Ronaldo បរិច្ចាគប្រាក់ជិត៨លានដុល្លារដល់ប្រជាជនរងគ្រោះដោយរញ្ជួយដីនៅនេប៉ាល់

2015-05-07 16:48:01
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ Cristiano Ronaldo បានបរិច្ចាគប្រាក់៧លានអឺរ៉ូ (៧,៩លានដុល្លារអាមេរិក) ជួយដល់ប្រជាជនរងគ្រោះដោយសារគ្រោះរញ្ជួយដីក្នុងប្រទេសនេប៉ាល់។ នេះបើតាមកាសែតនៅប្រទេសព័រទុយហ្គាល់បានចុះផ្សាយ។

កាលពីថ្ងៃទី២៥ ខែមេសាកន្លងទៅនេះ គ្រោះរញ្ជួយដីកម្រិត ៧,៨រ៉ិចទ័របានកើតឡើងក្នុងប្រទេសនេប៉ាល់ ដែលបានសម្លាប់មនុស្សច្រើនជាង ៧ ៥០០នាក់ និងបំផ្លាញទ្រព្យសម្បត្តិជាច្រើន។ បន្ទាប់ពីមានរឿងដ៏សោកសៅនេះកើតឡើង តារាល្បីៗមួយចំនួនបាននាំគ្នាបរិច្ចាគប្រាក់ផ្ទាល់ខ្លួនរបស់ពួកគេដើម្បីជួយដល់ប្រជាជនដែលកំពុងតែត្រូវការជំនួយជាចាំបាច់ ដែលក្នុងនោះក៏មានឈ្មោះខ្សែប្រយុទ្ធ Cristiano Ronaldo ម្នាក់ផងដែរ។

បើយោងទៅតាមកាសែត noticiasaominuto របស់ប្រទេសព័រទុយហ្គាល់បានចុះផ្សាយកាលពីម្សិលមិញនេះ កីឡាករវ័យ៣០ឆ្នាំខាងលើបានផ្ដល់ជំនួយជាសាច់ប្រាក់ចំនួន៧លានអឺរ៉ូ ដើម្បីជួយដល់ប្រជាជនដែលកំពុងខ្វះខាតទាំងស្បៀងអាហារ និងកន្លែងស្នាក់នៅ។

នេះមិនមែនជាលើកដំបូងឡើយ ដែលអតីតកីឡាករ Manchester United រូបនេះបានបរិច្ចាគប្រាក់ជួយប្រជាជនរងគ្រោះ ពោលគឺកាលពីឆ្នាំមុនរូបគេក៏បានបរិច្ចាគប្រាក់១,៥លានអឺរ៉ូផងដែរដើម្បីជួយក្មេងៗនៅតំបន់កាហ្សា។ គ្រានោះដែរ កំលោះកូនមួយរូបនេះក៏បានផ្ដល់ស្បែកជើងមួយគូដល់ម្ដាយកុមារម្នាក់ដែលគ្មានស្បែកជើងពាក់ និងអាវ Real Madrid ដើម្បីទុកដណ្ដប់ឱ្យកូនកំពុងដេកឈឺនៅលើទ្រូងអ្នកម្ដាយម្នាក់នោះផងដែរ៕

ចុចអាន៖ Messi ស៊ុត២ Assist ១ ជួយ Barca សងសឹកបានសម្រេចឈ្នះ Bayern ៣-០

ប្រែសម្រួល៖ មុន្នី រម្យ ប្រភព៖ livesoccertv