ទំនិញ​នានា​​ដែល​មាន​គុណភាព​ខ្ពស់ ល្បី​ឈ្មោះ​ពាសពេញ​ពិភពលោក​ សុទ្ធតែ​ប្រកាស​ថា​មាន​ការទទួលស្គាល់​​​ពី ISO តាម​ប្រភេទ​ផ្សេង​ៗ​គ្នា។ ការ​ប្រកាស​ផ្សាយ​បែប​នេះ ស​បញ្ជាក់​ឲ្យ​ឃើញថា ការ​ទទួល​ស្គាល់​ពី ISO ពិត​ជា​មាន​សារសំខាន់​ខ្លាំង​ណាស់​សម្រាប់​ទំនិញ និង​ផលិតផល​​មាន​គុណភាព​​​ដាក់​លក់​ទីផ្សារ ព្រម​ទាំ​ងសេវាកម្មជាច្រើន​ទៀត។ ចុះ​ប្រិយមិត្ត​មាន​ស្គាល់​ច្បាស់​ទេ​ថា ISO ជា​អ្វី? គេ​បង្កើត​ស្ថាប័ន​មួយ​នេះ​ឡើង ក្នុង​គោល​បំណង​អ្វី? ​

“ISO” មាន​ពាក្យ​ពេញ “International Organization for Standardization” មាន​ន័យ​ជា​ភាសា​ខ្មែរ​ថា "អង្គការ​ស្តង់​ដា​អន្តរជាតិ"។ ស្ថាប័ន​ឯករាជ្យ​មួយ​នេះ​ចាប់​ផ្ដើម​ដំណើរ​ការ​ជា​ផ្លូវការ​នៅ​ថ្ងៃ​ទី២៣ ខែ​កុម្ភៈ ឆ្នាំ​១៩៤៧ និង​មាន​ទីស្នាក់ការ​កណ្ដាល​នៅ​ទីក្រុង​ហ្សឺណែវ ប្រទេស​ស្វីស ដែល​មាន​បុគ្គលិក​ពេញ​ម៉ោង​ប្រមាណ​ជាង ១៥០​នាក់ កំពុង​បម្រើការ។ ​

ដើមទង​នៃ​ការ​បង្កើត ISO ចាប់​ផ្ដើម​ដំបូង​តាំង​ពី​ឆ្នាំ១៩៤៦ នៅ​ពេល​ដែល​គណៈប្រតិភូ​មក​ពី​ប្រទេស​ចំនួន២៥ បាន​ជួប​ប្រជុំ​គ្នា​នៅ​វិទ្យាស្ថាន​វិស្វកម្ម​សំណង់​ស៊ីវិល ក្នុង​ទីក្រុង​ឡុងដុង និង​សម្រេច​បង្កើត​អង្គការ​អន្តរជាតិ​នេះ​ឡើង។ រហូត​ដល់​ដើម​ឆ្នាំ១៩៤៧ ទើប ISO ចាប់​ផ្ដើម​ប្រតិបត្តិការ​សកម្មភាព​របស់​ខ្លួន។ ​

រយៈពេល​ជាង ៦៨​ឆ្នាំ​កន្លង​មក​នេះ ISO បាន​បោះពុម្ព​ផ្សាយ​​ស្តង់ដារ​អន្តរជាតិ​ជិត ២ម៉ឺន ដែល​គ្រប​ដណ្ដប់​ស្ទើរ​គ្រប់​ផ្នែក​បច្ចេកវិទ្យា និង​ផលិត​ផល។ បច្ចុប្បន្ន ISO ប្រមូល​ផ្ដុំ​សមាជិក​មក​ពី ១៦៣​ប្រទេស រាប់​ទាំង​កម្ពុជា ព្រម​ទាំង​មាន​ស្ថាប័ន​បច្ចេកទេស ៣៣៦៨​ទៀត សម្រាប់​ត្រួត​ពិនិត្យ​ការ​អភិវឌ្ឍន៍​ស្តង់ដារ។

ISO បង្កើត​ឡើង​ក្នុង​គោល​បំណង​អ្វី?

គុណភាព​ទំនិញ​ពិត​ជា​ចាំបាច់​សម្រាប់​អ្នក​ប្រើប្រាស់ ខណៈ​ជា​យូរយារ​ណាស់​មក​ហើយ ផលិតផល​នានា​ពុំ​មាន​ការ​ត្រួតពិនិត្យ​ស្តង់ដារ​ត្រឹមត្រូវ។ ស្រប​ពេល​ជាមួយ​គ្នា ISO បាន​បង្កើត​ឡើង ដើម្បី​ផ្ដោត​ការ​យក​ចិត្ត​ទុកដាក់​ទៅ​លើ​ការ​អភិវឌ្ឍន៍​កម្រិត​ស្តង់ដារ​ជា​លក្ខណៈ​អន្តរជាតិ។

ផលិតកម្ម សេវាកម្ម ពាណិជ្ជកម្ម ទូទាំង​សកលលោក នឹង​​ឆ្លើយ​តប​ជាមួយ​កម្រិត​ស្តង់ដារ​តាម​ការ​ចង់​បាន​ជា​រួម ក្រោម​ការ​ត្រួត​ពិនិត្យ​របស់ ISO។ ក្រៅ​ពី​នេះ ISO មាន​ទិសដៅ​ផ្សព្វផ្សាយ​ស្តង់ដារ​រួម ដើម្បី​ជំរុញ​ឲ្យ​ការ​​ផ្លាស់​ប្ដូរ​ទំនិញ និង​សេវាកម្ម ពី​ប្រទេស​មួយ​ទៅ​ប្រទេស​មួយ មាន​លក្ខណៈ​ល្អ​ប្រសើរ។

​

អ្វី​ជា​​ស្តង់ដារ?

ស្តង់ដារ​អន្តរជាតិ ធ្វើ​ឲ្យ​គ្រប់​យ៉ាង​ដំណើរ​ការ​បាន​ល្អ។ ​កម្រិត​ស្តង់​ដារ ផ្ដល់​ការ​បញ្ជាក់​លំដាប់​ថ្នាក់​ពិភពលោក ដល់​ផលិតផល សេវាកម្ម ព្រម​ទាំង​ប្រព័ន្ធ​នានា ដើម្បី​ធានា​គុណភាព សុវត្ថិភាព និង​ប្រសិទ្ធភាព។ លើស​ពី​នេះ វា​ជា​ឧបករណ៍​សម្រួល​ដល់​ការ​ធ្វើ​ពាណិជ្ជកម្ម​អន្តរជាតិ។ ​​​

រហូត​មក​ដល់​ពេល​នេះ ISO បាន​បោះ​ពុម្ព​ផ្សាយ​​​ស្តង់ដារ​លើស​ពី ១៩៥០០ ដែល​គ្រប​ដណ្ដប់​ស្ទើរ​គ្រប់​ផ្នែក​​ឧស្សាហកម្ម។ ទាំង​បច្ចេកវិទ្យា សុវត្ថិភាព​ចំណី​អាហារ កសិកម្ម និង​សុខាភិបាល សុទ្ធតែ​ស្ថិត​នៅ​ក្រោម ISO។ អង្គការ​ស្តង់ដារ​អន្តរជាតិ ISO មាន​ឥទ្ធិពល​ទៅ​លើ​មនុស្ស​គ្រប់​រូប គ្រប់​ទីកន្លែង។

ប្រភេទ​ស្តង់ដារ​ដែល​ពេញ​និយម៖

ISO 9000 សំដៅ​លើ​ការ​គ្រប់​គ្រង​គុណភាព (Quality management) ​​ISO 14000 សំដៅ​លើ​ការ​គ្រប់​គ្រង​បរិស្ថាន (Environmental management) ISO 3166 សំដៅ​លើ​លេខ​កូដ​ប្រទេស (Country codes) ISO 26000 សំដៅ​លើ​ទំនួល​ខុស​ត្រូវ​សង្គម (Social responsibility) ISO 50001 សំដៅ​លើ​ការ​គ្រប់គ្រង​ថាមពល (Energy management) ISO 31000 សំដៅ​លើ​ការ​គ្រប់គ្រង​ហានិភ័យ (Risk management) ISO 22000 សំដៅ​លើ​ការ​គ្រប់គ្រង​សុវត្ថិភាព​ចំណី​អាហារ (Food safety management) ISO 27001 សំដៅ​លើ​ការ​គ្រប់​គ្រង​សុវត្ថិភាព​ព័ត៌មាន (Information security management) ISO 20121 សំដៅ​លើ​ការ​រៀប​ចំ​ព្រឹត្តិការណ៍​ដោយ​និរន្តរភាព (Sustainable events)

ដោយ៖ គង់ វិសាល ប្រភព៖ iso.org