ឆាយ បូរ៉ា ស្នើលុបបំបាត់ការផលិត DVD ក្លែងក្លាយ ដើម្បីការពារកម្មសិទ្ធិបញ្ញា

2015-04-28 20:58:36
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ឆាយ បូរ៉ា ផលិតករ និងជាប្រធានសមាគមភាពយន្តកម្ពុជា ស្នើឲ្យគ្រប់មជ្ឈដ្ឋានចូលរួមលុបបំបាត់ការផលិត VCD និង DVD ក្លែងក្លាយដើម្បីលើកកម្ពស់ ក៏ដូចជាការងារកម្មសិទ្ធិបញ្ញារបស់អ្នកនិពន្ធ ឬផលិតករ។

លោកថ្លែងដូច្នេះ នៅក្នុងសិក្ខាសាលាមួយស្ដីពីការការពារកម្មសិទ្ធិបញ្ញារៀបចំដោយស្ថានទូតអាមេរិកប្រចាំកម្ពុជាសហការជាមួយ Westec Media Limited និងសមាគម Motion Picture Associationនៃកម្ពុជា។

គ្រានោះ ឆាយ បូរ៉ា ដែលជាប្រធានសមាគមកុនខ្មែរ (Motion Picture Association of Cambodia)និងជាចាងហ្វាងផលិតកម្មដើមត្នោត បានលើកឡើងជាច្រើនទាក់ទងនឹងកម្មសិទ្ធិបញ្ញា ពិសេសពីការរួមគ្នាបំបាត់ការផលិត DVD ក្លែងក្លាយនៅកម្ពុជា។ ពីរចំណុចសំខាន់ៗ ដែលផលិតកររូបនេះ បានលើកឡើង គឺលោកទទូចឲ្យប្រជាពលរដ្ឋចូលរួមគាំទ្រស្តាប់ និងទស្សនា DVD Original។

បន្ថែមពីលើនេះ អ្នកផលិតរឿង ”3.5” ដែលទើបទទួលបានភ្លើងខៀវវិញពីក្រសួងវប្បធម៌មានប្រសាសន៍ថា ក្នុងនាមលោកជាអ្នកផលិតកុនខ្មែរ លោកក៏មានចិត្តសប្បាយរីករាយណាស់ដែលមានរោងភាពយន្តលំដាប់អន្តរជាតិដូចជារោងភាពយន្ត លេជិន ផ្លាទីនៀម និងស៊ីនីផ្លិចនៅកម្ពុជា។

"បើនៅក្នុងកម្ពុជាមិនមានទីកន្លែងសម្រាប់បញ្ចាំងរឿងរបស់ខ្លួនទេ ឧស្សាហកម្មនេះ ក៏នឹងមិនរីកចម្រើនដែរ។ ដូចនេះយើងមានគោលការណ៍របស់យើងមួយដើម្បីការពារផលប្រយោជន៍ឲ្យរោងភាពយន្តដែលទទួលសិទ្ធិផ្តាច់មុខពីប្រទេសផ្សេងៗជាពិសេស Studio មកពីហូលីវូដ ដើម្បីឲ្យគ្រប់គ្នាអាចរកទទួលទានបាន និងពង្រីកវិស័យភាពយន្តតទៅទៀត"។ ឆាយ បូរ៉ា បន្ថែម។

ពាក់ព័ន្ធនឹងចំនុចនេះប្រធានសមាគមខ្មែរនៅកម្ពុជាលោក ឆាយ បូរ៉ា បានបន្តទៀតថាកត្តាទាំងពីរនេះមានការទាក់ទងគ្នារវាងផលិតករនៅក្នុងស្រុក និងរោងភាពយន្តដែលទាមទារឲ្យអ្នកផលិតចូល រួមនៅក្នុងសមាគមដើម្បីតាក់តែងយុទ្ធសាស្ត្រមួយចំនួនក្នុងការទប់ស្កាត់ និងផលិតDVD ក្លែងក្លាយ។

ជាថ្មីម្ដងទៀត លោកបានសង្កត់ដោយស្នើឲ្យប្រជាពលរដ្ឋទាំងអស់គ្នាចូលរួមគាំទ្រការផលិតនូវស្នាដៃរបស់ផលិតករខ្មែរចៀសវាងការទិញនូវ DVD ក្លែងក្លាយ និងបង្កើតឲ្យមានផ្នែកជាច្រើនដើម្បីចូលរួមតាមដានមិនមែនគ្រាន់តែបំបាត់ DVD ក្លែងក្លាយទាំងមូលនៅកម្ពុជាប៉ុណ្ណោះទេ។

ជាចុងក្រោយប្រធានសមាគមខ្មែរ លោក ឆាយ បូរ៉ា បានលើកទឹកចិត្ត និងស្នើសុំឲ្យអ្នកលក់ DVDមានការចូលរួមលក់នូវ DVD original ដើម្បីជួយលើកតម្កើងនូវស្នាដៃរបស់ម្ចាស់ដើមហើយក៏ដើម្បីរក្សានូវកម្មសិទ្ធិបញ្ញាអ្នកដែលបានផលិត ដើម្បីឲ្យវិស័យភាពយន្តនៅកម្ពុជាមានការរីកចម្រើននិងមានគេទទួលស្គាល់៕

អត្ថបទ៖ ថា ម៉ាលីដា