មាន សូនីតា នឹងឡើងប្រកាសជយលាភី នៅមហោស្រពភាពយន្តនៅម៉ាឡេស៊ី

2015-04-01 13:01:19
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីតារាប្រុសខ្មែរពីរដួង គឺ Cheky និង វណ្ឌី ពិសិដ្ឋ ទើបឡើងកម្រាលព្រំក្រហមនៅជប៉ុន ឥឡូវ មាន សូនីតា តារាល្បីឈ្មោះមួយរូបទៀតរបស់កម្ពុជា ត្រៀមនឹងឡើងឆាកអន្តរជាតិឆ្លងកាត់កម្រាលក្រហម ក្នុងមហោស្រពធំធ្វើឡើងនៅម៉ាឡេស៊ីសប្តាហ៍ក្រោយនេះ។

កម្មវិធីដែល សូនីតា ត្រូវបង្ហាញខ្លួនលើកម្រាលព្រំក្រហមហើយឡើងជាអ្នកប្រកាសពានរង្វាន់លើឆាកទៀតនោះ គឺកម្មវិធី Asean International Film Festival & Award ដែលមានតារាមកពីប្រទេសក្នុងតំបន់អាស៊ានជាច្រើនចូលរួម។ សូនីតា ប្រាប់ថា នាងទើបទទួលបានព័ត៌មាននេះថ្មីៗដែរ យ៉ាងណានាងមិនច្បាស់ទេ ថាហេតុអ្វីនាងត្រូវបានជ្រើសរើស។

ទោះយ៉ាងនេះក្ដី តារាស្រីវ័យ ២៥ឆ្នាំរូបនេះ ប្រាប់ថានាងមោទនភាពណាស់។ "សម្រាប់ខ្ញុំគិតថា វាមិនមែនជារឿងធម្មតាពេកទេរឿងដើរលើកម្រាលព្រំក្រហមឆាកអន្តរជាតិ ពិសេស គឺការឡើងលើឆាកជាអ្នកប្រកាសពានទៀត ខ្ញុំសប្បាយចិត្តណាស់ ព្រោះនេះជាលើកទី១ដែលខ្ញុំបានចូលកម្មវិធីធំបែបនេះនៅអន្តរជាតិ ដែលមានតារាមកពីប្រទេសជាច្រើនទៀតចូលរួមដូច្នេះ"។

នេះជាលើកទី២ សម្រាប់ដំណើរលើព្រំក្រហមរបស់ សូនីតា។ ប៉ុន្តែជាលើកទី១សម្រាប់ការបង្ហាញវត្តមានលើកម្រាលព្រំនេះនៅបរទេស។ តាមតួឯកស្រីក្នុងរឿង "នាយឡប់ជំពប់ស្នេហ៍" រូបនេះ បទពិសោធន៍លើកទី១បំផុតក្នុងឆាកជីវិតជាតារារបស់នាងលើកម្រាលព្រំក្រហម គឺកើតឡើងនៅក្នុងស្រុក ក្នុងកម្មវិធីអាណាចក្រតារា។

វិលមកវត្តមានលើឆាកអន្តរជាតិនៅប្រទេសម៉ាឡេស៊ីនេះ មាន សូនីតា ប្រាប់ថា នាងនឹងធ្វើជា Presenter ដោយចាប់ដៃគូជាមួយបុរសជនជាតិម៉ាឡេស៊ី ប៉ុន្តែនាងមិនច្បាស់ទេថា កម្មវិធីនេះមានតែនាង ឬក៏មាន Presenter គូផ្សេងទៀតដែរ។ "ដោយសារខ្ញុំអត់ទាន់ទទួលព័ត៌មានលម្អិត អីចឹងខ្ញុំអត់ទាន់ច្បាស់ទេ ថាមានអ្នកផ្សេងទៀតឬអត់ តែបើខ្ញុំ គឺគេឲ្យធ្វើជាអ្នកប្រកាសឈ្មោះភាពយន្តណាជាអ្នកឈ្នះអីចឹងណាបង!”។

កម្មវិធី Asean International Film Festival & Award នឹងប្រព្រឹត្តទៅនៅពាក់កណ្ដាលខែនេះក្រៅពី សូនីតា គេរំពឹងថានិងមានសិល្បករអ្នកផលិតភាពយន្តខ្មែរមួយចំនួនទៀតនិងចូលរួមបង្ហាញវត្តមានលើព្រំក្រហមដែរគ្រាន់តែមិនបានឡើងឆាកជាអ្នកប្រកាសដូចនាង។

សូនីតាប្រាប់ថា នាងនឹងត្រៀមសំលៀកបំពាក់ពិសេសសម្រាប់ព្រឹត្តិការណ៍នេះ។

"ឥឡូវមិនទាន់ដឹងថា ម៉ូដអីនៅឡើយទេ ប៉ុន្តែអាចថាឈុតណា ដែលគេអាចមើលទៅដឹងថាយើងជាខ្មែរ"៕

អត្ថបទ៖ ទារិកា