កូរ៉េខាងជើងធ្វើតេស្តកាំជ្រួចបាច់ចេញពីនាវាមុជទឹកដោយជោគជ័យ

2015-05-10 23:06:03
ចំនួនមតិ 0 | ចំនួនចែករំលែក 0

ចន្លោះមិនឃើញ

កូរ៉េខាងជើងកំពុងសំញែងសព្វាវុធដ៏មានឥទ្ធិពលរបស់ខ្លួន ដល់បណ្ដាប្រទេសនានាលើលោក បន្ទាប់ពីធ្វើតេស្តដោយជោគជ័យលើកាំជ្រួចបាច់ចេញពីនាវាមុជទឹក កាលពីថ្ងៃសៅរ៍ម្សិលមិញ។

មេដឹកនាំវ័យក្មេង គីម ជុងអ៊ុន បានប្រកាសថាកូរ៉េខាងជើងបានសាកល្បងដោយជោគជ័យ ចំពោះការបាញ់កាំជ្រួចចេញនាវាមុជទឹក ដែលមានសមត្ថភាពអាចការពារដែនទឹករបស់ខ្លួន ក្នុងករណីសត្រូវណាមួយចង់រំលោភបំពានដែនអធិបតេយ្យ។

រូបភាពជាច្រើនដែលចាប់បានដោយផ្កាយរណប បានបង្ហាញថាកូរ៉េខាងជើងកំពុងសាងសង់សម្ភារៈធ្វើតេស្តមីស៊ីល និងបំពាក់ជាមួយនាវាមុជទឹក។ ក្រុមអ្នកជំនាញផ្នែកសន្តិសុខបាននិយាយថា នេះអាចជាការអភិវឌ្ឍន៍ដ៏គ្រោះថ្នាក់មួយ ដោយសារកាំជ្រួចមីស៊ីលបាញ់ចេញពីនាវាលិចបាត់ក្នុងសមុទ្រ ពិបាកចាប់សញ្ញាជាងមីស៊ីលដែលបាញ់ចេញពីដី។

មន្ត្រីរបស់ទីភ្នាក់ងារព័ត៌មានមជ្ឈិមកូរ៉េ បាននិយាយថា លោក គីម ជុងអ៊ុន ជាអ្នកដឹកនាំដោយផ្ទាល់លើការសាកល្បងអាវុធដ៏មានឥទ្ធិពលនេះ ហើយវាបានប្រព្រឹត្តទៅដោយជោគជ័យ។ យ៉ាងណាក្ដី គេនៅមិនទាន់ជឿជាក់ ១០០% ជុំវិញព័ត៌មានដ៏គួរឲ្យភ្ញាក់ផ្អើលនេះទេ ដោយសារកាំជ្រួចមីស៊ីលដ៏ទំនើបបាញ់ចេញពីនាវាត្រូវការបច្ចេកវិទ្យាខ្ពស់ ទើបអាចផលិតបាន៕