ចិញ្ចើមផ្លូវជារបស់អ្នកណា?

2015-05-21 16:38:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ចិញ្ចើមផ្លូវ គឺទុកសម្រាប់អ្នកថ្មើរជើង ឆ្លងកាត់ ប៉ុន្តែផ្ទុយពីកន្លែងមួយចំនួន ពិសេសនៅជិតតំបន់ផ្សារ ចិញ្ចើមផ្លូវត្រូវអ្នកលក់ដូរប្រើប្រាស់ទាំងស្រុង។ អ្នកលក់ដូរទាំងនោះ មិនបានទុកចំណែកសម្រាប់អ្នកថ្មើរជើងឡើយ។ តើអ្នកថ្មើរជើងមានសិទ្ធិប្រើប្រាស់ចិញ្ចើមផ្លូវដែរ ឬយ៉ាងណា?

យុវជន ដេវីដ និស្សិតឆ្នាំទី២ ជំនាញពាណិជ្ជកម្ម បានឲ្យដឹងថា រឿងនេះកើតឡើងភាគច្រើននៅតំបន់ ជិតៗផ្សារតែម្ដង មានការលក់ដូរពីក្នុងផ្ទះរហូតដល់ចិញ្ចើមផ្លូវ មានម្ចាស់ផ្ទះខ្លះទៀត ដាក់លក់លើផ្លូវតែម្ដង ធ្វើឲ្យអ្នកដើរបង្ខំចិត្ត ចុះដើរលើផ្លូវ ប្រឈមនឹងគ្រោះថ្នាក់។ ដេវីដ បានបន្ថែមថា ៖ “លក់ដូរពេញចិញ្ចើមផ្លូវ រកផ្លូវដើរមិនបាន ហ៊ានតែដើរ ប៉ះបន្តិចបន្តួច អ្នកលក់សម្លឹងមុខតែម្ដង ព្រោះគេសម្អាងមុខផ្ទះគេ”។

កញ្ញា លីណា រស់នៅម្ដុំ ជិតផ្សារថ្មី បានឲ្យដឹងស្រដៀងនឹង ដេវីដ ដែរ ថា កន្លែងខ្លះ មានរបៀបរៀបរយគ្រាន់បើហើយ ម្ចាស់ផ្ទះ ចេះរៀបចំ ផ្លូវដើរបានសមរម្យ ប៉ុន្តែកន្លែងខ្លះទៀត ម្ចាស់ផ្ទះដាក់ស្លាកយីហោបញ្ឈរ កាត់ចិញ្ចើមផ្លូវ បាំងជិតតែម្ដង ខ្លះទៀត គ្មានអីសោះ ដាក់ផើងផ្កា រកផ្លូវដើរមិនឃើញ។កញ្ញាបានបន្ថែមថា៖ “ពេលដើរម្ដងៗ មិនដឹងដើរតាមណាទេ ព្រោះចិញ្ចើមផ្លូវគ្មានសូម្បីចន្លោះ ពិសេសចតឡាន ឡើងជិតឈឹងតែម្ដង”។

បងស្រី ស្រីពៅ ម្ចាស់ហាងលក់គ្រឿងអេឡិចត្រូនិច ដែលបានដាក់ឥវ៉ាន់លើចិញ្ចើមផ្លូវនោះ នៅម្ដុំផ្សារតូច បានឲ្យដឹងថា មូលហេតុដែលនាំឲ្យគាត់បង្ហៀរ ឥវ៉ាន់លើចិញ្ចើមផ្លូវបែបនេះ គឺបណ្ដាលមកពី អ្នកលក់នៅជួរ ខាងមុខ គេដាក់បាំងលើចិញ្ចើមផ្លូវយ៉ាងនេះដែរ ទើបគាត់ដាក់តាមគេទៅ ។ បងស្រី ស្រីពៅបាននិយាយដូច្នេះថា ៖ “ខ្ញុំដាក់ចូលក្នុងតែឯង ដូចខុសគេ បើគេបាំង លក់ម៉េចដាច់”។

ឆ្លើយតបបញ្ហាខាងលើ លោកវរសេនីយ៍ ចេវ ហាក់ នាយរងការិយាល័យ នគរបាលចរាចរជើងគោក រាជធានីភ្នំពេញ បានឲ្យដឹងថា តាមច្បាប់ ចិញ្ចើមផ្លូវ ទាំងសងខាង គឺជាចំណែកសម្រាប់អ្នកថ្មើរជើង ប្រើប្រាស់ នៅក្នុងទីប្រជុំជន ប៉ុន្តែគេសង្កេតឃើញថា ម្ចាស់ផ្ទះមួយចំនួន បានធ្វើអាជីវកម្ម ឬ ដាក់តាំងលក់ទំនិញផ្សេងៗ រំលោភលើចិញ្ចើមផ្លូវ ដោយមិនបានដឹងថា ចិញ្ចើមផ្លូវនោះជាចំណែករបស់អ្នកថ្មើរជើងឡើយ ពួកគាត់បែរជាយល់ថា ដីមុខផ្ទះរបស់គាត់ជាកម្មសិទ្ធិ ផ្ដាច់មុខទៅវិញ។ ប៉ុន្តែតាមច្បាប់ គាត់មាន សិទ្ធិតែមួយទេ គឺ ថែទាំ និងប្រើប្រាស់ ដូច្នេះ ដីចិញ្ចើមផ្លូវ នេះជារបស់រដ្ឋ ទុកសម្រាប់អ្នកថ្មើរប្រើប្រាស់ ដែលនគរបាលសណ្ដាប់តែងតែចុះអប់រំ និងធ្វើការណែនាំ ជាប្រចាំ។

លោក ចេវ ហាក់ ក៏បានអំពាវនាវដល់ម្ចាស់ផ្ទះទាំងអស់ត្រូវជួយថែរក្សាចិញ្ចើមផ្លូវ និងទុកចន្លោះសម្រាប់អ្នកថ្មើរជើងឆ្លងកាត់ដោយសុវត្ថិភាពផង។ ពាក់ព័ន្ធនឹងបញ្ហាលក់លើចិញ្ចើមផ្លូវនេះ កាលពីថ្ងៃទី ២៦ ខែវិច្ឆិកា ឆ្នាំ២០១២កន្លងទៅ សាលារាជធានីភ្នំពេញ បានកំណត់ឲ្យម្ចាស់អាជីវកម្ម ទាំងអស់ ដែលមានទីតាំងនៅ សង្ខាង មហាវិថីព្រះមុនីវង្ស បញ្ឈប់ការប្រើប្រាស់ចិញ្ចើមផ្លូវ និងទ្រូងផ្លូវ ធ្វើជាទីតាំងអាជីវកម្ម ឬជាចំណតយានយន្ត ចាប់ពីថ្ងៃទី១៥ ខែធ្នូ ឆ្នាំ២០១២ដោយសារតែអាជីវកម្មទាំងនោះ បានធ្វើឲ្យ បាត់បង់ចំណែកចិញ្ចើមផ្លូវ នាំឲ្យរថយន្តថតលើទ្រូងផ្លូវ បង្កឲ្យមានការកកស្ទះចរាចរ និងបង្ករឲ្យមានគ្រោះថ្នាក់ចរាចរ ដែលអាចកើតឡើងជាយថាហេតុ។

អានអត្ថបទ៖គេថាម៉ូតូកង់បីធ្វើឲ្យស្ទះចរាចរណ៍!

អត្ថបទ៖ កង ចាន់បញ្ញា