ព្រីម លីហ្សា ​ជួល​ជំនួយ​ការ ​១ខែ​ ៣ ពាន់​ ដុល្លារ​

  • 2014-10-08 16:28:53
  • ចំនួនមតិ 1 | ចំនួនចែករំលែក 13

ចន្លោះមិនឃើញ

តារា​សម្ដែង ​Sexy កញ្ញា ​ព្រីម​ លីហ្សា ដែល​គេ​ស្គាល់​ថា ជា​តារា​ដែល​ហ៊ាន​ចំណាយ​ប្រាក់​ក្បែរ​ម៉ឺន​ ដុល្លារ​​ទិញ​សំលៀក​បំពាក់​នោះ ធ្លាប់​បាន​បង្ហើប​ប្រាប់​ Sabay ថា នាង​បាន​ជួល​ជំនួយ​ការ​រក​ទីផ្សារ​នៅ​ក្រៅ​ប្រទេស ​ក្នុង​តម្លៃ​ ៣ ​ពាន់​ដុល្លារ​ក្នុង ​១ ខែ។

 

 

 

“យ៉ាង​ហោច​ណាស់​ខ្ញុំ​ចេញ​ទៅ​​ក្រៅ​ប្រទេស​ពីរ​ទៅ​បី​ដង​ ពេល​ខ្លះ​ ១​ សប្ដាហ៍ ពេល​ខ្លះ ​១ ខែ ​ទៅ​តាម​ការ​អញ្ជើញ ​របស់​ក្រុម​ហ៊ុន​នៅ​ក្រៅ​ស្រុក​នោះ។ ទីផ្សារ​ខ្ញុំ​រក​បាន​នេះ​ គឺ​បាន​មក​ពី​ខ្ញុំ​មាន​ជំនួយ​ការ​នៅ​ប្រទេស​សិង្ហបុរី គាត់​ជា​អ្នក​រក​ទីផ្សារ​សិល្បៈ​ឲ្យ​ខ្ញុំ​”។ ទាំង​នេះ​ជា​ការ​លើក​ឡើង​របស់ ​ព្រីម​ លីហ្សា។

 

លីហ្សា ដែល​គេ​ស្គាល់​ថា តារា​សម្ដែង​ដែល​មិន​សូវ​មាន​ទីផ្សារ​ក្នុង​ស្រុក​ ប៉ុន្តែ​សម្រុក​ទីផ្សារ​ក្រៅ​ប្រទេស​រូប​នេះ​បាន​ទទួល​ស្គាល់​ថា នាង​មិន​សូវ​មាន​ទីផ្សារ​ក្នុង​ស្រុក​នោះ​ទេ។ ការណ៍​ដែល​មិន​សូវ​មាន​ទីផ្សារ​នោះ​ទំនង​ដោយ​សារ​តែ​ផលិត​កម្ម​ក្នុង​ស្រុក​ មិន​ហ៊ាន​ហៅ​នាង​ព្រោះ​ខ្លាច​មាន​តម្លៃ​ខ្លួន​ថ្លៃ។

 

ប៉ុន្តែ ​ព្រីម​ លីហ្សា បាន​បញ្ជាក់​ថា អ្វី​ៗ​សុទ្ធ​តែ​អាច​ចរចា​គ្នា​បាន​ ថ្វី​បើ​នាង​មាន​ទីផ្សារ​ក្រៅ​ប្រទេស​ច្រើន​ហើយ​មាន​តម្លៃ​ខ្លួន​ថ្លៃ​ក៏ដោយ ​។ លីហ្សា​ក៏​បាន​បង្ហើប​ប្រាប់​ដែរ​ថា នាង​ចេញ​ទៅ​ក្រៅ​ប្រទេស​ម្ដងៗ​ អាច​កើប​ប្រាក់​បាន​ខ្ទង់​ពាន់​ដុល្លារ​ ឬ​ក្បែរ​ម៉ឺន​ដុល្លារ​ឯណោះ​។ ប្រទេស​ដែល​នាង​ធ្លាប់​បាន​ចេញ​ទៅ​​ចូលរួម​កម្មវិធី​​សម្ពោធ​ក្រុមហ៊ុន​ធំៗ និង​ សម្ដែង​ រួមមាន​ប្រទេស វៀតណាម ថៃ និង​ សិង្ហបុរី។

 

កញ្ញា ព្រីម​ លីហ្សា បាន​ហក់​ចូល​សិល្បៈ​កាល​ពី​ឆ្នាំ​ ២០០៦​ បន្ទាប់​ពី​នាង​បាន​ឈប់​រៀន​នៅ​សាលា​វិចិត្រ​សិល្បៈ​ នៅ​ត្រឹម​ថ្នាក់​ទី ​១០​។ ផលិត​កម្ម​ដំបូង​គេ​ ដែល​នាង​បាន​ថត គឺ​ផលិត​កម្ម​ឆ្លងដែន, ប៊្លូដាយមីន, និង​ ផលិត​កម្ម​ បុប្ផា។ ជាបន្តបន្ទាប់ ​នាង​បាន​ថត​សម្ដែង​ខារ៉ា​អូខេ និង​ដើរ​តួសម្ដែង​ ឲ្យ​ផលិត​កម្ម​ FCI,​ SSB, ​ហង្សមាស, និង​ Sunday ជាដើម​។

គួរកត់សម្គាល់​ដែរ​ថា កញ្ញា ព្រីម លីហ្សា បាន​ទទួល​ពាន​រង្វាន់​​តារា​សម្ដែង​ស្រី​មាន​ប្រជាប្រិយភាព​ប្រចាំ​ឆ្នាំ ពី​កម្មវិធី​អាណាចក្រ​តារា ២០១៣។ ពាន​រង្វាន់​នេះ ​គឺទទួល​បាន​តាម​រយៈ​ការ​បោះឆ្នោត SMS ​​ពី​មហាជន៕

http://youtu.be/xUNg_adtu1o

 

សូមអាន​អត្ថបទ​កម្សាន្ដ​ជាច្រើន​​ទៀត​សូម​ចុចត្រង់​នេះ

 

អត្ថបទ៖ ប៊ិន ប៊ុណ្ណា