កោះរ៉ុង ឋានសួគ៌លោកីយ៍ លើដីកម្ពុជា

2015-04-10 17:38:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ទើរតែពីរម៉ោងគត់ ម៉ាស៊ីនកាណូតបញ្ចេញសំឡេងដដែលៗដាក់ត្រចៀកអ្នកដំណើរទាំងប្រុសទាំងស្រីលើទូកឈើមួយ ដែលកំពុងអណ្ដែតលើផ្ទៃសមុទ្រដ៏ធំល្វឹងល្វើយ ធ្វើឲ្យម្នាក់ៗមានអារម្មណ៍ស្អុះស្អាប់ជាខ្លាំង។ ប៉ុន្តែភាពអផ្សុកនេះប្រែជារលាយសាបសូន្យទៅវិញ នៅពេលគេឃើញកោះមួយកំពុងលេចចេញបន្តិចម្ដងៗនៅចំពោះមុខគេ។

ពេលទូកនេះរំកិលចូលកាន់តែកៀកកោះនោះពេលណា សំឡេងខ្ញៀវខ្ញារបន្លឺឡើង ញ៉ាំងឲ្យយុវតី សួន ដាវី វ័យ២៥ឆ្នាំ ដែលកំពុងអង្គុយលើទូកជាមួយនឹងអ្នកដំណើរផ្សេងៗនោះដែរ មានអារម្មណ៍ថា ក្ដីសុបិនប៉ងមកលេងកោះរ៉ុងនេះជិតក្លាយជាការពិតហើយ។

សួន ដាវី បុគ្គលិកក្រុមហ៊ុនឯកជនមួយនៅភ្នំពេញបានឮពីភាពស្រស់ស្អាតនៃកោះរ៉ុងនេះតាមរយៈមិត្តរួមការងារ ហើយនាងបានប៉ងមកលេងទីនេះអស់រយៈពេលកន្លះឆ្នាំ ទើបបានមកកម្សាន្តនៅថ្ងៃនេះ។

កញ្ញាថា៖ "ជាធម្មតាយើងជាខ្មែរ យើងគួរមកស្គាល់កោះដែលជារបស់ខ្មែរ។ ពេលមកដល់កោះនេះភ្លាម ខ្ញុំសប្បាយមែនទែនព្រោះបានឃើញទឹកថ្លា មើលឃើញបាតដី ខ្សាច់ស និងគ្មានសំរាម ព្រមទាំងមានខ្យល់អាកាសល្អ ល្អជាងឆ្នេរអូរឈើទាលឆ្ងាយណាស់។ ចំណែកផ្ទះនៅលើកោះក៏ទាក់ទាញ ខ្ញុំក៏បានគេងនៅបឹងហ្គាឡូនេះមួយយប់ដែរ។ អាហារហូបចុកដូចបែបបរទេសបន្តិច"។

ប៉ុន្តែយុវតីរូបនេះហាក់អន់ចិត្តបន្តិចត្រង់នៅកោះរ៉ុងសម្បូរភ្ញៀវទេសចរបរទេសច្រើនជាងភ្ញៀវខ្មែរ ដែលធ្វើឲ្យកញ្ញាមានអារម្មណ៍ថា ខ្លួនកំពុងស្ថិតនៅបរទេសច្រើនជាងនៅប្រទេសខ្លួន។ តែទោះបីយ៉ាងណា កញ្ញារំពឹងថា ចំនួនភ្ញៀវទេសចរខ្មែរទៅលេងកោះនេះនឹងកើនឡើងពីមួយថ្ងៃទៅមួយថ្ងៃ។

មគ្គុទ្ទេសក៍ទេសចរ លោក សុទ្ធ ដារិទ្ធ ដែលបាននាំភ្ញៀវដើរកម្សាន្តតាមខេត្តផ្សេងៗក្នុងមួយឆ្នាំៗ ថ្លែងថា បើភ្ញៀវទេសចរដែលចង់ឃើញមនុស្សច្រើន មានកម្មវិធីសប្បាយៗនៅពេលយប់ គេគួរទៅលេងនៅកោះរ៉ុង។ តម្លៃបឹងហ្គាឡូប្រហែលជា៣០ដុល្លារមួយយប់។ ប៉ុន្តែបើគេចង់បានកន្លែងស្ងប់ស្ងាត់ រ៉ូមែនទិកបន្តិច គេគួរទៅកម្សាន្តនៅកោះរ៉ុងសន្លឹមក្បែរហ្នឹងដែរ។ ដារិទ្ធ បន្តថា គេអាចស្នាក់នៅលើកោះទាំងពីរនេះប៉ុន្មានថ្ងៃក៏បានដែរ គ្រាន់តែរក្សាកន្ទុយសំបុត្រទូកទុក និងមករង់ចាំទូកឡើងមកព្រះសីហនុវិញឲ្យទៀងពេលទៅគឺបានហើយ។

ទិដ្ឋភាពផ្សេងៗនៅកោះរ៉ុង

លោក ថែល វីរៈ គណនេយ្យករនៃក្រុមហ៊ុន កោះរ៉ុងដាយសិនធឺរ ដែលនាំភ្ញៀវទេសចរទៅកម្សាន្តតាមកោះ បានឲ្យដឹងថា អ្នកដំណើរទាំងឡាយអាចទៅកម្សាន្តកោះរ៉ុងនេះតាមទូក ដោយចេញដំណើរនៅម៉ោង៩ និងម៉ោង៣ ទៅដល់កោះរ៉ុងក្នុងរយៈពេលពីរម៉ោង តម្លៃ១៥ដុល្លារ ឬតាមកាណូតលឿន ចេញនៅម៉ោង៨ព្រឹក ម៉ោង១១ថ្ងៃ និងម៉ោង៣រសៀល ដោយចំណាយពេលតែ៤៥នាទីទៅដល់កោះនោះ ក្នុងតម្លៃ២០ដុល្លារ។

វីរៈ សង្កេតឃើញថា៖ “មួយរយៈក្រោយនេះ ភ្ញៀវទេសចរបានទៅលេងកោះច្រើន ជាពិសេសកោះរ៉ុង។ ថ្ងៃខ្លះ ទូកទាំងបីជើងគឺពេញទាំងអស់ ហើយមួយទូកមានអ្នកដំណើរដល់ទៅ១០០នាក់ឯណោះ ក្នុងនោះក៏មានភ្ញៀវខ្មែរដែរ"។

នាឱកាសបុណ្យចូលឆ្នាំខាងមុខ បុគ្គលិកក្រុមហ៊ុនដឹកភ្ញៀវទេសចរកម្សាន្តដដែល យល់ថា តម្លៃទូកធ្វើដំណើរនឹងមិនមានការប្រែប្រួលទេ ដូច្នេះភ្ញៀវខ្មែរដែលប៉ងទៅលេងកោះនេះកុំមានការព្រួយបារម្ភ៕