​ក្រុមហ៊ុន​អាកាសចរណ៍​មួយ​ចំនួន​ក្នុង​ប្រទេស​ថៃ កំពុង​រង​វិបត្តិ​យ៉ាង​ធ្ងន់ធ្ងរ ក្រោយ​គោលដៅ​ធំ​ៗ​បី​នៅ​អាស៊ី ដែល​មាន​ជប៉ុន ចិន និង​កូរ៉េខាងត្បូង ហាមឃាត់​មិន​ឲ្យ​ជើង​ហោះហើរ​ពី​ប្រទេស​មួយ​នេះ​ហោះ​ចូល។ ការ​ហាម​ឃាត់ កើត​មាន​ឡើង​បន្ទាប់​ពី​អង្គការ​អាកាសចរណ៍​ស៊ីវិល​​អន្តរជាតិ​(ICAO) បង្ហាញ​កង្វល់​ចំពោះ​សុវត្ថិភាព​ហោះហើរ​របស់​ប្រទេស​ថៃ។ ​​

យន្តហោះ​ក្រុមហ៊ុន​អាកាសចរណ៍ Asia Altantic Airline

ប្រធាន​នាយកដ្ឋាន​អាកាសចរណ៍​ស៊ីវិល​ថៃ លោក Somchai Piputwat បាន​អះអាង​​ថា អ្នក​ដំណើរ​ជិត ១២​ម៉ឺន​នាក់ ដែល​ចង់​ធ្វើ​ដំណើរ​ទៅ​ជប៉ុន នឹង​ត្រូវ​រង​ផល​ប៉ះពាល់​ខ្លាំង​ក្នុង​រយៈពេល ២​ខែ​បន្ទាប់ ព្រោះ​ការ​រឹតត្បិត​ថ្មី​នេះ។ "បើ​សិន​យើង​មិន​អាច​ដោះ​ស្រាយ​បញ្ហា​ចេញ នៅ​រយៈ​ពេល ៨​ខែ​បន្ទាប់​ទេ ផល​ប៉ះ​ពាល់​អាច​នឹក​ស្មាន​មិន​ដល់"។ នេះ​បើ​តាម លោក Somchai និយាយ​ប្រាប់​អ្នក​យក​ព័ត៌មាន។

អ្នក​ដំណើរ​ប្រមាណ ៧៧០០០​នាក់ ដែល​កក់​ជើង​ហោះហើរ​ទៅ​កាន់​ប្រទេស​ជប៉ុន សម្រាប់​ខែ​មេសា និង​ខែ​ឧសភា ជាមួយ​កម្មវិធី "ហោះ​ហើរ​លើ​ផ្លូវ​ឆ្ងាយ តែ​តម្លៃ​ទាប" របស់​ក្រុមហ៊ុន​អាកាសចរណ៍ AirAsiaX នឹង​រង​ផល​ប៉ះពាល់​ដោយ​ការ​ហាមឃាត់​របស់​ជប៉ុន។ លើស​ពី​នេះ អ្នក​ដំណើរ ២៧០០០​នាក់ នៃ​ក្រុមហ៊ុន​អាកាសចរណ៍ NokScoot និង​អ្នក​ដំណើរ ១០០០០​នាក់ នៃ​ក្រុមហ៊ុន​អាកាសចរណ៍ Thai Airways International ព្រម​ទាំង​អ្នក​ដំណើរ ៣៦០០​នាក់ នៃ​ក្រុមហ៊ុន​អាកាសចរណ៍ Asia Altantic Airline ក៏​ត្រូវ​រង​ផល​ប៉ះពាល់​ដូចគ្នា។ ​

កម្មវិធី "ហោះ​ហើរ​លើ​ផ្លូវ​ឆ្ងាយ តែ​តម្លៃ​ទាប" របស់​ក្រុមហ៊ុន​អាកាសចរណ៍ NokScoot អាច​នឹង​ខាត​បង់ ៤០០​លាន​បាត (១២​លាន​ដុល្លារ) សម្រាប់​ចំណូល​ឆ្នាំ​នេះ បន្ទាប់​ពី​មន្ត្រី​ជប៉ុន​បដិសេធ​មិន​អនុញ្ញាត​ឲ្យ​ជើង​ហោះហើរ៤៤ ហោះ​ចូល​ប្រទេស​របស់​ខ្លួន។ នេះ​បើ​តាម​ការ​បញ្ជាក់​របស់​លោក ​Piya Yodmani ដែល​ជា​ប្រធាន​ប្រតិបត្តិ​ក្រុមហ៊ុន។ ​​​លោក Piya បាន​បន្ត​ទៀត​ថា ក្រុមហ៊ុន​អាកាសចរណ៍ NokScoot ត្រូវ​ផ្ទេរ​អ្នក​ដំណើរ ២០០០០​នាក់ ដែល​មាន​ទិសដៅ​ទៅ​ក្រុង​អូសាកា និង​ក្រុង​តូក្យូ ប្រទេស​ជប៉ុន ទៅ​ឲ្យ​ក្រុមហ៊ុន​អាកាសចរណ៍ Thai Airways ក្នុង​អំឡុង​ចាប់​ពី​ថ្ងៃ​ទី៣០ ខែ​មីនា ដល់​ថ្ងៃ​ទី៣០ ខែ​ឧសភា។ ​

ចំពោះ​ក្រុមហ៊ុន​អាកាសចរណ៍ AirAsiaX នឹង​ត្រូវ​បាត់​បង់​អ្នក​ដំណើរ ១៥​ម៉ឺន​នាក់​នៅ​ឆ្នាំ​នេះ ប្រសិន​បើ​ជប៉ុន​មិន​​អនុញ្ញាត​ឲ្យ​ចាប់​ផ្ដើម​ជើង​ហោះហើរ​ទៅ​កាន់​ទីក្រុង​សាប៉ូរ៉ូ ពី​ថ្ងៃ​ទី​១ ខែ​កក្កដា។ នេះ​បើ​តាម​ការ​បញ្ជាក់​របស់​លោក Nadda Buranasiri ជា​នាយក​ប្រតិបត្តិ​ប្រចាំ​ក្រុមហ៊ុន។

អ្នក​វិភាគ​បាន​លើក​ឡើង​ថា ការ​រឹត​បន្តឹង​នេះ​មាន​ផល​ប៉ះពាល់​លើ​វិស័យ​ទេសចរណ៍​​ថៃ​យ៉ាង​ខ្លាំង ដោយ​សារ​ជើង​ហោះហើរ​ដំណើរ​ការ​បាន​តែ ៥​ភាគ​រយ​ប៉ុណ្ណោះ ក្នុង​ចំណោម​ជើង​ហោះហើរ​ទាំង​អស់។ លោក Surapong Techaruvichit ជា​ប្រធាន​សមាគម​សណ្ឋាគារ​ថៃ (Thai Hotels Association) បាន​និយាយ​ថា លោក​មាន​ការ​ព្រួយ​បារម្ភ​ខ្លះ​ដែរ ទៅ​លើ​ផល​ប៉ះពាល់​ចំពោះ​ការ​កក់​សណ្ឋាគារ​អំឡុង​ថ្ងៃ​ចូល​ឆ្នាំ​ថ្មី ដែល​នឹង​ឈាន​ចូល​មក​ដល់​ក្នុង​ពេល​ខាង​មុខ។

នាយករដ្ឋមន្ត្រី​ថៃ Prayut Chan-o-cha បាន​បញ្ជាក់​ថា នឹង​បើក​ឲ្យ​ភ្នាក់ងារ​សុវត្ថិភាព​ហោះហើរ​របស់​អឺរ៉ុប​(EASA) ស៊ើប​អង្កេត​ទៅ​លើ​ប្រតិបត្តិការ​នៃ​ទី​ភ្នាក់ងារ​គ្រប់គ្រង​អាកាសចរណ៍​ថៃ ដើម្បី​ជួយ​ស្រោច​ស្រង់​ទំនុក​ចិត្ត​ពី​អន្តរជាតិ​ឡើង​វិញ។ "ដំបូង​​យើង​អនុញ្ញាត​ឲ្យ EASA ចូល​មក​បង្កើត​ទំនុក​ចិត្ត​សិន... ហើយ​ចាំ​បង្កើត​គណៈកម្មការ បញ្ចប់​ការ​ហាមឃាត់​ក្នុង​រយៈពេល​មួយ​ខែ"។ លោក Prayut និយាយ​ប្រាប់​អ្នក​យក​ព័ត៌មាន៕

ចុចអាន៖ ជប៉ុន​បិទមិន​ឲ្យ​យន្ត​ហោះ​​ថៃ​ខ្លះ​ហោះ​ចូល​ប្រទេស​ខ្លួន​​

​ប្រែ​សម្រួល៖ គង់ វិសាល ប្រភព៖ abs-cbnnews