាន​ទំនាក់ទំនង​ស្នេហា​ជាមួយ​អ្នក​កាសែត​ស្រី Lucia Villalon ​ដែល​ជា​​នារី​​ធ្លាប់​មាន​ពាក្យ​ចចាមអារ៉ាម​ស្នេហា​ជាមួយ​ Cristiano Ronaldo។

​ខ្សែ​ប្រយុទ្ធ​ដែល​ក្រុម Real Madrid ​ខ្ចី​ជើង​ពី Manchester United ​រូប​នេះ ត្រូវ​បាន​កាសែត​កាសែត Tabloid ​​ចុះ​ផ្សាយ​នៅ​ទំព័រ​មុខ​ថា​ ​កំពុង​តែ​សាង​ស្នេហ៍​ជាមួយ​នាង Villalon ​ដែល​ជា​​អតីត​អ្នក​ធ្វើ​ការ​ឱ្យ​ទូរទស្សន៍ Real Madrid ។

Villalon ​កាល​ពី​មុន​ក៏​ត្រូវ​បាន​គេ​គិត​ថា​​បាន​ទាក់ទង​ជាមួយ Ronaldo ​ដែរ ប៉ុន្តែ​នារី​រូប​នេះ​បាន​ចេញ​មក​បដិសេធ​ និង​​បាន​និយាយ​ទៀត​ថា៖ “ខ្ញុំ​មាន​ទំនាក់ទំនង​ល្អ​ជាមួយ Ronaldo ​មែន ហើយ​ខ្ញុំ​ក៏​តែងតែ​មាន​ទំនាក់ទំនង​ល្អ​នេះ​ជាមួយ​អ្នក​គ្រប់គ្នា​ដែល​ខ្ញុំ​ធ្វើ​ការ​ជាមួយ​ដែរ។ ខ្ញុំ​ធ្វើ​ការ​ជាមួយ​គាត់ ប៉ុន្តែ​មិន​មាន​ទំនាក់ទំនង​អ្វី​លើស​ពី​មិត្ត​រួម​ការងារ​នោះ​ទេ។ ​បច្ចុប្បន្ន​នេះ ខ្ញុំ​មាន​ស្នេហា​ជាមួយ​មនុស្ស​ម្នាក់​ហើយ​ ហើយ​ខ្ញុំ​ក៏​កំពុង​តែ​មាន​ក្ដី​សុខ​ជាមួយ​គេ​ផង​ដែរ ”។

ដោយ​សំអាង​លើ​ពាក្យ​ប៉ុន្មាន​មាត់​នេះ​ ព្រម​ជាមួយ​រូប​​ថត​ Villalon ​និង​ Chicharito ​ថើប​គ្នា​នៅ​ប្រលាន​យន្តហោះ​ទៀត​​ទើប​ផង​នោះ ​ធ្វើ​ឱ្យ​កាសែត Tabloid ហ៊ាន​សរសេរ​ដាក់​ទំព័រ​ខាង​មុខ​ធំ​ៗ​ថា អ្នក​ទាំង​ពីរ​នេះ​កំពុង​តែ​មាន​ទំនាក់ទំនង​ស្នេហា​ហើយ។

សូម​បញ្ជាក់​បន្ថែម​បន្តិច​ថា ​ដើម្បី​បញ្ជាក់​ពី​ភាព​ស្អាត​ស្អំ​ជាមួយ Ronaldo ​នាង Villalon ​បាន​ផ្លាស់​ការងារ​​ពី​អ្នក​និយាយ​ព័ត៌មាន​កីឡា​បាល់ទាត់​​នៃ​​ទូរទស្សន៍ Real Madrid ​មក​ធ្វើ​ការ​នៅ​ Antena 3 ​វិញ​​​ ដែល​ជា​ប៉ុស្តិ៍​និយាយ​ពី​ប្រណាំង​ឡាន Formula1៕

​ប្រែ​សម្រួល៖ មុន្នី រម្យ ប្រភព៖ livesoccertv