ទេព រិនដារ៉ូ បង្ហើបតិចនិករក្សាមិត្តភាពជិត ៣០ ឆ្នាំ ជាមួយ អម្ពរ ទេវី

2015-04-08 19:30:12
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ទេព រិនដារ៉ូ និង អម្ពរ ទេវី ដែលជាដៃគូសម្ដែងខ្សែភាពយន្តសក្ដិសមបំផុតក្នុងអំឡុងទសវត្ស ៩០ ហើយទំនាក់ទំនងអ្នកទាំងពីរនៅតែស្អិតល្មួតរហូតមកទល់នឹងពេលបច្ចុប្បន្ននេះ បើទោះបីជា អម្ពរ ទេវី បានចាកចេញពីស្រុកកំណើតទៅរស់នៅសហរដ្ឋអាមេរិកច្រើនឆ្នាំហើយក្ដី។ តើលោក ទេព រិនដារ៉ូ មានគន្លឹះអ្វីខ្លះ ដើម្បីរក្សាមិត្តភាពឲ្យបានយូរអង្វែង?

រាប់ពីឆ្វេងជា វត្ថុអនុស្សាវរីយ៍ពី អ្នកនាង អម្ពរ ទេវី មក លោក ទេពរិនដារ៉ូ និង ឈុត សម្ដែងក្នុងរឿង

ឆ្លើយតបនឹងសំណួរខាងលើនេះ លោក ទេព រិនដារ៉ូ តារាសម្ដែងជើងចាស់មកពីខេត្ត បាត់ដំបង បានបង្ហើបប្រាប់គេហទំព័រ Sabay ថា អ្វីដែលសំខាន់ គឺមិត្តភាពដែលល្អ ត្រូវចេះមើលពីចំណុចពិសេសរបស់ដៃគូ និង ការទុកចិត្តគ្នាទៅវិញទៅមក។

ការលើកឡើងរបស់ លោក ទេព រិនដារ៉ូ ខាងលើនេះ គឺធ្វើឡើងក្រោយពី តារាសម្ដែងស្រីល្បីល្បាញក្នុងទសវត្ស ៩០ អម្ពរ ទេវី បានផ្ញើវត្ថុអនុស្សាវរីយ៍ ជាទឹកអប់មកកាន់ លោក ទេព រិនដារ៉ា កាលពេលថ្មីៗនេះ។ លោក ទេព រិនដារ៉ូ បាននិយាយថា នេះមិនមែនជាលើកទី ១ នោះទេ ដែលលោកទទួលបាន រាល់ពេល អម្ពរ ទេវី មកលេងស្រុកខ្មែរ តែងតែផ្ញើជាវត្ថុអនុស្សាវរីយ៍។

អម្ពរ ទេវី ផ្ញើកាដូ ជាទឹកអប់ពីអាមេរិក មកលោក ទេព រិនដារ៉ូ ដែលជាមិត្តចាស់

អតីតជា ពីឡុត យន្តហោះ MIG-21 ក្នុងអំឡុងឆ្នាំ ១៩៨៤ លោក ទេព រិនដារ៉ូ បាននិយាយបន្ថែមទៀតថា "ខ្ញុំតែងតែរកចំណុចពិសេសរបស់គាត់ ហើយចំណុចពិសេសនេះ នាំឲ្យយើងមានទំនាក់ទំនងល្អជាមួយគ្នា ហើយខ្ញុំនៅក្បែរគាត់តែងតែសប្បាយចិត្ត"។

ទេព រិនដារ៉ូ បានប្រាប់ពីចំណុចពិសេសរបស់ អម្ពរ ទេវី ថា៖ -ទេវី ជាមនុស្សកំប្លុកកំប្លែង -ទេវី បើទោះមានទុក្ខ ក៏នាងនៅតែធ្វើឲ្យក្រុមការងារសប្បាយចិត្ត -ចូលចិត្តញ៉េះញ៉ោះ លេងសើច -ទំនាក់ទំនងស្មោះត្រង់ -ចេះកែលម្អរាល់ចំណុចខ្សោយរបស់ក្រុមការងារ -ជាមនុស្សផ្ចិតផ្ចង់ការងារ

តារាសម្ដែងខ្សែភាពយន្តលើកទី ១ នៅក្នុងរឿង "ទឹកភ្នែកសម្ងាត់រាត្រីពណ៌ស្វាយ" នាឆ្នាំ ១៩៨៩ លោក ទេព រិនដារ៉ូ បាននិយាយទៀតថា ដើម្បីឲ្យមិត្តភាពបានយូរអង្វែង អ្វីដែលសំខាន់មួយទៀតនោះ គឺ៖

-ទី ១ ដៃគូត្រូវមានទំនុកចិត្តលើគ្នា៖ ជីវិតអ្នកសិល្បៈរងព្យុះភ្លៀង ជាពិសេសអ្នកកាសែតសរសេររឿងមិនល្អ ឬ អ្នកសិល្បៈគ្នាឯង ចង់ឲ្យយើងឈ្លោះគ្នា ដូច្នេះ បើយើងទុកចិត្តគ្នា យើងមិនជឿលើការញុះញង់អ្នកដទៃនោះទេ។ ផ្ទុយទៅវិញយើងចេះសួរនាំគ្នាទៅវិញទៅមកដើម្បីស្វែងរកព័ត៌មានពិត។

-ទី ២ ស្រឡាញ់រាប់អានផុសចេញពីចិត្ត៖ កត្តានេះសំខាន់ណាស់ការរាប់អានត្រូវមានក្ដីស្រឡាញ់ ការស្រឡាញ់ក៏ត្រូវមានភាពស្មោះត្រង់គ្នាទៅវិញទៅមក ហើយទាំងអស់នេះ ផ្ដើមពីការរាប់អានស្មោះត្រង់ គ្មានអ្វីលើសពីនេះទេ។

-ទី ៣ ភាពនឹងនមិនប្រែប្រួល៖ មានន័យថា ការរាប់អានមិនប្រកាន់លើមាន ឬ ក្រនោះទេ។ ដើមឡើយយើងរាប់អានគ្នាពីក្រដូចគ្នា ក្រោយមកតារាស្រីខ្លះចាប់ផ្ដើមមានបានចាប់ផ្ដើមប្រែប្រួលចរិត ដែលធ្វើឲ្យទំនាក់ទំនងថមថយ ឬ ដាច់ដោច។ ដូច្នេះ ទោះអនាគត មាន ឬ ក្រ ក៏ដោយ មិត្តភាពនៅតែមិត្តភាព គឺយើងមិនត្រូវប្រែប្រួលចរិតនោះទេ។

ខ្សែភាពយន្តដំបូង ដែលលោក ទេព រិនដារ៉ូ បានចាប់ដៃគូសម្ដែងជាមួយ អម្ពរ ទេវី គឺ រឿង "អាថ៌កំបាំងកិច្ចសន្យា"។ ក្រោយមកអ្នកទាំងពីរត្រូវបានចាត់ទុកថា ជាតារាសម្ដែងសក្ដិសមបំផុតនៅក្នុងអំឡុងទសវត្ស ៩០។ អ្នកទាំងពីរបានលែងចាប់ដៃគូសម្ដែង ក្រោយពី តារាស្រី អម្ពរ ទេវី ចាកចេញទៅរស់នៅសហរដ្ឋអាមេរិក ប៉ុន្តែ តារាជើងចាស់ ទេព រិនដារ៉ូ នៅតែជាតារាសម្ដែងពេញនិយមរហូតមកទល់នឹងពេលបច្ចុប្បន្ន៕