ឈុតនេះ នាំឲ្យ "បងទុំ អូនទាវ ២០១៥" របស់ Rock ជួបភាពស្រពេចស្រពិល

2015-05-05 16:45:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្នាតធំរបស់ផលិតកម្ម Rock រឿង “បងទុំ អូនទាវ ២០១៥" ជួបភាពរឿងស្រពិចស្រពិលសម្រាប់ថ្ងៃដាក់បញ្ចាំង ក្រោយក្រុមផលិតបានកំណត់ថ្ងៃបញ្ចាំងជាមុនថា នឹងបញ្ចាំងថ្ងៃទី ២១ ឧសភា ខាងមុខនេះ តែក្រសួងវប្បធម៌នៅមិនទាន់យល់ស្របលើឈុតមួយចំនួននៅឡើយ។ នេះបើតាមព័ត៌មានធ្លាយចេញមក។

ប្រភពម្នាក់បានបង្ហើបថា ក្រសួងមិនទាន់ឯកភាពលើពីរចំណុចសំខាន់ៗ ទី១ចំណងជើងដែល ស្រដៀងគ្នានឹងរឿង "ទុំទាវ" ដែលក្រសួងបារម្ភថា ខ្លាចប៉ះពាល់ដល់រឿងពីបុរាណមួយនេះ។ ទី២ ក្រសួងមិនទាន់ឯកភាពត្រង់ឈុត ព្រះសង្ឃរងសិល្ប៍របស់ខ្មោចហើយខ្ទាតទៅទើរលើគុម្ពឫស្សី។

ឈុតព្រះសង្ឃរងវិជ្ជាសិល្ប៍ខ្មោចស្រី ខ្ទាតទៅលើដើមឬស្សី ដែលជាឈុតក្នុងរឿង "បងទុំ អូនទាវ ២០១៥"

ពាក់ព័ន្ធនឹងបញ្ហាខាងលើនេះ លោក យឹម សុសត្យា ប្រធានគ្រប់គ្រងការផលិតរបស់ Rock បានទទួលស្គាល់ ប៉ុន្តែលោកថា ១ចំណុចក្នុងចំណោមពីរ ត្រូវបានក្រសួងអនុញ្ញាតហើយ។ ដោយឡែកចំណុចមួយទៀតដែលមិនទាន់ឯកភាពគ្នានោះ គឺត្រង់ឈុតតតាំងគ្នារវាងព្រះសង្ឃ និងខ្មោចស្រីសម្ដែងដោយ តូតា។ឈុតនេះ តាមសាច់រឿង ព្រះសង្ឃបានខ្ទាតទៅទើរលើគុម្ពឬស្សី ក្រោយរងវិជ្ជាសិល្ប៍របស់ខ្មោចស្រី។

ត្រង់ឈុតនេះ ប្រធានគ្រប់គ្រងរូបនេះ បញ្ជាក់ថា ក្រសួងកំពុងត្រួតពិនិត្យយ៉ាងល្អិតល្អន់ ដោយសារថា ព្រះសង្ឃមិនអាចចាញ់ខ្មោចព្រាយបិសាចនោះឡើយ។

ដោយសារតែបែបនេះហើយ ទើបលោកថ្លែងថា ភាពយន្តបែបកំប្លែងសើចសប្បាយរឿង "បងទុំ អូនទាវ ២០១៥" របស់លោក ទំនងមិនអាចដាក់បញ្ចាំងទាន់តាមកាលបរិច្ឆេទខាងលើឡើយ។ ទោះយ៉ាងនេះក្ដី អ្នកគ្រប់គ្រងរូបនេះប្រាប់ទៀតថា នាយកដ្ឋានភាពយន្តបានអនុញ្ញាតហើយ នៅតែខាងក្រសួងក្រសួងប៉ុណ្ណោះ។ លោកថា លោកនៅតែមានក្ដីសង្ឃឹមថា អ្វីៗនឹងអាចរកចំណុចរួមគ្នាបាន។

ពាក់ព័ន្ធនឹងបញ្ហាខាងលើនេះ ភាគីខាងក្រសួង មិនទាន់អាចសុំការអធិប្បាយបាននៅឡើយ។ នៅមុនការបញ្ចេញឲ្យដឹងពីរឿង "បងទុំ អូនទាវ" មានរូបភាពស្ដីពីព្រះសង្ឃពីរបីអង្គគង់លើដើមឬស្សី ដោយធ្វើឲ្យមានការភ្ញាក់ផ្អើលនៅលើបណ្ដាញសង្គម។ រូបភាពទាំងនោះ តាមលោក យឹម សុសត្យា ទាំងនោះគឺជារូបភាពរបស់សាច់រឿង "បងទុំ អូនទាវ ២០១៥" របស់លោកនេះហើយ។

“មិនត្រឹមនៅយើងទេ ផ្អើលដល់ថៃទៀត សារព័ត៌មានថៃបានចុះផ្សាយ ដោយពួកគេថា ជារឿងកម្រឃើញ និងមិនបានដឹងថា ជាឈុតក្នុងរឿងយើងទេ(សើច)"។

“បងទុំ អូនទាវ ២០១៥" ជាភាពយន្តបែបកំប្លែង ចូលរួមសម្ដែងដោយ នាយក្រូច តូតា នាយ តេឡេ នាង អ៊ីត និងតារាជាច្រើនទៀត។ ចំពោះសាច់រឿងយ៉ាងណានោះ លោក យឹម សុសត្យា មិនទាន់បញ្ចេញនាពេលនេះទេ រង់ចាំដល់ថ្ងៃបញ្ចាំង ក្នុងនោះលោកសង្ឃឹមថា ភាពយន្តរបស់លោក នឹងបានចេញបញ្ចាំងនាពេលដ៏ខ្លីខាងមុខ៕

អត្ថបទ៖ ទារិកា

រូបភាព៖ ផ្ដល់ដោយ Rock