ទារកអាយុ១១ខែនៅរស់ ពេលបាក់ដីនៅកូឡុំប៊ីស្លាប់យ៉ាងតិច៧៨នាក់

2015-05-22 15:45:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ទារកអាយុ១១ខែម្នាក់បានរស់រានមានជីវិតមិនគួរឲ្យជឿ នៅក្នុងគ្រោះមហន្តរាយបាក់ដីភក់នៅប្រទេសកូឡុំប៊ីដែលបានសម្លាប់មនុស្សយ៉ាងតិច៧៨នាក់ថ្មីៗនេះ។

ម្តាយរបស់ទារកនោះ បូករួមទាំងសាច់ញាតិជាង១០នាក់ផ្សេងទៀតអាចស្ថិតក្នុងចំណោមអ្នកស្លាប់ទាំងនោះ។ ពួកគេត្រូវភក់ល្បាប់ទាញយកទៅជាមួយកាលពីថ្ងៃចន្ទកន្លងទៅ នៅទីក្រុង Salgar ខេត្ត Antioquia ភាគពាយព្យនៃប្រទេស។

ក្រុមវេជ្ជបណ្ឌិតបានគិតថាទារកដែលមានឈ្មោះ Jhosep Diaz បានរួចផុតពីស្លាប់ដោយសារគ្រែអង្រឹងដែលទារកនោះគេង បានអណ្ដែតតាមទឹករយៈចម្ងាយជាង១គីឡូម៉ែត្រ។ ក្រោយជួយសង្រ្គោះ ទារកនោះត្រជាក់យ៉ាងខ្លាំង ប៉ុន្តែមិនមានរបួស ឬប៉ះពាល់អ្វីនោះទេ។

វេជ្ជបណ្ឌិត Jesus Antonio Guasao បានប្រាប់ទីភ្នាក់ងារព័ត៌មាន AP ថា៖ "គាត់ (ទារក) មិនបើកភ្នែកនោះទេ ប៉ុន្តែនៅមានដង្ហើម"។ ចំណែកលោកតា Alvaro Hernandez របស់ទារកនោះ បាននិយាយថា៖ "ក្រៅពីដំណឹងអាក្រក់នៃសាច់ញាតិ១៦នាក់អាចស្លាប់ ការនៅរស់របស់ចៅខ្ញុំគឺជាអភូតហេតុមួយដ៏អស្ចារ្យ"។

រំលឹកផងដែរថាការបាក់ដីកាលពីថ្ងៃចន្ទនោះ គឺជាគ្រោះធម្មជាតិដ៏អាក្រក់បំផុតរបស់កូឡុំប៊ីតាំងពីឆ្នាំ១៩៩៩មក។ វាបានកើតឡើងនៅម៉ោង៣ទៀបភ្លឺ ដែលជាពេលជនរងគ្រោះភាគច្រើនកំពុងលង់លក់ក្នុងដំណេកនៅឡើយ៕