តួ Iron Man ដើរចេញពីកម្មវិធីភ្លាមៗ ពេលអ្នកព័ត៌មានរំឭកពីរឿងញៀនថ្នាំ និងជាប់គុក

2015-04-24 16:51:11
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពូលតារាហូលីវូដ Robert Downey Jr បានដើរចេញពីកម្មវិធីទូរទស្សន៍ពាក់កណ្ដាលទី នៅពេលពិធីករសួរពាក់ព័ន្ធប្រវត្តិរបស់ខ្លួនពេលញៀនថ្នាំ និងជាប់ពន្ធនាគារ។

តារាសម្ដែងតួ "Iron Man” បានចូលផ្ដល់បទសម្ភាសន៍ដល់ប៉ុស្តិ៍ទូរទស្សន៍ Channel 4 នៅទីក្រុងឡុងដុង ប្រទេសអង់គ្លេស កាលពីថ្ងៃទី២២ ខែមេសា ដើម្បីផ្សព្វផ្សាយខ្សែភាពយន្តថ្មីរបស់ខ្លួនគឺរឿង "Avengers: Age of Ultron”។ ប៉ុន្មាននាទីដំបូងការសម្ភាសន៍ប្រព្រឹត្តទៅយ៉ាងរលូនតាមការគ្រោងទុក ដោយពិធីករបានសួរ តារាសម្ដែងអាមេរិករូបនេះ ពីបទពិសោធន៍ថ្មីៗរបស់គេក្នុងខ្សែភាពយន្តថ្មីមួយនេះ ដែលទើបតែចាប់ផ្ដើមបញ្ចាំងនៅទីក្រុងឡុងដុង កាលពីថ្ងៃអង្គារ។

ប៉ុន្តែតារាវ័យ ៥០ឆ្នាំរូបនេះ ចាប់ផ្ដើមបញ្ចេញអាកប្បកិរិយាមិនពេញចិត្តនៅពេល ពិធីករ Krishnan Guru-Murthy ចាប់ផ្ដើមសួរពីរឿងឯកជនរបស់គេ ជាពិសេសនៅពេលពិធីកររូបនេះបានសុំឲ្យគេបកស្រាយពាក្យសម្ដីកាលពី៥ឆ្នាំមុន ដែលគេនិយាយថា "បើអ្នកធ្លាប់គេងនៅបន្ទប់សណ្ឋាគារថ្លៃ២០០០ដុល្លារក្នុងមួយយប់ ហើយបែរជាទៅដេកក្នុងគុកវិញនោះ អ្នកមិនអាចចេញមកវិញហើយក្លាយជាមនុស្សសេរីនិយមបាននោះទេ"។

Downey Jr បានឆ្លើយដោយទើសទាល់ថា "បើចង់ឲ្យខ្ញុំនិយាយពីរឿងនេះយ៉ាងហោចណាស់ក៏ត្រូវចំណាយពេល ២ម៉ោងដែរ។ សូម្បីពាក្យ មនុស្សសេរីនិយម ក៏ខ្ញុំមិនដឹងថាគួរពន្យល់លោកយ៉ាងម៉េចដែរ"។

ប៉ុន្តែនៅពេលដែលពិធីករសួរដល់ទំនាក់ទំនងជាមួយឪពុករបស់ខ្លួន Downey Jr ក៏បានក្រោកចេញ និងនិយាយថា "សុំទោស ខ្ញុំពិតជាមិនអាច … តើយើងកំពុងធ្វើអ្វីពេលនេះ?”។ សូមទស្សនាវីដេអូខាងក្រោមនេះ៖

រំឮកពីអតីតកាលកាលពីចន្លោះឆ្នាំ ១៩៩៦ ដល់ឆ្នាំ២០០១ តារាសម្ដែង Downey Jr ត្រូវបានប៉ូលិសចាប់ខ្លួនជាច្រើនដង ដែលភាគច្រើនគឺពាក់ព័ន្ធករណីគ្រឿងញៀន។ នៅឆ្នាំ១៩៩៩ គេត្រូវបានកាត់ទោសឲ្យជាប់ពន្ធនាគារ ៣ឆ្នាំពីបទគេចវេះការធ្វើតេស្តគ្រឿងញៀនម្ដងហើយម្ដងទៀត។

នៅឆ្នាំ២០០១ គេត្រូវបានចាប់ខ្លួនម្ដងទៀត ដោយសារមានគ្រឿងញៀនជាប់នឹងខ្លួន ប៉ុន្តែក្រោយពីនោះមកគេក៏ឈប់ប្រឡូកនឹងរឿងមិនល្អតទៀត និងបានកសាងកេរ្តិ៍ឈ្មោះល្បីល្បាញក្នុងវិស័យភាពយន្តហូលីវូដ ជាពិសេសតាមរយៈរឿង “Iron Man” ទាំង ៤វគ្គ។ ទស្សនាវដ្ដីពាណិជ្ជកម្ម Forbes បានចុះផ្សាយថា ត្រឹមតែចន្លោះខែមិថុនា ឆ្នាំ២០១២ ដល់ខែមិថុនា ឆ្នាំ២០១៣ គេអាចរកបានជាង ៧៥លានដុល្លារ ៕

ចុចអាន៖វត្តមានក្រុមវីរបុរស Avengers ធ្វើឲ្យកក្រើកផ្សារទំនើបនៅឡុងដុង

ប្រែសម្រួល៖ វ៉ាន់ថន ប្រភព៖ dailymail