ពូកែលាក់វត្ថុខុសច្បាប់ ឥឡូវមានឧបករណ៍ស្គែនយន្តហោះទាំងមូលដំបូងបំផុត

2015-04-24 16:29:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន MB Telecom មានស្នាក់ការនៅប្រទេសរ៉ូម៉ានី បានធ្វើការបង្ហាញនូវឧបករណ៍ចល័តមួយដែលមានសមត្ថភាពស្គែនយន្តហោះទាំងមូលបានដើម្បីស្វែងរកនូវអាវុធ គ្រឿងផ្ទុះ ថ្នាំញៀនខុសច្បាប់ និងរបស់គេចពន្ធផ្សេងទៀតដែលលាក់នៅក្នុងយន្តហោះ។

Roboscan 2M Aeria គឺជាឧបករណ៍ស្គែនចល័តមួយដោយប្រើកាំរស្មី X ដំបូងគេបំផុតនៅក្នុងពិភពលោកដែលអាចស្គែនយន្តហោះទាំងមូលបានដើម្បីមើលនូវឧបករណ៍ខាងក្នុងបាន។ ប៉ុន្តែឧបករណ៍មួយនេះគឺមិនទាន់ទុកចិត្តបានមួយរយភាគរយនោះទេចំពោះផលប៉ះពាល់ទៅសុខភាពរបស់អ្នកដំណើរក្នុងយន្តហោះដោយវិទ្យុសកម្មដែលវាបានបញ្ចេញ។

តាមរបាយការណ៍ដោយគេហទំព័រ The Time បានឲ្យដឹងថា ឧបករណ៍នេះមានតម្លៃប្រហែលជា ៣,២ លានដុល្លារអាមេរិក ហើយវាគឺកំពុងតែត្រូវបានប្រើសម្រាប់ត្រួតពិនិត្យរថយន្តធំៗនៅព្រំដែន ភាគខាងកើតអឺរុបដែលជាកន្លែងរឹបអូសបានបារីខុសច្បាប់ចំនួន ៧៦ ពាន់កញ្ចប់។

នៅលើគេហទំព័ររបស់ខ្លួន MBT បាននិយាយថា Roboscan 2M Aeria គឺជាដំណោះស្រាយដំបូងបំផុតសម្រាប់ការតាមដានសុវត្ថិភាពរបស់យន្តហោះ។ វាអាចស្គែនពីយន្តហោះអាជីវកម្មខ្នាតតូចទៅខ្នាតមធ្យម។ ក្រុមហ៊ុនបានសម្គាល់ផងដែរថា ការស្គែនយន្តហោះទាំងមូលគឺចំណាយពេលប្រហែលជា ២០ នាទីតែប៉ុណ្ណោះ។

ដំណើរការរបស់វាដំបូងគឺប្រើរថយន្តកាម្ញុងបំពាក់ម៉ាស៊ីនកាំរស្មី X នៅផ្នែកខាងចុងនៃដងស្ទូចរបស់រថយន្ត ហើយយន្តហោះគឺត្រូវបានទាញទៅមុខបន្តិចម្ដងៗដោយម៉ាស៊ីនសម្រាប់ទាញយន្តហោះ ហើយកាំរស្មី X បានបាញ់ចេញក្រៅទៅលើយន្តហោះទាំងមូលដើម្បីស្គែនរបស់ដែលត្រូវបានលាក់នៅក្នុងយន្តហោះ។ បន្ទាប់មកអ្នកដែលប្រតិបត្តិការនៅក្នុងរថយន្ត អាចមើលរូបភាពផ្ទាល់នៅក្នុងម៉ាស៊ីនស្គែនដើម្បីតាមដានឧបករណ៍ខុសច្បាប់ដែលបានលាក់នៅក្នុងយន្តហោះនោះ។

បើទោះបីជា Roboscan អាចស្គែនយន្តហោះទាំងមូលក៏ដោយ ប៉ុន្តែអ្នកបញ្ជាយន្តហោះមិនអនុញ្ញាតឲ្យត្រួតពិនិត្យទៅលើតួរខ្លួន និងស្លាបរបស់យន្តហោះនោះទេ៕