Real Madrid ចេញមកបដិសេធរឿង FIFA ពិន័យមិនឱ្យទិញកីឡាករ

2015-04-30 18:59:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិប Real Madrid ចេញមកបដិសេធចំពោះព័ត៌មានដែលថាសហព័ន្ធកីឡាបាល់ទាត់អន្តរជាតិ FIFA នឹងពិន័យពួកគេមិនឱ្យទិញកីឡាករថ្មីចូល១ឆ្នាំ ពីបទបន្លំទិញកីឡាករវ័យក្មេងកាលពីខែមករានេះ។

កាលពីម្សិលមិញនេះ មានព័ត៌មានជាច្រើនបានចុះផ្សាយថា ក្លិបយក្សនៅអេស្ប៉ាញពីរគឺ Real Madrid និង Atletico Madrid អាចនឹងរងពិន័យពីខាង FIFA មិនឱ្យទិញកីឡាករចូលរយៈពេល១ឆ្នាំដូចក្រុម Barcelona ដែរ ព្រោះសហព័ន្ធមួយនេះរកឃើញថា ក្រុមទាំងពីរបន្លំឯកសារទិញដូរកីឡាករវ័យក្មេង។

ឆ្លើយតបដំណឹងនេះ ខាងក្លិប Real Madrid បានចេញមកបដិសេធទាំងស្រុង ហើយថែមទាំងនិយាយទៀតថាដំណឹងនោះមិនពិតនោះទេ ព្រោះពួកគេមិនបានធ្វើអ្វីខុសឡើយ កាលពីរដូវកាលដោះដូរកីឡាករបើកនៅខែមករា។ "Real Madrid មិនបានរំលោភច្បាប់ដែលខាង FIFA បានចុះនោះទេ ដូចដែលក្លិបបានពន្យល់កាលពីថ្ងៃទី២៦ ខែមករាកន្លងទៅនេះអីចឹង។ Real Madrid មុនទិញដូរកីឡាករម្ដង ៗ សុទ្ធតែត្រូវឆ្លងកាត់ Spanish Football Federation ជាមុន ដើម្បីប្រាកដថា អ្វីគ្រប់យ៉ាងស្របទៅតាមក្រិតក្រមដែលបានចែង។ ដូច្នេះ គ្មានអ្វីដែល Real ធ្វើខុសនោះទេ”។ ក្លិបអធិរាជសបានសរសេរលើបណ្ដាញសង្គមរបស់គេ។

Martin Odegaard

គូសបញ្ជាក់ថា រឿងរ៉ាវខាងលើនេះធ្លាប់បានកើតមានម្ដងមកហើយ កាលពីខែមករាកន្លងទៅ។ កាលនោះ Real Madrid ត្រូវបានចោទប្រកាន់ថាទិញកីឡាករវ័យក្មេងចូលក្រុមខុសច្បាប់ ប៉ុន្តែដោយមានឯកសារត្រឹមត្រូវមកអះអាងនិងតវ៉ា ទើបរួចខ្លួនទៅ។ ខណៈដែលពេលនេះ ខាង FIFA បានធ្វើការចោទប្រកាន់ជាថ្មីទៀត ថាក្រុមយក្សមួយនេះ បន្លំឯកសារទិញដូរកីឡាករ៤នាក់គឺ Martin Odegaard , Marco Asensio , Lucas Silva និង Danilo ។

Lucas Silva

Danilo

FIFA មានច្បាប់មួយចែងថា ក្លិបបាល់ទាត់នៅអឺរ៉ុបទាំងអស់អាចដោះដូរកីឡាករបានគ្រប់វ័យ ប្រសិនបើពួកគេមានសញ្ជាតិក្នុងប្រទេសនៅអឺរ៉ុប ប៉ុន្តែប្រសិនបើធ្វើការទិញកីឡាករក្រៅចូល ទាល់តែមានអាយុចាប់ពី១៨ឆ្នាំឡើងទៅ។ ករណីពិសេស ក្លិបអាចទិញកីឡាករក្រោមអាយុ១៨ឆ្នាំចូលបានលុះត្រាតែឱ្យកីឡាករនោះ ចូលសញ្ជាតិនៅប្រទេសនោះឬផ្លាស់ទីលំនៅតែម្ដង ៕

ចុចអាន៖Barcelona មិនអាចទិញកីឡាករបានទេឆ្នាំ២០១៥

ប្រែសម្រួល៖ មុន្នី រម្យ ប្រភព៖ dailymail