បុគ្គលឆ្នើម ៥ នាក់លេចធ្លោក្នុងកិច្ចការងារមនុស្សធម៌

2015-05-19 17:10:43
ចំនួនមតិ 0 | ចំនួនចែករំលែក 0

ចន្លោះមិនឃើញ

មានបុគ្គលឆ្នើមចំនួន៥ នាក់បានលេចធ្លោក្នុងការងារសង្គម និងមនុស្សធម៌ ។ អ្នកទាំងនោះបម្រើការងារនៅក្នុងវិស័យឯកជន អង្គការក្រៅរដ្ឋាភិបាល កីឡាករ និងសិល្បៈករជាដើម។ ខាងក្រោមនេះគឺជាបុគ្គលទាំង ៥ រូប៖

អ្នកស្រី នួន ភិមាន

អ្នកស្រី នួន ភិមាន បានជាប់ជាវីរនារី CNN នៅឆ្នាំ២០០៨ ដោយសារអ្នកស្រីបានលះបង់ប្រយោជន៍ផ្ទាល់ខ្លួន ដោយបោះចោលការងារផ្ទាល់ខ្លួន សុខចិត្តមកធ្វើការងារសង្គម ជួយផ្ដល់ម្ហូបអាហារ និងការអប់រំ ដល់កុមារដែលរស់នៅកន្លែងចាក់សំរាមស្ទឹងមានជ័យ។

លោកវេជ្ជបណ្ឌិត គួច ម៉េងលី

ក្នុងនាមជាស្ថាបនិកសាលាអន្តរទ្វីបអាមេរិកកាំងលោកបានចូលរួម ចំណែកជាច្រើនក្នុងការងារសង្គម និងមនុស្សធម៌ មានជាអាទិ៍ការចុះចែកថ្នាំ ការព្យាបាលជំងឺដោយឥតគិតថ្លៃ សម្ភារៈប្រើប្រាស់ និងគ្រឿងឧបភោគបរិភោគមួយចំនួន។ គួច ម៉េងលី គឺជាវេជ្ជបណ្ឌិតមួយរូប បញ្ចប់ការសិក្សានៅសហរដ្ឋអាមេរិក និងមានអតីតកាលធ្លាប់ជាអ្នករើសសំរាមតាមចិញ្ចើមថ្នល់ ។

អ្នកស្រីទេព កូលាប

អ្នកស្រី ទេព កូលាប សាកលវិទ្យាធិការនៃសាកលវិទ្យាល័យភ្នំពេញអន្តរជាតិ ក្រៅពីទំនេរពីការងារដ៏មមាញឹកអ្នកស្រីតែងឆ្លៀតចូលរួមចំណែក ការងារមនុស្សធម៌ជាច្រើន ជាពិសេសការចុះចែកអំណោយដល់ស្រ្តី និងកុមារជាប់នៅពន្ធនាគារព្រៃស។

អ្នកប្រដាល់អេភូថង និងភរិយា អតីតអ្នកប្រដាល់ដ៏ល្បីល្បាញលោក អេ ភូថង សព្វថ្ងៃនេះក្រៅពីអាជីពជាគ្រូបង្វឹក លោកជាឯកអគ្គរាជទូតសុឆន្ទៈរបស់អង្គការ Voice ដែលធ្វើការទៅលើការគាំពារកុមារខ្សត់ខ្សោយនិងកុមាររងការ រំលោភបំពាននៅកម្ពុជា។ ភរិយារបស់លោកអ្នកស្រី សឹង សុម៉ាលី ក៏មានតួនាទីជាជំនួយការសហគមន៍នៃគម្រោងគាំពារកុមារ Children ‘s Communities Cambodia Project របស់អង្គការ Voice សាខាភូមិដំណាក់ត្រយឹង សង្កាត់ចោមចៅ។

អ្នក ស្រី សឹង សុម៉ាលី ឲ្យដឹងថា ប្ដីនិងអ្នកស្រីបានទទួលការងារនៅអង្គការ Voice តាំងពីអំឡុងឆ្នាំ២០១០មកម៉្លេះ។ ការបានតួនាទីក្នុងអង្គការមានមូលនិធិមកពីប្រទេស អូស្ត្រាលី មួយនេះគឺដោយសារតែអ្នកស្រីនិងប្ដីជាមនុស្សចូលចិត្តក្មេងៗ ប្រោសប្រណីក្មេងខ្សត់ខ្សោយ ស្របដែលទស្សនវិស័យរបស់ Voice ក៏ផ្ដោតលើការគាំពារកុមារអនាថា កុមារខ្វះខាតដែរ។ ប៉ុន្មានខែក្រោយមកអង្គការបានស៊ើប ពីស្ថានភាពគ្រួសារអ្នកស្រីសព្វបែបយ៉ាង។ អង្គការ Voice បានដឹងពីព័ត៌មានសប្បុរសដែលអ្នកស្រីនិងប្ដីកំពុងចិញ្ចឹម ក្មេងទុរគតច្រើននាក់ក្នុងផ្ទះ ដោយប្រើលុយកាក់ផ្ទាល់ខ្លួន។ ដោយសារឃើញពីតម្លៃទឹកចិត្តសប្បុរសដ៏ កម្រ អ្នកគ្រប់គ្រប់អង្គការក៏បានជួលផ្ទះធំមួយនៅភូមិដំណាក់ ត្រយឹងសង្កាត់ចោមចៅ ដើម្បីប្រមូលក្មេងៗរបស់អង្គការនិងក្មេងដែលគ្រួសារលោក អេ ភូថង ចិញ្ចឹមឲ្យស្នាក់នៅរួមគ្នាសរុបជាង៣០នាក់ ដែលមានវ័យពី៣ឆ្នាំដល់១៥ឆ្នាំ។ គ្រូប្រដាល់ស្រីវ័យ៣៧ឆ្នាំឲ្យដឹងទៀតថាក្មេងៗនៅទីនោះ ជាក្មេងមកពីគ្រួសារតោកយ៉ាកគ្មានទីពឹង ក្មេងដែលមានឪពុកម្ដាយផឹកស្រាស្រវឹងខួបប្រើហិង្សាដ៏ គួរឲ្យអាណិត។

DJ ឃ្លាំង

DJ ឃ្លាំងគឺជាអ្នកសិល្បៈមួយរូបបានចំណាយពេលជាច្រើន ដើម្បីចូលរួមចំណែកកិច្ចការមនុស្សធម៌ ។ តួយ៉ាងលោកធ្លាប់ជាអតីតក្លាយជាទូតសុឆន្ទៈទី១ ប្រចាំអង្គការដើម្បីភាពញញឹមនៃកុមារ (PSE)។ ក្នុងតួនាទីនេះ DJ ឃ្លាំងបានប្រាប់ថា នឹងស្វែងរកប្រាក់ឲ្យបាន ៣០ ម៉ឺនដុល្លារ ក្នុងមួយឆ្នាំ ដើម្បីជួយដល់ក្មេងកំព្រាជាច្រើន នៅអង្គការនេះ។ បច្ចុប្បន្ននេះក្រៅពីការងារសិល្បៈលោកនៅតែបន្តការងារមនុស្សធម៌។