ក្លិប​បាល់ទាត់​​យក្ស​នៅ​ទ្វីប​អឺរ៉ុប​ចំនួន ២ គឺ Real Madrid របស់​ប្រទេស​អេស្ប៉ាញ និង Inter Milan របស់​ប្រទេស​អ៊ីតាលី បាន​ផ្ដល់​ជំនួយ​មនុស្ស​ធម៌​តាម​រយៈ​អង្គការ​ក្រៅ​រាជរដ្ឋាភិបាល ជូន​ដល់​ប្រជាជន​កម្ពុជា។

សម្រាប់ Inter Milan បាន​ជ្រើសរើស​យក​អង្គការ​ Mission Possible Cambodia ជា​ដៃ​គូ តាំង​ពី​ខែ តុលា ​ឆ្នាំ ២០១២ ដោយ​ផ្ដល់​ជំនួយ​ខ្លះៗ ជួយ​ដល់​ប្រជាជន​នៅ​ក្នុង​ភូមិ​រូង ឃុំ ក្រាំងលាវ ស្រុក បាទី ខេត្ត​តាកែវ។ យោង​តាម​វេបសាយ intercampus របស់​ក្លិប​​ជើង​ឯក ១៨ សម័យកាល​នៅ​អ៊ីតាលី​មួយ​នេះ ជំនួយ​បាន​​ផ្ដល់​ទៅ​កុមារ​ជិត ២០០ នាក់ ដោយ​ផ្ដោត​លើ​ការ​អប់រំ និង ហ្វឹកហាត់​កីឡា។

ចំណែក​ក្លិប​​អធិរាជ​​ស Real Madrid វិញ​បាន​​ ចុះ​អនុស្សារណៈ​នៃ​ការយោគយល់​គ្នា​បង្កើត​មូលនិធិ​ជាមួយ​​អង្គការ Solidaridad Ayuda y Unión Crean Esperanza (SAUCE) ដែលមាន​មូលដ្ឋាន​នៅ​ខេត្តបាត់ដំបង ដើម្បី​​សាងសង់​​សាលារៀន​ខ្នាត​អន្តរជាតិ​មួយ​សម្រាប់​ជនពិការ។

លោក Florentino Perez (ស្ដាំ) និង​លោក Enrique Figaredo(ឆ្វេង)

លោក Florentino Perez ប្រធាន​ក្លិប Real Madrid និង​លោក Enrique Figaredo ស្ថាបនិក​អង្គការ SAUCE បាន​ចុះ​ហត្ថលេខា រួម​គ្នា ​កាល​ពី​​​ថ្ងៃទី២០ ខែមីនា ឆ្នាំ២០១៥។ នេះ​​យោង​តាម​​គេហទំព័រ​ផ្លូវការ​ក្លិប Real Madrid ជា​ភាសា​អេស្ប៉ាញ។ ក្រោម​ជំនួយ​របស់​មូលនិធិ​របស់​ក្លិប​ជើង​ឯក​​ទ្វីប​អឺរ៉ុប ១០ សម័យកាល​ សាលា​នេះ​​នឹង​ក្លាយ​ជា​សាលា​ខ្នាត​អន្តរជាតិ​ទីមួយ​លើពិភពលោក​ ​ដែល​ភ្ជាប់កីឡា និង​សង្គម​សម្រាប់​ជនពិការ។ សាលា​នោះ មាន​ក្មេង​អាយុ​ពី៦ ទៅ១៧ឆ្នាំ ប្រមាណ១៦០នាក់ ដែល​ក្នុងនោះ ៥៩នាក់ ជា​ជនពិការ​កាយសម្បទា៕

អត្ថបទ៖ ម៉ឺន រស្មី