កោះអាថ៌កំបាំង ជម្រកកុលសម្ព័ន្ធ ៦ម៉ឺនឆ្នាំ អ្នកណាហ៊ានចូលអាចស្លាប់

2015-04-23 17:36:41
ចំនួនមតិ 0 | ចំនួនចែករំលែក 0

ចន្លោះមិនឃើញ

វាហាក់ដូចជាកោះឋានសួគ៌មួយ ប៉ុន្តែប្រហែលជាមិនអាចទៅលេងកម្សាន្តបានទេ ព្រោះវាត្រូវបានគេចាត់ទុកថាជាកោះមួយដ៏អាថ៌កំបាំង។

កោះដែលមានឈ្មោះថា North Sentinel នេះ ស្ថិតនៅក្នុងមហាសមុទ្រឥណ្ឌា និងមានទំហំប្រហែល៨៧គីឡូម៉ែត្រការ៉េ។ កោះនេះ ជាជម្រកនៃកុលសម្ព័ន្ធ Sentinelese ដែលមានអាយុកាល៦ម៉ឺនឆ្នាំមកហើយ។

ក្រុមកុលសម្ព័ន្ធដែលជាអ្នកស្រុកដើមទាំងនោះ មិនពេញចិត្តឡើយចំពោះពិភពទំនើបខាងក្រៅនោះទេ ហើយពួកគេថែមទាំងបានសម្លាប់មនុស្ស២នាក់កាលពីឆ្នាំ២០០៦ផងដែរ ក្រោយពេលពួកគេទៅនេសាទនៅជិតកោះនោះ។ សូម្បីតែយន្តហោះ ឬឧទ្ធម្ភាគចក្រហោះកាត់ ក៏ពួកគេបញ្ចេញកាយវិការហិង្សាដែរ ដូចជាគប់ដុំថ្ម និងបាញ់ព្រួញជាដើម។ ដោយសារតែបែបនេះហើយ ទើបគ្មានអ្នកណាអាចថតរូបពួកគេបានច្បាស់នោះឡើយ។

ដោយសារតែបែបនេះហើយ ទើបអាជ្ញាធរឥណ្ឌាបានចាត់ទុកថាការប៉ុនប៉ងចូលទៅទាក់ទងនឹងក្រុមកុលសម្ព័ន្ធនោះ គឺជារឿងខុសច្បាប់ ពោលគឺមិនអាចទៅជិតតំបន់នោះក្នុងរយៈចម្ងាយ៣ម៉ាយល៍បាននោះទេ។ យ៉ាងណាក្ដី ក្រុមអង្គការតស៊ូមតិ Survival International ដែលការពារសិទ្ធិក្រុមកុលសម្ព័ន្ធ បានអះអាងថាមានអ្នកនេសាទចូលទៅតំបន់នោះជាប្រចាំ ហើយថែមទាំងមានអ្នកឡើងទៅដល់លើកោះថែមទៀតផង មុនពេលពួកគេត្រូវបានអាជ្ញាធរចាប់ខ្លួន។ អង្គការដដែលនេះ បានបង្ហាញការព្រួយបារម្ភថាវត្តមានអ្នកពីក្រៅ អាចធ្វើឲ្យក្រុមកុលសម្ព័ន្ធវ័យចំណាស់នោះរងការគម្រាមកំហែង៕