បុរស​ជនជាតិ​ចិន​ម្នាក់ ដែល​គេ​ដាក់​ឈ្មោះ​ថា​ជា Romeo វ័យ​ក្មេង បាន​ធ្វើ​ឲ្យ​គ្រប់​គ្នា​មានការ​ភ្ញាក់​ផ្អើល​យ៉ាង​ខ្លាំង ដោយសារ​សមត្ថភាព​ទាក់​ទង​មិត្ត​ស្រី​លួច​លាក់​បាន​ដល់​ទៅ ១៧​នាក់ ក្នុង​ពេល​តែ​មួយ។ រឿង​រ៉ាវ​នេះ​បាន​បែក​ធ្លាយ ក្រោយ​រូប​គេ​ជួប​គ្រោះ​ថ្នាក់​ចរាចរណ៍​ចូល​សម្រាក​ក្នុង​មន្ទីរពេទ្យ ហើយ​មិត្ត​ស្រី​ទាំង ១៧​នាក់​នោះ បង្ហាញ​ខ្លួន​បន្ត​បន្ទាប់។

លោក Yuan ដែល​គេ​ដាក់​ឈ្មោះ​ថា​ជា Romeo វ័យ​ក្មេង

បុរស​សម្បូរ​ស្នេហ៍​នេះ មាន​ឈ្មោះ Yuan រស់​នៅ​ក្រុង Changsha ខេត្ត​ហឺណាន ប្រទេស​ចិន។ រូប​គេ​បាន​ទាក់​ទង​មិត្ត​ស្រី​លួច​លាក់​ជា​ច្រើន​ក្នុង​ពេល​ជាមួយ​គ្នា ហើយ​ម្នាក់​ក្នុង​ចំណោម​នោះ​ថែម​ទាំង​មាន​កូន​ទៀត​ផង។ កាល​ពី​ពេល​ថ្មី​ៗ​នេះ លោក Yuan បាន​ជួប​គ្រោះ​ថ្នាក់​ចរាចរណ៍ ចូល​សម្រាក​ក្នុង​មន្ទីរពេទ្យ ហើយ​មិត្ត​ស្រី​ដែល​លោក​លួច​ទាក់​ទង ខ្លះ​ទើប​បាន​ត្រឹម​ខែ ឯ​ខ្លះ​ទៀត​បាន​ដល់​រាប់​ឆ្នាំ បាន​បង្ហាញ​ខ្លួន​គួរ​ឲ្យ​ភ្ញាក់​ផ្អើល។ នេះ​គ្រាន់​តែ​ជា​នារី​ដែល​បង្ហាញ​ខ្លួន​ជាក់​ស្ដែង​ប៉ុណ្ណោះ ឯ​ចំនួន​ពិត​ប្រាកដ​អាច​មាន​លើស​ពី​នេះ។

នារី​ម្នាក់​ឈ្មោះ Xiao Li ដែល​ទាក់​ទង​ជាមួយ​បុរស​សម្បូរ​ស្នេហ៍​បាន ១៨​ខែ បាន​រៀបរាប់​ប្រាប់​សារព័ត៌មាន Xiaoxiang Chen Bao ថា "ខ្ញុំ​បារម្ភ​ខ្លាំង​ណាស់​ពេល​ឮ​ថា​គាត់​ចូល​ពេទ្យ... តែ​ពេល​ឃើញ​ស្រី​ស្អាតៗ​បង្ហាញ​ខ្លួន ខ្ញុំ​ក៏​ឈប់​យំ​ទៀត"។ នារី​រូប​នេះ បាន​បន្ត​ទៀត​ថា អ្នក​ផ្សេង​បាន​ផ្ដល់​លុយ​កាក់​ដើម្បី​ចិញ្ចឹម​លោក Yuan ហើយ​នារី​ម្នាក់​បាន​ធ្វើ​បែប​នេះ​អស់​រយៈ​ពេល ៩​ឆ្នាំ​មក​ហើយ។ ចំណែក​នារី​ម្នាក់​ផ្សេង​ទៀត ថែម​ទាំង​មាន​គម្រោង​រៀបការ​ទៀត​ផង។

​រឿងរ៉ាវ​នេះ បាន​ក្លាយ​ជា​ប្រធាន​បទ​យ៉ាង​ក្ដៅ​គគុក​ក្នុង​ចំណោម​អ្នក​ប្រើប្រាស់​អ៊ីនធឺណិត​នៅ​ប្រទេស​ចិន។ អ្នក​ខ្លះ​បាន​បញ្ចេញ​មតិ​រិះ​គន់​ទៅ​លើ​គំនិត​បោកប្រាស់​របស់​បុរស​សម្បូរ​ស្នេហ៍​នេះ ឯ​អ្នក​ខ្លះ​ទៀត​បែរ​ជា​សរសើរ​ថា​អាច​លាក់​បាំង​បាន​យ៉ាង​ល្អ។ ពេល​នេះ​មន្ត្រី​ប៉ូលិស​កំពុង​បើក​ការ​ស៊ើប​អង្កេត ទៅ​លើ​អំពើ​បោកប្រាស់ ដែល​ធ្វើ​ឲ្យ​នារី​ជា​ច្រើន​លង់​ខ្លួន៕

ចុចអាន៖ គូ​ស្នេហ៍​រ៉ូមែនទិក​នាំ​គ្នា​ងូត​ទឹក​ត្រសង​កណ្ដាល​ហ្វូង​មនុស្ស​

ប្រែ​សម្រួល៖ គង់ វិសាល ប្រភព៖ BBC