Ronaldo ផ្ញើសារវីដេអូពិសេស ជូនពរ Gerrard

2015-05-22 15:26:38
ចំនួនមតិ 0 | ចំនួនចែករំលែក 0

ចន្លោះមិនឃើញ

Cristiano Ronaldo បានផ្ញើសារជូនពរដល់ Steven Gerrard ប្រធានក្រុម Liverpool នៅក្នុងវីដេអូឃ្លិបខ្លី ១៣វិនាទី ដែលត្រូវបានបង្ហោះលើ YouTube ដោយគណនី YouTube ផ្លូវការរបស់ក្លិបហង្សក្រហមយប់មិញនេះ។

អតីតប្រធានក្រុមអង់គ្លេស បានបង្ហាញខ្លួនចុងក្រោយនៅកីឡដ្ឋាន Anfield កាលពីថ្ងៃសៅរ៍ ខណៈដែល Liverpool ចាញ់ Crystal Palace ៣-១ ហើយ Gerrard នឹងបញ្ចប់អាជីពជាកីឡាករក្រុមហង្សក្រហម នៅថ្ងៃអាទិត្យនេះ ក្នុងការប្រកួតចុងក្រោយក្រៅដីទល់នឹង Stoke City មុននឹងចាកចេញទៅ LA Galaxy។

កីឡាករជម្រើសជាតិព័រទុយហ្គាល់ CR7 ពុំដែលបានលេងជាមិត្តរួមក្រុមជាមួយ Gerrard ទេ ប៉ុន្តែអ្នកទាំង២ ធ្លាប់លេងនៅក្រុមប្រឆាំងគ្នាច្រើនដង ក្នុងការប្រកួតរវាង Liverpool ទល់ Manchester United អំឡុងពេល Ronaldo លេងឲ្យបិសាចក្រហម រយៈពេល៥ឆ្នាំនៅ Old Trafford ហើយក៏ធ្លាប់ប៉ះគ្នាក្នុងការប្រកួតឲ្យក្រុមជម្រើសជាតិផងដែរ។

ខ្សែបម្រើប្រយុទ្ធវ័យ៣០ឆ្នាំ របស់ Real Madrid បាននិយាយនៅក្នុងវីដេអូថា៖ "សួស្ដី Steve! ខ្ញុំគ្រាន់តែចង់និយាយថា វាជាសេចក្ដីរីករាយមួយ ដែលបានលេងជាមួយអ្នកជាច្រើនឆ្នាំ ពេលដែលយើងលេងក្នុងការប្រកួត Man Utd ទល់នឹង Liverpool។ អ្នកជាកីឡាករដ៏អស្ចារ្យម្នាក់ ខ្ញុំសូមជូនពរឲ្យអ្នកសំណាងល្អគ្រប់យ៉ាង ទាំងអាជីព និងជីវិតរបស់អ្នក"។

Gerrard នឹងចាកចេញពី Liverpool បន្ទាប់ពីលេងឲ្យក្រុមឈុតធំអស់រយៈពេល១៧ឆ្នាំ និងលេងឲ្យហង្សក្រហម រយៈពេល២៨ឆ្នាំ បើគិតតាំងពីវ័យកុមារមក៕