ផ្សារទំនើប Aeon Mall ទី២នឹងសង់ក្បែរខេមកូ ស៊ីធី

2015-05-12 20:50:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Aeon Mall Cambodia គម្រោងនឹងសាងសង់ផ្សារទំនើបជប៉ុន Aeon Mall ទី២ លើផ្ទៃដី១០ម៉ឺនម៉ែត្រការ៉េ ក្បែរទីក្រុងរណប ខេមកូ ស៊ីធី ក្នុងរាជធានីភ្នំពេញ។ នេះបើតាមការឲ្យដឹងពីនាយកគ្រប់គ្រងផ្សារទំនើប Aeon Mall លោក Makoto Yajima។

លោក Yajima ឲ្យដឹងថា ក្រុមហ៊ុនរបស់លោករកបានទីតាំងសម្រាប់សាងសង់រួចហើយ គឺនៅក្បែរទីក្រុងខេមកូ ស៊ីធី។ ចំពោះថវិកាដែលនឹងត្រូវចំណាយដើម្បីសាងសង់ផ្សារនេះ អាចនឹងច្រើនជាងថវិកាយកមកសាងសង់ Aeon Mall ទី១។

លោក Makoto Yajima

"យើងកំពុងតែអភិវឌ្ឍគម្រោង ដូច្នេះមិនទាន់កំណត់ពេលវេលាឲ្យជាក់លាក់ទេ ប៉ុន្តែវានឹងលេចរូបរាងនៅប៉ុន្មានឆ្នាំក្រោយទៀត។ ផ្សារទំនើបទី២នេះអាចនឹងចំណាយថវិកាច្រើន អាចច្រើនជាង Aeon Mall ទី១"។ លោក Yajima បញ្ជាក់យ៉ាងដូច្នេះ។

ថ្វីត្បិតតែគម្រោងសាងសង់ផ្សារទំនើប Aeon Mall ទី២អាចនឹងចំណាយថវិកាច្រើនជាងក្ដី ប៉ុន្តែលោក Yajima ឲ្យដឹងថា ទំហំអគារមិនប្រាកដថាធំជាងអគារផ្សារទំនើប Aeon Mall ទី១ឡើយ។ ប៉ុន្តែបើប្រៀបធៀបទំហំផ្ទៃដីទីតាំងផ្សារ Aeon Mall ទី២ គឺធំជាង មានផ្ទៃប្រហែល ១០០ ០០០ម៉ែត្រការ៉េ ខណៈ Aeon Mall ទី១ មានទំហំដីប្រហែលត្រឹមតែ៦៨ ០០០ម៉ែត្រការ៉េ។

លោក Yajima ឲ្យដឹងបន្ថែមថា ការជ្រើសរើសទីតាំងសាងសង់ផ្សារទី២របស់ខ្លួននៅតំបន់នោះ ដោយមើលឃើញថា ទីតាំងទីនោះនឹងមានការអភិវឌ្ឍខ្លាំង ក្នុងគម្រោងពង្រីកក្រុងរបស់រាជធានីភ្នំពេញ។

ចំពោះទំនិញ ភោជនីយដ្ឋាន ឬសេវាកម្មកម្សាន្តអ្វីខ្លះ ដែលនឹងមានវត្តមាននៅក្នុងផ្សារទំនើបថ្មីនេះ លោក Yajima ថាអាចនឹងមានលក្ខណៈខុសគ្នាពីផ្សារ Aeon Mall ទី១ ហើយប្រជាជននឹងបានឃើញនៅពេលផ្សារទំនើបនេះចេញជារូបរាង។

ផ្សារទំនើប Aeon Mall Phnom Penh ឬ Aeon Mall ទី១ ត្រូវបានសាងសង់ក្បែរមជ្ឈមណ្ឌលកោះពេជ្រ ក្នុងរាជធានីភ្នំពេញ អស់ទឹកប្រាក់ជាង២០០លានដុល្លារ និងបើកសម្ពោធកាលពីខែមិថុនា ឆ្នាំ២០១៤ បានក្លាយជាផ្សារទំនើបជាងគេក្នុងប្រទេសកម្ពុជា៕

អត្ថបទ៖ មាស រ័ត្ន