មហាសេដ្ឋីចិនកក់សណ្ឋាគារ ១៤០នៅប៉ារីសឲ្យបុគ្គលិកដើរលេងចំណាយអស់រាប់លានដុល្លារ
- 2015-05-10 18:04:40
- ចំនួនមតិ 0 | ចំនួនចែករំលែក 0
មហាសេដ្ឋីចិនកក់សណ្ឋាគារ ១៤០នៅប៉ារីសឲ្យបុគ្គលិកដើរលេងចំណាយអស់រាប់លានដុល្លារ
ចន្លោះមិនឃើញ
មហាសេដ្ឋីចិនម្នាក់ បានចំណាយប្រាក់រាប់លានដុល្លារនាំបុគ្គលិក ៦៤០០នាក់ ដើរលេងកម្សាន្តនៅទីក្រុងប៉ារីសប្រទេសបារាំង។ ដំណើរកម្សាន្តនេះ ធ្វើឡើងដើម្បីអបអរខួប ២០ឆ្នាំនៃភាពជាដៃគូរវាងក្រុមហ៊ុនចិន និងប្រទេសបារាំង ដែលត្រូវចំណាយប្រាក់ដល់ទៅ ១៣លានដុល្លារ។
ដំណើរកម្សាន្តដ៏កក្រើកនេះ មានរយៈពេល ៤ថ្ងៃ និងជ្រើសរើសបុគ្គលិកតែពាក់កណ្ដាលឲ្យចូលរួមប៉ុណ្ណោះ។ ប្រធានក្រុមហ៊ុន Tiens Group លោក Li Jinyuan បានកក់សណ្ឋាគារ ១៤០កន្លែង នៅទីក្រុងប៉ារីស ដើម្បីឲ្យបុគ្គលិកខ្លួនបានដើរលេងកម្សាន្តនៅសារមន្ទីរ Louvre និងតំបន់ប្រវត្តិសាស្ត្រផ្សេងទៀត។
បន្ទាប់មក បុគ្គលិកទាំងនោះបានបន្តដំណើរទៅតំបន់ឆ្នេរ Cote D'Azur ដែលមហាសេដ្ឋី Jinyuan បានកក់សណ្ឋាគារលំដាប់ផ្កាយ៤ និងផ្កាយ៥ ៧៩កន្លែង ស្មើនឹង ៤៧៦០បន្ទប់ទៀត នៅទីក្រុង Cannes និង Monaco។
ដើម្បីដឹកជញ្ជូនបុគ្គលិក ៦៤០០នាក់ពីសណ្ឋាគារទៅតំបន់ឆ្នេរទីក្រុង Nice គេត្រូវការឡានក្រុង ១៤៧គ្រឿង។ ក្នុងព្រឹត្តិការណ៍ដ៏គួរឲ្យភ្ញាក់ផ្អើលនោះ ស្ថាប័ន Guinness បានប្រកាសផ្ដល់កំណត់ត្រាក្រុមមនុស្សប្រទាក់ក្រឡាគ្នាច្រើនបំផុតលើលោក ទៅឲ្យក្រុមហ៊ុន Tiens Group។
លោក Li Jinyuan ជាមហាសេដ្ឋីម្នាក់នៅក្នុងបញ្ជីទស្សនាវដ្ដី Forbes និងជាស្ថាបនិកក្រុមហ៊ុន Tiens Group ដែលបង្កើតឡើងតាំងពីឆ្នាំ១៩៩៥។ ក្រុមហ៊ុននេះ មានជំនួញច្រើនប្រភេទទៅលើ ជីវបច្ចេកវិទ្យា វិស័យសុខាភិបាល បច្ចេកវិទ្យា វិស័យទេសចរណ៍ និងសណ្ឋាគារ...៕
ចុចអាន៖ មហាសេដ្ឋីអ៊ីរ៉ង់ថ្មីចូលចិត្តបង្អួតពីជីវិតរស់នៅមិនចាញ់ Dan Bilzerian
ប្រែសម្រួល៖ គង់ វិសាល ប្រភព៖ dailymail