នៅ​ក្នុង​វិស័យ​ភាពយន្ត​ចិន ហុងកុង តួ​សម្ដែង​ល្បី​ៗ​អាច​រក​ចំណូល​បាន​ដល់​រាប់​លាន​ដុល្លារ​ពី​ការ​សម្ដែង​មួយ​រឿង​ៗ។ ប៉ុន្តែ​ក្រៅ​​ពី​ការងារ​សិល្បៈ ពួក​គេ​ក៏​អាច​រក​ចំណូល​បាន​ចំណូល​បាន​ច្រើន​សន្ធឹកសន្ធាប់​ដែរ​ ពី​មុខ​ជំនួញ​ផ្សេង​ៗ។ ដូច​ជា​តារា​ ៤រូប​ខាង​ក្រោម​នេះ គឺ​ត្រូវ​បាន​គេ​ស្គាល់​ថា​ជា​តារា​ជើង​ខ្លាំង​ខាង​មុខ​ជំនួញ រក​ស៊ី៖​

១. តារា​សម្ដែង​ចិន Zhao Wei

តារា​សម្ដែង​ Vicki Zhao ឬ Zhao Wei ដែល​ប្រិយមិត្ត​ស្គាល់​ច្រើន​តាម​រយៈ​ការ​សម្ដែង​តួ​ ព្រះនាង​ត្រចៀកកាំ មិន​ត្រឹម​តែ​ជា​តារា​សម្ដែង​ល្បី​ទេ តែ​ក៏​ជា​អ្នក​ដឹកនាំ​រឿង និង​អ្នក​ជំនួញ​ដ៏​ជោគជ័យ​មួយ​រូប​ដែរ។ កាល​ពី​ឆ្នាំ​២០១៣​នាង​បាន​ចាប់​ផ្ដើម​ដឹកនាំ​រឿង​ដំបូង គឺ​រឿង "So Young” ដែល​រឿង​នេះ​បាន​ក្លាយ​ជា​រឿង​រក​ចំណូល​បាន​ច្រើន​បំផុត​នៅ​ចិន​នៅ​ឆ្នាំ​នោះ។ ទ្រព្យ​សម្បត្តិ​សរុប​របស់​នាង​គឺ​ប្រមាណ ៤៦៤លាន​ដុល្លារ។ កាល​ពី​ខែ​ធ្នូ ឆ្នាំ​២០១៤ ត្រចៀកកាំ និង​ស្វាមី​របស់​នាង​គឺ​លោក Huang Youling បាន​ចំណាយ​ប្រាក់ ៤០០លាន​ដុល្លារ ដើម្បី​ក្លាយ​ជា​ម្ចាស់​ភាគហ៊ុន ៩,១៨ភាគរយ​នៃ​ក្រុមហ៊ុន Alibaba Pictures ដែល​ធ្វើ​ឲ្យ​នាង​ក្លាយ​ជា​ម្ចាស់​ភាគហ៊ុន​ធំ​ទី​ពីរ​ក្នុង​ក្រុមហ៊ុន​ផលិត​ភាពយន្ត​មួយ​នេះ។​

ក្រៅ​ពី​ការ​បណ្ដាក់​ទុន​ក្នុង​វិស័យ​ភាពយន្ត Zhao Wei ក៏​ជា​ម្ចាស់​ចម្ការ​ទំពាំងបាយជូរ​មួយ​ដែរ​នៅ​ប្រទេស​បារាំង និង​បាន​បណ្ដាក់​ទុន​ក្នុង​ទីផ្សារ​ភាគហ៊ុន​ផង​ដែរ។

២. តារា​សម្ដែង​ចិន Huang Xiaoming

តារា​សម្ដែង​តួ​ឯក​រឿង "រន្ទះ​ដាវ​ឥន្ទ្រី​ទេព" និង​ "បិសាច​ក្រមុំ​សក់ស" Huang Xiaoming ក៏​ជា​អ្នក​ជំនួញ​ឆ្នើម​មួយ​រូប​ដែរ។ កាល​ពី​ឆ្នាំ​២០០៨ គេ​និង​មិត្ត​ជិត​ស្និទ្ធ​ពីរ​បី​នាក់​ទៀត បាន​បណ្ដាក់​ទុន​ចំនួន ៧,៧សែន​ដុល្លារ​អាមេរិក ទិញ​ភាគហ៊ុន​ក្រុមហ៊ុន​ផលិត​ភាពយន្ត Huayi Brother។ ​ប្រមាណ ៣ឆ្នាំ​ក្រោយ​មក ទ្រព្យ​សម្បត្តិ​របស់​គេ​បាន​កើន​ឡើង​ដល់ ១៣លាន​ដុល្លារ។ ក្រោយ​មក​គេ​បាន​បណ្ដាក់​ទុន​​លើ​ផ្នែក​ផ្សេង​ៗ​ទៀត​ដូច​ជា ភោជនីយដ្ឋាន ស្រា និង​ទីលាន​វាយ​កូន​ហ្គោល។

៣. តារា​​ចម្រៀង និង​សម្ដែង​តៃវ៉ាន់ Jimmy Lin

តារា​ល្បី​តៃវ៉ាន់ Jimmy Lin ដែល​ជា​តួ​អង្គ "ណាចា" ក្នុង​រឿង "ស្ដេច​ស្វា​អូខុង" បាន​បើក​ស្ទូឌីយោ​ថត​រូប​ផ្ទាល់​ខ្លួន​ដំបូង ជាមួយ​មិត្តភ័ក្ដិ តាំង​ពី​ឆ្នាំ​១៩៩២ គឺ​នៅ​ពេល​អាយុ ១៨ឆ្នាំ។ ស្ទូឌីយោ​ថត​រូប​របស់​ពួក​គេ​បាន​ទទួល​ជោគជ័យ​ដោយ​បាន​ពង្រីក​សាខា​ចំនួន ៧កន្លែង​ខុស​ៗ​គ្នា។ មុខ​ជំនួញ​ផ្សេង​ៗ​ទៀត​របស់ Jimmy មាន​ដូច​ជា ក្រុមហ៊ុន​​ត្រួត​ពិនិត្យ​កម្មវិធី​កុំព្យូទ័រ ​វិបសាយ​លក់​ទំនិញ​អនឡាញ ភោជនីយដ្ឋាន ក្រុមហ៊ុន​ផ្ដល់​ប្រឹក្សា​ផ្នែក​កីឡា និង​ជា​ម្ចាស់​អចលនទ្រព្យ​ជា​ច្រើន​នៅ​តៃវ៉ាន់ សៀងហៃ និង​ប៉េកាំង។ ​

៤. តារា​សម្ដែង​តៃវ៉ាន់ Shu Qi

តារា​សម្ដែង Shu Qi ក៏​ជា​តារា​ជួរ​មុខ​មួយ​រូប​ដែរ​ក្នុង​វិស័យ​ភាពយន្ត​ចិន ហុងកុង និង​តៃវ៉ាន់ ហើយ​ក្រៅ​ពី​សិល្បៈ​នាង​និង​មិត្តភ័ក្ដិ​ពីរ​នាក់​ទៀត គឺ Pauline Lan និង Matilda Tao បាន​សហការ​គ្នា​បើក​ភោជនីយដ្ឋាន​ចំនួន ៥នៅ​តៃវ៉ាន់។ បន្ថែម​ពី​នេះ នាង​ក៏​បាន​បណ្ដាក់​ទុន​លើ​ភោជនីយដ្ឋាន​ជា​ច្រើន​ទៀត​ដែរ​នៅ​ទីក្រុង​ប៉េកាំង សៀងហៃ និង​ហុងកុង ៕

ចុចអាន៖លេច​តម្លៃ​ខ្លួន​តារា​​ស្រី​​ល្បី​ៗ​នៅ​ចិន ស៊ី​មួយ​រឿង​ៗ​រាប់​លាន​ដុល្លារ