គំរូ "សេវាកម្មបុណ្យសព” ឈ្នះមេដាយមាសតំបន់ និងបន្តទៅប៉ះនិស្សិតសាកលវិទ្យាល័យល្បីៗលើលោកនៅ អាមេរិក
- 2015-04-02 15:31:45
- ចំនួនមតិ 0 | ចំនួនចែករំលែក 0
គំរូ "សេវាកម្មបុណ្យសព” ឈ្នះមេដាយមាសតំបន់ និងបន្តទៅប៉ះនិស្សិតសាកលវិទ្យាល័យល្បីៗលើលោកនៅ អាមេរិក
ចន្លោះមិនឃើញ
គំរូអាជីវកម្មរៀបចំបុណ្យសពមិនធ្លាប់មានឈ្មោះថា RIP Funeral Service Agency បានធ្វើឲ្យយុវតីស្ថាបនិកខ្មែរ២រូបគឺកញ្ញា ហោ ស៊ីវហុង និង ឡាយ ឈុនយី បំបែកឯតទគ្គកម្មឈ្នះមេដាយមាសនៃការប្រកួតគំរូអាជីវកម្មប្រចាំមហាអនុតំបន់ទន្លេមេគង្គ Menkong Business Challenge និងកំពុងត្រៀមបន្តទៅការប្រកួតកម្រិតអន្តរជាតិកំពូលនៅ សហរដ្ឋអាមេរិកនៅខែឧសភា។
និស្សិតសាកលវិទ្យាល័យផ្នែកច្បាប់ឆ្នាំទី៤ ឈុនយី និងផ្នែកធនាគារហិរញ្ញវត្ថុ ស៊ីវហុង បានចាប់ដៃគ្នាជាក្រុម ជម្រុះរហូតឈ្នះជើងឯកថ្នាក់ជាតិលើក្រុមនិស្សិតគ្រប់សាកលវិទ្យាល័យទូទាំងប្រទេសជាង៦០ក្រុម កាលខែមករា។ ជើងឯកជាតិជាឱកាសបើកផ្លូវឲ្យ ឈុនយី និងស៊ីវហុង នាំយកគំរូអាជីវកម្ម "សេវាកម្មបុណ្យសព" ទៅបន្តប្រជែងពានរង្វាន់ថ្នាក់តំបន់ Mekong Business Challenge នៅទីក្រុងហាណូយ ជាមួយក្រុមនិស្សិត១០ក្រុមទៀតមកពីប្រទេសសមាជិកមហាអនុតំបន់ទន្លេមេគង្គរួមមាន ថៃ ឡាវ មីយ៉ាន់ម៉ា វៀតណាម ខេត្តយូណាន និង ចិន។ ជាលទ្ធផលយុវតីវ័យ២៣ និង ២១ឆ្នាំ បានឈ្នះជើងឯក ដែលក្រុមកម្ពុជាកន្លងមក មិនធ្លាប់ធ្វើបានសោះ។
ឡាយ ឈុនយី (ស្ដាំ) និង ហោ ស៊ីវហុង
គំរូអាជីវកម្ម សេវាកម្មបុណ្យសព RIP Funeral Service Agency
ជាគំនិតអាជីវកម្ម ដែលរៀបចំជាស្លាយ៍មាន២០ទំព័រ ដើម្បីធ្វើបទបង្ហាញនិងពន្យល់ ក្នុងរយៈពេលកំណត់១០នាទី មុនពេលគណៈវិនិច្ឆ័យឈ្លេចសួរ១០នាទីទៀត។ គំរូអាជីវកម្មនេះ បានសង្កត់លើការស្ទាបស្ទង់ដែលអាចធានាភាពជោគជ័យដូចជា អតិថិជន ការផ្សព្វផ្សាយ បណ្ដាញផ្គត់ផ្គង់ ធនធាន ការចំណាយ និងផលចំណូល ជាដើម។ វាជាគំរូសេវាកម្ម ទទួលរៀបចំបុណ្យសពសម្រាប់អតិថិជននៅភ្នំពេញ។ អ្វីដែលពិសេសគឺអតិថិជន មិនបាច់ខ្វល់ពីការចំណាយ។ RIP Funeral Service Agency រៀបចំបុណ្យសព ដោយយកប្រាក់កុំមីស្យុង ពីការទិញរបស់របរផ្សេងៗរៀបចំពិធី គឺមិនគិតប្រាក់ពីអតិថិជនឡើយ។
«អាជីវកម្មប្រកួតបាន លុះត្រាតែជាដំណោះស្រាយសង្គម ហើយក៏ត្រូវរកបានប្រាក់ចំណេញ។ ខ្ញុំមានមិត្តភ័ក្ដិម្នាក់ស្លាប់។ គាត់ជាកូនតែម្នាក់គត់ក្នុងគ្រួសារ។ ពេលខ្ញុំទៅបុណ្យឃើញ ម្ដាយគាត់យំសន្លប់បីបួនដង ធ្វើអីមិនកើតទេ បុណ្យក៏គ្មានអ្នករៀបចំគឺគាត់លំបាកណាស់។ ខ្ញុំក៏គិតថា មង្គលការមានផ្នួង មានគេរៀបចំ ចុះម៉េចមនុស្សស្លាប់មិនមានបែបហ្នឹង? មង្គលការ ភ្ជាប់ពាក្យ អាចមានគម្រោងថាពេលនេះពេលនោះ តែការស្លាប់គ្មាននរណាដឹងថាពេលណា កន្លែងទេ។ ដូច្នេះវានឹងជួយគ្រួសារសពបើយើងមានសេវាបែបហ្នឹង។
ដូចថាអីចឹង ការស្លាប់គ្មាននរណាកំណត់ទេ ការស្លាប់មានរាល់ថ្ងៃ។ គេថាបុណ្យសព គឺជាការលាគ្នា ជូនដំណើរគ្នា ជាលើកចុងក្រោយបង្អស់ ចុះហេតុអ្វីបានជាគ្រួសារខ្លះមិនអាចធ្វើវាឲ្យបានសមរម្យ ព្រោះតែមិនមានលុយកាក់? ការរៀបចំបុណ្យសពគឺសាំញ៉ាំគ្មានជួបគាត់ទេ ដូច្នេះគឺមានពួកយើងជួយគាត់ ហើយគាត់ក៏មិនបាច់លំបាកដើរទិញនេះទិញនោះ មិនចាំបាច់គេកោថ្លៃៗ»។ និស្សិតសាកលវិទ្យាល័យជាតិគ្រប់គ្រងទាំងរូប លើកឡើងពីអ្វីដែលនាងសម្រេចចិត្ត បង្កើតគំរូអាជីវកម្មនេះឡើង រហូតឈ្នះមេដាយមាសប្រចាំតំបន់។
គំរូសេវាកម្មនេះ ក៏និយាយពីការចាប់ដៃគូជាមួយ ក្រុមហ៊ុនធានារ៉ាប់រង ធនាគារ និង គ្រឹះស្ថានមីក្រូហិរញ្ញវត្ថុ ដើម្បីធ្វើយ៉ាងណាឲ្យអតិថិជនមិនចាំបាច់បារម្ភរឿងអត់ប្រាក់ ធ្វើបុណ្យពេលសមាជិកគ្រួសារបាត់បង់ជីវិត។
កំណត់ត្រាមេដាយមាស
៩ឆ្នាំហើយដែលការប្រកួតនេះបានរៀបចំឡើង តែ កម្ពុជា មិនធ្លាប់ឈ្នះជើងឯកសោះ ឬសូម្បីជើងឯករង។ ក្នុងការប្រកួត គ្រប់ក្រុមទាំងអស់មានរយៈ១០នាទី ដើម្បីធ្វើបទបង្ហាញពីគំរូជីវកម្មក្រុម ដែលមានគណៈវិនិច្ឆ័យអន្តរជាតិមកពី អាល្លឺម៉ង់ ជប៉ុន អាមេរិក សិង្ហបូរី ជាដើមវាយតម្លៃ និងឈ្លេចសួរ។
«ពេលប្រកាសគេចាប់ប្រកាសពីលេខ៣មុន រួចលេខ២ គឺពួកយើងគិតថាប្រហែលគ្មានសង្ឃឹមទេ ព្រោះក្រុមគេខ្លាំងៗ សុទ្ធតែអនុបណ្ឌិតពាណិជ្ជកម្ម។ ណាមួយ មុនពេលដែលពួកយើងទៅ មិត្តភ័ក្ដិនិងមនុស្សមួយចំនួនឮយើងនិយាយ គេថាទៅប្រកួតអីស្រីៗក្មេងៗអីចឹង ទៅអីឈ្នះគេ ហើយនឹកឃើញអីមិនឃើញទៅយករឿងបុណ្យខ្មោចអីចឹងគឺរឹតតែគួរឲ្យចង់សើចណាស់។ ប៉ុន្តែពួកយើងគិតថាជាមោទនភាពដែលអាចយក ប្រពៃណីមួយរបស់ខ្មែរទៅបង្ហាញគេ ហើយវាជារឿងដ៏រំភើបនិងមោទនភាព ដែលទីបំផុតពួកយើងត្រូវគេប្រកាសថាជាជើងឯក។ គឺវាដោយសារអាជីវកម្មរបស់យើងពុំបានផ្ដោតលើប្រាក់ចំណេញច្រើនទេ គឺជួយសង្គមច្រើនវិញ»។
ជប៉ុន ចាប់អារម្មណ៍អនុវត្តគំរូសេវាកម្មបុណ្យសព
យុវតីទាំង២នាក់ បង្ហើបថាគំរូអាជីវកម្មឈ្នះមេដាយមាសនេះ បានទាក់ទាញវិនិយោគិនមួយចំនួនចង់យកទៅអនុវត្តបើកអាជីវកម្មពិត។ ប៉ុន្តែ ស៊ីវហុង និងឈុនយី ពុំទាន់ចង់គិតដល់ការបើកដំណើរការអាជីវកម្ម ដែលកំពុងស្ថិតក្នុងគំរូនេះនៅឡើយ ដោយថានៅកំពុងរៀន ពុំមានបទពិសោធន៍ និងពុំមានទុនផង។ សហស្ថាបនិកគំរូអាជីវកម្មបុណ្យសពពោលថា៖ «កាលសិក្ខាសាលាអាជីវកម្មខ្នាតតូចដើមខែហ្នឹង សហគ្រិនមកពីជប៉ុនគាត់បានចាប់អារម្មណ៍ តែវាជារឿងបន្ទាប់ទៀត ខ្ញុំមិនទាន់ចង់គិតទេ។ សំខាន់ពេលនេះ ពួកខ្ញុំកំពុងគិតរឿងទៅប្រកួតនៅអាមេរិកសិន ចាំយើងមកវិញ យ៉ាងម៉េចៗ ចាំយើងស្ទាបស្ទង់ទីផ្សារឲ្យហ្មត់ចត់បំផុត»។
ឆ្ពោះទៅកាន់អាមេរិកប៉ះក្រុមនិស្សិតសាកលវិទ្យាល័យល្បីៗលើលោក
លោក Stephen Paterson សហស្ថាបនិកកម្មវិធីប្រជែងពានរង្វាន់គំរូអាជីវកម្ម Mekong Business Challenge និងជាទីប្រឹក្សាសាកលវិទ្យាល័យជាតិគ្រប់គ្រង ថាជយលាភីប្រចាំតំបន់ ឈុនយី និង ស៊ីវ ហុង នឹងត្រូវបញ្ជូនទៅប្រកួតជាអន្តរជាតិ International Business Model Competition នៅសាកលវិទ្យាល័យ Brigham Young University រដ្ឋយូតាថ្ងៃទី ១ឧសភាខាងមុខ។ ទីនោះ ក្រុមយុវតីខ្មែរនឹង ប្រកួតប្រជែងជាមួយក្រុមនិស្សិតជាង៥០ក្រុមទៀត មកពីសាកលវិទ្យាល័យល្បីៗតាមប្រទេសផ្សេងៗ មានទាំងសាកលវិទ្យាល័យលំដាប់ពិភពលោក Harvard និង Stanford។
កម្ពុជាលើឆាកពិភពលោក
សហស្ថាបនិកគំរូអាជីវកម្មបុណ្យសព ពុំបង្ហើបថាមានជំនឿចិត្តបានលទ្ធផលបែបណាទេ តែកង្វល់គឺថាជារឿងលំបាក ដែលត្រូវប្រឈមនឹងគំរូអាជីវកម្មរបស់ក្រុមនិស្សិតកម្រិតសិក្សាខ្ពស់ៗមកពីសាកលវិទ្យាល័យ លំដាប់ថ្នាក់ពិភពលោកក៏មាន។ យ៉ាងណាមិញ ឈុនយី និងស៊ីវហុង ថាលទ្ធផលបែបណាគឺជារឿងមួយ តែអ្វីដែលកញ្ញាធ្វើបានសម្រាប់ប្រជាជនកម្ពុជា គឺនឹងបង្ហាញពិភពលោកថាយុវជនកម្ពុជាមានសមត្ថភាព នឹងរំពឹងថាគេកាន់តែស្គាល់ប្រទេសជ្រោយឥណ្ឌូចិននេះ ពិសេសទាក់ទាញវិនិយោគមកកាន់កម្ពុជា។ «សំខាន់មួយទៀតពួកខ្ញុំនឹងបង្ហាញពិភពលោកឲ្យគេស្គាល់ខ្មែរ ព្រោះថាអាមេរិកនិងអឺរ៉ុបខ្លះគេមិនស្គាល់ខ្មែរនៅឯណាទេ យើងអាចបង្ហាញប្រពៃណីបុណ្យសពប្លែកពីគេរបស់ខ្មែរឲ្យគេស្គាល់ ហើយមួយទៀតនិស្សិតខ្មែរយើង៩០ភាគរយ តែងរៀនដើម្បីធ្វើការឲ្យគេ អីចឹងវានឹងលើកទឹកចិត្តយុវជនថាគំនិតអាជីវកម្មយុវជនយើងក៏មិនធម្មតាដែរ ហើយយុវជនយើងត្រូវរៀនអ្វីដែលថ្មីៗ»។ ឈុនយី និង ស៊ីវហុង បកស្រាយ៕
អត្ថបទ៖ ប៉ែន សុផាន់ណា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
