ឧបករណ៍ភ្លេងអាំងឃ្លង់ ពីរោះដូចរនាតខ្មែរ លេចមុខក្នុងពិព័រណ៍ស្នាដៃនិស្សិត

2015-04-08 16:09:09
ចំនួនមតិ 0 | ចំនួនចែករំលែក 0

ចន្លោះមិនឃើញ

អាំងឃ្លង់ ( Ang Klung) ជាឧបករណ៍ភ្លេងបុរាណរបស់ប្រទេសឥណ្ឌូណេស៊ី ដែលបានដាក់បង្ហាញក្នុងការតាំងពិព័រណ៍ស្នាដៃនិស្សិតគ្រប់ជំនាន់នៃសាកលវិទ្យាល័យភូមិន្ទវិចិត្រសិល្បៈ រយៈពេល៣ថ្ងៃពីថ្ងៃទី៦ ដល់ថ្ងៃទី៨ ខែមេសានេះ។

កំពុងអង្គុយម្នាក់ឯងក្រោមទឹកមុខដ៏ស្រស់ញញឹម យុវជន ហាន គីមហាំម និស្សិតរបស់ស្ថានទូតឥណ្ឌូនេស៊ី ប្រាប់ Sabay ថា ឧបករណ៍ភ្លេង អាំងឃ្លង់ (Ang Klung) នេះ មានប្រភពមកពីប្រទេសឥណ្ឌូនេស៊ី ធ្វើឡើងពីបំពង់ឫស្សី ។ ឧបករណ៍ភ្លេងនេះមានសំឡេងពីរោះដូចជាសំឡេងរនាតខ្មែរយើងដែរ។ ម្យ៉ាងទៀត គេអាចលេងបានគ្រប់កម្មវិធីកម្សាន្តទាំងអស់ ប៉ុន្តែទាល់តែមនុស្សចាប់ពី២០នាក់ឡើងទើបអាចលេងបានក្នុងវង់ភ្លេងនេះ ខណៈម្នាក់អាចកាន់មួយលេខ ឬពីរលេខបាន។

យុវជនរូបនេះបន្តទៀតថា ការដាក់បង្ហាញឧបករណ៍នេះគឺគ្រាន់តែចង់ឲ្យនិស្សិតខ្មែរយើងជំនាន់ក្រោយៗដែលមាននិស្ស័យខាងផ្នែកសិល្បៈភ្លេងបានស្គាល់ពីឧបករណ៍របស់ប្រទេសគេខ្លះៗតែប៉ុណ្ណោះ។ ការចូលរួមទស្សនារបស់ភ្ញៀវកិត្តិយសក្នុងកម្មវិធីនេះ គឺជាការផ្ដល់កម្លាំងចិត្តដល់និស្សិតគ្រប់ជំនាន់នៃសាកលវិទ្យាល័យភូមិន្ទវិចិត្រសិល្បៈ។

ពិពរណ៍នេះមានរយៈពេល ៣ ថ្ងៃ ចាប់ពីថ្ងៃទី ៦ ដល់ថ្ងៃទី ៨ ខែមេសា នេះ វេលាម៉ោង ៩ព្រឹក ដល់ម៉ោង ៨យប់។ ចាប់ពីម៉ោង ៥ល្ងាចទៅ ក៏មានការសម្ដែងសិល្បៈពីក្រុមនិស្សិត និងបង្ហាញពីឧបករណ៍ភ្លេង អាំងឃ្លង់ (Ang klung) (លំនាំបទណោងភីសារ៉ា ) ទម្រង់ល្ខោនយីកេ ក៏មានការសម្ដែងផ្សេងៗជាច្រើនទៀតរបស់និស្សិតក្នុងសាលានោះដែរ។

អត្ថបទ៖ សុខអូន