មើលពីជីវិតតស៊ូរបស់ជយលាភីកំពូលតារាបង្ហាញម៉ូដកម្ពុជា ចាន់ គង់ការ

2015-05-05 19:59:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបានជាប់ជយលាភីលេខ១នៅក្នុងកម្មវិធី កំពូលតារាបង្ហាញម៉ូដនៅកម្ពុជារួចមក គង់ការ ក៏បានកែប្រែជីវិតថ្មីមួយដែលទៅណាមកណាមានគេស្គាល់និងទទួលបានការថតស៉្បតជាច្រើនផងដែរ។

យ៉ាងណាមិញតើជីវិតមុនពេលចូលសិល្បៈនេះរូបនាងធ្លាប់បានឆ្លងកាត់នូវរឿងរ៉ាវសប្បាយរីករាយនិងជូរចត់មួយចំនួន។ ស្ដាប់ការរៀបរាប់របស់ ចាន់ គង់ការ តាមរយៈគេហទំព័រ Sabayទាំងអស់គ្នា។

ជីវិតមុនពេលមកភ្នំពេញ

ដោយសារតែជីវភាពមានភាពខ្វះខាតស្រូវស្រែក៏មិនទទួលបានផលឪពុកម្តាយរបស់ គង់ការ បានត្រូវបង្ខំចិត្តទៅធ្វើការនៅប្រទេសថៃដោយគ្រាន់តែទុកប្រាក់បន្តិចបន្តួចប៉ុណ្ណោះដើម្បីដោះស្រាយជីវភាពគ្រួសារ។

"បងអើយ...ពេលនោះជីវភាពខ្ញុំមានភាពលំបាកខ្លាំងពេកទើបធ្វើឲ្យម៉ែពុកខ្ញុំសម្រេចចិត្តទៅធ្វើការនៅថៃ ហើយពេលនោះខ្ញុំអាយុបាន១៥ឆ្នាំដែរនិងនៅសល់តែបងប្អូនតូច៤នាក់ម៉ង់ៗមិនដឹងថាត្រូវចាប់អីធ្វើអីនោះទេ ខណៈគាត់បានទុកលុយឲ្យតែ២០ម៉ឺនរៀលប៉ុណ្ណោះដើម្បីដោះស្រាយជីវភាពប្រចាំថ្ងៃ"។ គង់ការ ប្រាប់ទាំងអួលដើមក៖

២០ម៉ឺនរៀលមិនអាចដោះស្រាយជីវភាពបានរយៈពេលយូរនោះទេ។ គង់ការ ថ្លែងថា "លុយ២០ម៉ឺនរៀលចេះតែអស់ទៅពីមួយថ្ងៃទៅមួយថ្ងៃ។ ចុងក្រោយ ខ្ញុំក៏បានសម្រេចចិត្តរកការងារធ្វើតិចតួចដើម្បីបន្តរាប់រងជីវភាព"។

គង់ការ បានទៅដាក់ពាក្យនៅអង្គការមួយដែលគេបានជ្រើសរើសកុមារណាដែលមានជីវភាពក្រីក្រលំបាក។ ជាលទ្ធផល នាង និងបងស្រីក៏បានជាប់ទៅនៅអង្គការមួយនោះ ដោយឡែកប្អូនតូចៗរបស់នាង ត្រូវបានមីងដែលនៅជិតផ្ទះយកទៅនៅជាមួយប៉ុន្តែមិនបានរៀនសូត្រអីទេ។

ក្នុងការស្នាក់នៅនិងរៀនសូត្រនៅអង្គការបានជិត៣ឆ្នាំ គង់ការ បានបញ្ចប់សញ្ញាបត្រមធ្យមសិក្សាទុតិយភូមិនៅក្នុងអង្គការ។ បន្ទាប់ពីនោះភ្លាមៗ គង់ការ មិនទាន់បានបន្តនៅមហាវិទ្យាល័យនោះទេក៏ព្រោះតែប្អូនៗមិនបានរៀនសូត្រ។ ដូច្នេះរូបនាងបានសម្រេចចិត្តថា រៀនជំនាញវិញដើម្បីឆាប់មានការងារធ្វើ និងបានប្រាក់ឲ្យប្អូនៗបានចូលរៀនសូត្រនឹងគេ។

ដោយសារតែសព្វថ្ងៃវិស័យទីផ្សារនិងសណ្ឋាគារមានភាពរីកចម្រើន គង់ការ ក៏បានសម្រេចរៀនជំនាញខាងផ្នែកសណ្ឋាគារនៅខេត្តសៀមរាបបានរយៈពេលជិត១ឆ្នាំ ហើយក្រោយមកក៏បានបន្តមកធ្វើការនៅទីក្រុងភ្នំពេញវិញ។

ជីវិតពេលនៅភ្នំពេញ

បន្ទាប់ពីបានបញ្ចប់ការរៀនជំនាញនៅខេត្តសៀមរាបរួចមក ម្ចាស់ជយលាភីកំពូលតារាបង្ហាញម៉ូដរូបនេះក៏បានបន្តដំណើរជីវិតមកដល់ទីក្រុងលើកដំបូងដែលចម្រុះទៅដោយភ្លើងពណ៌ហើយក៏ជាទីកន្លែងដែលមានប្រកួតប្រជែងគ្នានិងថ្មីសម្រាប់រូបនាងផងដែរ។

(រូបថត៖ ផ្ដល់ដោយ គង់ការ)

"បើទោះជាអ្វីៗវាមានមានភាពថ្មីសម្រាប់ខ្ញុំក៏ដោយក៏ខ្ញុំមិនចុះចាញ់នោះទេ ខ្ញុំបានទៅដាក់ពាក្យសុំធ្វើការនៅសណ្ឋាគារមួយដើម្បីធ្វើការយកលុយចិញ្ចឹមគ្រួសារ តែពេលនោះ ខ្ញុំទទួលបានប្រាក់ខែតិចតួចប៉ុណ្ណោះ ព្រោះយើងពុំទាន់មានបទពិសោធន៍"។

ការងារមិនអាចនៅតែមួយកន្លែងនោះទេ តារាបង្ហាញម៉ូដកំពូលនៅកម្ពុជាចាន់ គង់ការ បានស្វែងរកការងារជាច្រើនដើម្បីទទួលបានប្រាក់ចំណូលបន្ថែម និងទទួលបានចំណេះដឹងថ្មីៗ។ ក្រោយមកនាងក៏បានការងារថ្មីដែលមានមុខតំណែងខ្ពស់ជាងមុននៅតាមសណ្ឋាគារមួយចំនួនដូចជា សណ្ឋាគារសូហ្វីតែលភ្នំពេញភូគីត្រា តួនាទី Front Desk Agent ណាហ្គាវើល តួនាទីជា Sales Consultant និងកាំបូឌីយ៉ាណាជាដើម មុខតំណែងជា Sales and Marketing Executive ។

សព្វថ្ងៃនេះ ចាន់ គង់ការ ក៏បានធ្វើការនៅក្រុមហ៊ុនឡាន Porsche ខាងអ្នកប្រតិបត្តិផ្នែកលក់ផងដែរ។ គង់ការ ថ្លែងថា នាង ពិតជានឹកស្មានមិនដល់ឡើយថាពីការប្រែប្រួលជីវភាព ដែលកាលពីប៉ុន្មានឆ្នាំមុន និងពេលនេះ។ "ខ្ញុំមិននឹកស្មានថាមានថ្ងៃនេះ និងមិនចង់ជឿទាល់តែសោះ"។

ជីវិតកំឡុងពេលប្រលង និងក្រោយពេលជាប់ក្នុងកម្មវិធី តារាបង្ហាញម៉ូដនៅកម្ពុជា

ដោយសារមានចិត្តស្រលាញ់សិល្បៈជាពិសេសខាងការបង្ហាញម៉ូដកញ្ញាតែងតែតាមដានកម្មវិធីបង្ហាញម៉ូដរបស់អាមេរិកនានាជាប់ និងខិតខំមើលថាតើគេធ្វើអ្វីខ្លះហើយ គង់ការ បានប្ដេជ្ញាថា បើមានកម្មវិធីនោះមកដល់ស្រុកខ្មែររូបនាងនឹងដាក់ពាក្យប្រលងឲ្យទាល់តែបាន។

អ្វីដែលការគិតទុកជាមុនរបស់ គង់ការ ពិតជាមិនធ្វើឲ្យរូបនាងខកចិត្តនោះទេ ព្រោះកម្មវិធីនោះពិតជាមកដល់ស្រុកខ្មែរ។ នាងក៏បានដាក់ពាក្យចូលរួមប្រកួត រហូតបានជាប់ជយលាភីជាកំពូលតារាបង្ហាញម៉ូដនៅកម្ពុជាទៀតផង។

ក្រោយពីបានទទួលបានចំណាត់លេខ១ក្នុងកម្មវិធីកំពូលតារាបង្ហាញម៉ូដកម្ពុជា Cambodia's Next Top Modelរួចមក គង់ការ គឺមានការរវល់ខ្លាំងនឹងការងារសិល្បៈផងនិងការងារពេញម៉ោងនៅក្រុមហ៊ុនឡាន Porsche ក៏មានការរវល់ផងដែរ។

ចាន់ គង់ការ ក្នុងម៉ោងបំពេញការងារ(រូបថត៖ ផ្ដល់ដោយ គង់ការ)

ត្រលប់ក្រោយបន្តិចវិញ កំឡុងពេលដែលរូបនាងប្រលងនៅក្នុងកម្មវិធី Cambodia's Next Top Modelនាងក៏បានសុំគេព្យួរការងារ។ គង់ការ ថ្លែងដោយអរគុណជាអនេក ចំពោះក្រុមហ៊ុនរបស់នាង ដែលមានការយោគយល់ និងថែមទាំងជួយជំរុញលើកទឹកចិត្តជាខ្លាំងទៀត។

ចាន់ គង់ការ មានអាយុ ២៣ឆ្នាំ ជាកូនទី២ក្នុងចំណោមបងប្អូន៥នាក់ ហើយនាងគឺជាអ្នកមកពីខេត្តបន្ទាយមានជ័យ។ ក្រោយជាប់ជយលាភី គង់ការ បានថតឲ្យ SOVRIN Magazine, Fashion Lab Magazine, Ladies magazine and Asia Life Magazine ជាដើម។ ក្រៅពីនេះ នាងក៏ធ្លាប់បានដើរម៉ូដឲ្យ Coca-cola និងធ្វើការពេញម៉ោងនៅក្រុមហ៊ុនឡាន Porsche ក្នុងមុខតំណែងជា អ្នកប្រតិបត្តិផ្នែកលក់៕

អត្ថបទ៖ ថា ម៉ាលីដា