ប្រធានាធិបតីសហរដ្ឋអាមេរិក លោក ដូណាល់ ត្រាំ បានវាយបកយ៉ាងខ្លាំងៗទៅលើក្រុមអ្នករិះគន់ជុំវិញលទ្ធភាពនៃការឈានទៅរកកិច្ចព្រមព្រៀងសន្តិភាពជាមួយប្រទេសអ៊ីរ៉ង់ ដោយលោកបានហៅក្រុមអ្នករិះគន់ទាំងនោះថាជា «អ្នកចាញ់» (Losers)។ ការថ្លែងបែបនេះបានធ្វើឡើងស្របពេលដែលមន្ត្រីជាន់ខ្ពស់របស់អ៊ីរ៉ង់ហាក់ដូចជាកំពុងបន្ទាបបន្ថោកទៅលើលទ្ធភាពនៃការទទួលបានកិច្ចព្រមព្រៀងណាមួយក្នុងពេលឆាប់ៗខាងមុខនេះ។

លោក ដូណាល់ ត្រាំ បានសង្កត់ធ្ងន់ថា រាល់កិច្ចព្រមព្រៀងណាមួយដែលនឹងត្រូវធ្វើឡើងជាមួយទីក្រុងតេហេរ៉ង់ គឺត្រូវតែជាកិច្ចព្រមព្រៀងមួយ «ដ៏អស្ចារ្យ និងមានអត្ថន័យបំផុត» បើមិនដូច្នោះទេ វានឹងមិនអាចកើតឡើងបានឡើយ។ បន្ថែមពីនេះ លោកប្រធានាធិបតីក៏បានភ្ជាប់កិច្ចព្រមព្រៀងនេះទៅនឹងកិច្ចខិតខំប្រឹងប្រែងដើម្បីបង្កើតសន្តិភាពក្នុងតំបន់ឱ្យបានកាន់តែទូលំទូលាយ ដែលរួមបញ្ចូលទាំងប្រទេសអ៊ីស្រាអែលផងដែរ។ លោកបានសរសេរនៅលើបណ្តាញសង្គម Truth Social ថា កិច្ចចរចាកំពុងប្រព្រឹត្តទៅក្នុងលក្ខណៈ «ស្ថាបនា» ប៉ុន្តែភាគីទាំងពីរត្រូវតែយកចិត្តទុកដាក់ខ្ពស់ដើម្បីធានាថាវាត្រឹមត្រូវ ហើយលោកបានព្រមានជាថ្មីថា អ៊ីរ៉ង់មិនត្រូវមានអាវុធនុយក្លេអ៊ែរជាដាច់ខាត។

ដំណឹងនៃការចរចានេះបានធ្វើឱ្យតម្លៃប្រេងនៅលើទីផ្សារពិភពលោកមានការធ្លាក់ចុះខ្លះ ដោយសារតែមានក្តីសង្ឃឹមថា កិច្ចព្រមព្រៀងនេះអាចនឹងឈានទៅរកការបញ្ចប់សង្គ្រាមរវាងអាមេរិក-អ៊ីស្រាអែល ជាមួយនិងអ៊ីរ៉ង់។

ការវិវត្តនៃស្ថានការណ៍នយោបាយនេះ បានកើតឡើងចំពេលដែលពិធីបុណ្យធម្មយាត្រាហ្សាច (Hajj) របស់ជនជាតិមូស្លីមប្រចាំឆ្នាំបានចាប់ផ្តើមនៅក្នុងប្រទេសអារ៉ាប៊ីសាអូឌីត។ ដើម្បីធានាសុវត្ថិភាពនិងបង្កើនទំនុកចិត្តដល់អ្នកចូលរួមដើរធម្មយាត្រា ចំពេលដែលកំពុងមានសង្គ្រាមអ៊ីរ៉ង់ ក្រសួងការពារជាតិនៃប្រទេសអារ៉ាប៊ីសាអូឌីតបានបង្ហោះវីដេអូបង្ហាញពីការដាក់ពង្រាយប្រព័ន្ធការពារដែនអាកាសនៅជាយក្រុងមេក្កា (Mecca) ផងដែរ។

ទោះបីជាយ៉ាងណាក៏ដោយ រដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីអូ (Marco Rubio) បានលើកឡើងថា ទោះបីជាមានវឌ្ឍនភាពគួរឱ្យកត់សម្គាល់ក៏ដោយ ក៏នៅតែមានការងារជាច្រើនទៀតដែលត្រូវធ្វើបន្ត ខណៈដែលមន្ត្រីអ៊ីរ៉ង់នៅតែសម្តែងការមន្ទិលសង្ស័យចំពោះភាពស្មោះត្រង់របស់សហរដ្ឋអាមេរិក និងប្រកាន់ជំហររឹងមាំលើការទាមទាររបស់ខ្លួន។