អាជ្ញាធរអប្សរានិយាយរឿង មកុដមាសបុរាណ ល្បីថាតម្លៃរាប់លានដុល្លារត្រូវគេលក់

2015-04-28 17:51:23
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរជាតិអប្សរា អះអាងថា មកុដមាសបុរាណមួយដែលត្រូវបានអ្នកលេងបណ្ដាញសង្គមចែកចាយព័ត៌មានព្រោងព្រាតថារកឃើញដោយកំណាយនៅប្រាសាទតាព្រហ្ម និងថាត្រូវបានគេលក់ដូរ គឺជាព័ត៌មានមិនពិត និងហៅព័ត៌មានជួញដូរនោះថា បង្ខូចកិត្តិយសទាំងស្ថាប័នជាតិ និងអន្តរជាតិ ដែលអភិរក្ស និងជួសជុលប្រសាទ។ នេះបើតាមទំព័រហ្វេសប៊ុកអាជ្ញាធរជាតិអប្សរាប៉ុន្មាននាទី មុននេះ។

ការប្រកាសនេះបានធ្វើឡើងចំពេលដែលព័ត៌មានលើបណ្ដាញសង្គមបានរីករាលដាលថា មកុដឬភ្នួងសក់បុរាណធ្វើពីមាសនេះ កំពុងស្ថិតក្នុងការលក់ដូរ ហើយក្រុមអ្នកបណ្ដាញសង្គមក៏បានរិះគន់មិនសំចៃទៅលើរឿងនេះ។ ការប្រកាសលើបណ្ដាញអ៊ីនធឺណេតនេះ បានធ្វើឡើងដោយភ្ជាប់ជាមួយរូបភាពប៉ុន្មានសន្លឹករបស់ មកុដ ដែលនៅលើរូបភាពបង្ហាញពីកាលបរិច្ឆេទថតថ្ងៃទី ២១មីនា២០១២។

ព័ត៌មានដែលកំពុងមានការជជែកលើបណ្ដាញហ្វេសប៊ុក

ប្រភពដដែលថា កាលខែមីនា២០១២ ស្ថាប័នឥណ្ឌា (ASI) ដែលកំពុង ធ្វើការអភិរក្ស ជួសជុល ប្រាសាទតាព្រហ្មដោយសហការជាមួយ អាជ្ញាធរជាតិអប្សរា បានធ្វើកំណាយស្រាវជ្រាវប្រទះឃើញ មកុដ ឬភ្នួងសក់ធ្វើពីមាស ដែលជាវត្ថុសិល្បៈមានតម្លៃដ៏កម្រនឹងជួបប្រទះ ក្នុងប្រវត្តិនៃសិល្បៈខ្មែរ។ ភ្លាមៗនោះស្ថាប័នឥណ្ឌានិងអាជ្ញាធរជាតិអប្សរា ក៏បានធ្វើការសិក្សា និងលាងសម្អាតតាម បច្ចេកទេសរបស់អ្នកអភិរក្សវត្ថុបុរាណក្រោមការ ដឹកនាំនិងចាត់ចែងផ្ទាល់របស់ ឯកឧត្តម អគ្គនាយក អាជ្ញាធរជាតិអប្សរា។ កន្លងមកអាជ្ញាធរក៏បានផ្សព្វផ្សាយពីព័ត៌មាននេះទៅសាធារណជនដែរ។

អាជ្ញាធរជាតិអប្សរាតាមរយៈទំព័រហ្វេសប៊ុកបន្ថែមថា៖ "អាជ្ញាជាតិអប្សរាសូមធ្វើការអះអាង បញ្ជាក់ជូនសាធារណជន មេត្តាជ្រាបថាបច្ចុប្បន្ននេះ វត្ថុដ៏មានតម្លៃនេះត្រូវបានរក្សាទុកនៅ កន្លែងមានសុវត្ថិភាព ស្របតាមគោលការណ៍នៃការអភិរក្សវត្ថុបុរាណ ដែលជាមរតករបស់មនុស្សជាតិទាំងមូល។ ដោយមិនមានការលក់ដូរដូចការចោទប្រកាន់ឡើយ។ ជាថ្មីម្ដងទៀត អាជ្ញាធរជាតិអប្សរាសូមអំពាវនាវ បញ្ឈប់នូវការផ្សាព្វផ្សាយព័ត៌មានមិនពិត ដែលនាំឲ្យប៉ះពាលដល់កិត្តិយស របស់ស្ថាបនជាតិនិងអន្តរជាតិ ដែលកំពុងបំពេញការងារអភិរក្ស ជួសជុលប្រាសាទក្នុងតំបន់អង្គរ”៕