យុវវ័យមួយក្រុមផលិតវីដេអូអប់រំអ្នកបើកបរ ទទួលបានការគាំទ្រច្រើន
- 2015-04-02 14:54:04
- ចំនួនមតិ 0 | ចំនួនចែករំលែក 0
យុវវ័យមួយក្រុមផលិតវីដេអូអប់រំអ្នកបើកបរ ទទួលបានការគាំទ្រច្រើន
ចន្លោះមិនឃើញ
ការបង្ហាញស្នាដៃតាមរយៈការផលិតបទចម្រៀង និងវីដេអូអប់រំខ្លីៗ ពីយុវជនខ្មែរកំពុងទទួលបានការគាំទ្រ ច្រើនពីអ្នកនិយមប្រើប្រាស់បណ្តាញអ៊ីនធ័រណេត។ ជាក់ស្តែងវីដេអូអប់រំខ្លីមួយដែលមានបំណងលើកកម្ពស់ការយល់ដឹងពីឥរិយាបថរបស់អ្នកបើកបរបានទាក់ទាញអ្នកទស្សនា និងចែកចាយតៗគ្នាខ្ទង់ពាន់នាក់។ កញ្ញាភិន សុដាលីស សិល្បការនី ខ្មែរ និងជាតំណាងផលិតករវ័យក្មេងមួយរូបបានប្រាប់ Sabay ថាវីដេអូខ្លីនេះមានចំណងជើងថា «Types of Drivers in Cambodia» ដែល មានន័យថាជាភាសាខ្មែរថាប្រភេទអ្នកបើកបរនៅកម្ពុជា។ វីដេអូនេះមានរយៈពេលជាង៧ នាទី បានបង្ហាញពីអ្នកបើកបរនៅកម្ពុជាមានទាំងអស់១៥ប្រភេទ ដែលមើលទៅបែបកំប្លែងតែបង្កប់អត្ថន័យអប់រំដល់អ្នកបើកបរ ទាំងឡាយ។
និស្សិតឆ្នាំទីបីនៃសាកលវិទ្យាល័យ លីម កុកវីង រូបនេះបានបន្តទៀតថា ការផលិតវីដេអូអប់រំនេះគឺយកលំនាំពីបរទេស ខណៈករណីគ្រោះថ្នាក់ចរាចរណ៍នៅកម្ពុជាកំពុងបន្តកើតមានឡើងជារៀងរាល់ថ្ងៃ។ "ការ ពិតទៅមកពីខ្ញុំឃើញវីដេអូបែបនេះនៅ សាំងហ្គាពួរ និង នៅអាមេរិក ប៉ុន្តែនៅខ្មែរឬក៏ថៃអីអត់ទាន់ឃើញមានវីដេអូចឹងៗផង! ចឹងហើយបានខ្ញុំគិតឃើញថានៅស្រុកខ្មែរតែងតែមានបញ្ហាចរាចរណ៍ ហើយក៏បបួលមិត្តភក្ដិ ថតវីដេអូនេះឡើង”។ កញ្ញាបញ្ជាក់ទៀតថា តួសម្ដែងក្នុងវីដេអូនេះសុទ្ធតែជាមិត្តភក្ដិរៀនជាមួយគ្នា ហើយការកាត់តវីដេអូនេះគឺសុទ្ធតែជាអ្វីដែលធ្លាប់ចេះ ដូច្នេះកញ្ញាត្រូវតែយកអ្វីដែលខ្លួនធ្លាប់រៀនយកមកប្រើប្រាស់ ក្នុងបំណងបង្ហាញដល់មិត្តយុវវ័យ ឱ្យចេះប្រុងប្រយ័ត្នក្នុងពេលបើកបរ ទោះបីជាវីដេអូនេះផលិតឡើងដើម្បីការសប្បាយក៏ដោយ។ ថ្វីត្បិតវីដេអូនេះ ទទួលបានការគាំទ្រច្រើនពីមិត្តយុវវ័យក៏ដោយប៉ុន្តែ នៅមានយុវវ័យខ្លះហាក់ដូចជាមិនទាន់យល់ពីគោលការណ៍របស់វីដេអូនេះ នៅឡើយទេ។ "មានមនុស្ស២ ទៅ៣ ក្នុងចំណោម១០០នាក់ រិះគន់ចំពោះវីដេអូនេះ តែគាត់មិនដឹងថាគាត់ ជា One of them ទេ មានន័យថាជួនកាលគាត់អាចជាម្នាក់នៅក្នុងចំណោមនេះ! ខ្ញុំមិនមែនចង់បានន័យថាឱ្យពួកគាត់ធ្វើចឹងទេតែខ្ញុំគ្រាន់តែចង់បង្ហាញពួកគាត់ប៉ុណ្ណោះ!” ។ និស្សិតផ្នែក Proffesional Design បន្ថែម៕ https://www.youtube.com/watch?v=uku_h83lsyQ អត្ថបទ៖គង់ ច័ន្ទវ៉ាន់ណេង
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
