កំពូលតារាល្បីៗដែលច្រៀងផ្ទាល់ពីរោះល្អ មិនចាំបាច់ចាក់ឌីស

2015-06-03 14:02:46
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនបានចេញលក់លើទីផ្សារ បទចម្រៀង ឬសំឡេងរបស់តារាចម្រៀងតែងតែមានជំនួយខ្លះៗពីបច្ចេកទេស។ ទោះយ៉ាងណា តារាចម្រៀងដែលមានទឹកដមសំឡេងពីរោះពិតប្រាកដគឺមិនសូវជាត្រូវការជំនួយពីបច្ចេកទេសឡើយ ហើយនៅពេលសម្ដែងផ្ទាល់ សំឡេងរបស់ពួកគេគឺពីរោះ និងអាចពីរោះជាបទចម្រៀងក្នុងស្ទូឌីយោទៅទៀត។ ខាងក្រោមនេះគឺជាតារាចម្រៀងល្បីៗលំដាប់ពិភពលោកដែលអាចច្រៀងផ្ទាល់បានពីរោះជាងគេ៖

១ Beyoncé

Queen Bey បានទទួលកេរ្តិ៍ឈ្មោះល្បីល្បាញទូទាំងពិភពលោកតាមរយៈបទចម្រៀងពីរោះៗ ការលេងម៉ូដទាក់ទាញ និងក្បាច់រាំខ្លាំងៗ ប៉ុន្តែចំណុចដែលខ្លាំងជាងគេគឺសំឡេងរបស់នាងតែម្ដង។ ទស្សនាការសម្ដែងរបស់នាងក្នុងបទ "If I Were A Boy” ក្នុងកម្មវិធី Grammy Awards លើកទី៥២៖

២. Ed Sheeran

តារាចម្រៀងវ័យ ២៤ឆ្នាំរូបនេះ បានចាប់ផ្ដើមនិពន្ធ និងផលិតបទចម្រៀងខ្លួនឯងតាំងពីអាយុ ១៤ឆ្នាំ។ អាល់ប៊ុម "X” របស់គេដែលចេញកាលពីឆ្នាំមុន បានធ្វើឲ្យគេទទួលបានជោគជ័យយ៉ាងខ្លាំង។ ទស្សនាការសម្ដែងផ្ទាល់របស់គេក្នុងបទ "Give Me Love” ប្រិយមិត្តនឹងដឹងថាគេមានទេពកោសល្យបែបណាក្នុងការប្រើសំឡេង៖

៣. Lady Gaga

បច្ចុប្បន្ននេះ តារាចម្រៀង Mother Of Monster Lady Gaga បានទទួលការចាប់អារម្មណ៍យ៉ាងច្រើនពីមហាជនតាមរយៈការលេងម៉ូដចម្លែកៗ។ ប៉ុន្តែក្រៅពីភាពទាក់ទាញខាងក្រៅ Gaga គឺជាតារាចម្រៀងដែលមានទឹកដមសំឡេងក្រអួនក្រអៅមួយរូប។ ទស្សនាការសម្ដែងផ្ទាល់របស់នាងក្នុងបទ "Speechless”៖

៤. Bruno Mars

Bruno Mars ដែលមានឈ្មោះពិតថា Peter Hernandez គឺជាតារាលេចធ្លោម្នាក់ក្នុងវិស័យសិល្បៈចម្រៀងនាពេលបច្ចុប្បន្ន។ អ្នកគាំទ្រមួយចំនួនបានចាត់ទុកគេជា ស្ដេចចម្រៀងប៉ុបទីពីរបន្ទាប់ពី Michael Jackson ទៀតផង។ ការសម្ដែងផ្ទាល់របស់គេក្នុងបទ "When I Was Your Man” ខាងក្រោមនេះ មានមនុស្សជាច្រើននិយាយថា ពីរោះជាងថតក្នុងស្ទូឌីយោទៅទៀត៖

៥. Demi Lovato

តារាក្មេងៗពីប៉ុស្តិ៍ Disney ភាគច្រើនត្រូវគេស្គាល់ថាមានសមត្ថភាពច្រៀងល្មមៗប៉ុណ្ណោះ ប៉ុន្តែ Demi គឺពិតជាតារាចម្រៀងដែលមានទឹកដមសំឡេងល្អពិតប្រាកដ ហើយនៅពេលច្រៀងផ្ទាល់ សំឡេងរបស់នាងសឹងតែល្អជាងបទចម្រៀងក្នុងស្ទូឌីយោទៅទៀត។ ទស្សនាការសម្ដែងរបស់នាងក្នុងបទ "Skyscraper”៖

៦. Jessie J

តារាចម្រៀងអង់គ្លេស Jessie J ប្រហែលមិនមានបទចម្រៀងល្បីច្រើនដូចតារាផ្សេងៗឡើយ ក្រៅពីបទ "Price Tag” ប៉ុន្តែទឹកដមសំឡេង និងសមត្ថភាពច្រៀងរបស់នាង គឺពិតជាមិនធម្មតាឡើយ។ វីដេអូខាងក្រោមនេះ ត្រូវបានថតក្នុងបន្ទប់ទឹកប៉ុណ្ណោះ ប៉ុន្តែសំឡេងរបស់តារាវ័យ ២៧ឆ្នាំរូបនេះ នៅតែល្អមិនចាញ់បទចម្រៀងពីស្ទូឌីយោនោះទេ៖

៧. Miley Cyrus

មួយរយៈចុងក្រោយនេះ តារាចម្រៀងវ័យ ២២ឆ្នាំ Miley Cyrus កាន់តែមានអ្នកស្អប់ច្រើនទៅៗ ដោយសារការតុបតែងខ្លួន និងអាកប្បកិរិយាប្លែកៗរបស់នាង ប៉ុន្តែអ្វីដែលមិនអាចប្រកែកបានគឺនាងមានសមត្ថភាពច្រៀងបានយ៉ាងពីរោះ។ ទស្សនាការសម្ដែងផ្ទាល់របស់នាងក្នុងបទ "Wrecking Ball”៖

៨. Justin Bieber

Justin Bieber បានក្លាយជាតារាល្បីតាំងពីមិនទាន់ពេញវ័យ ប៉ុន្តែមិនមែនជារឿងចៃដន្យឡើយ គឺដោយសារគេគឺជាតារាចម្រៀងមានសំឡេងល្អពិតប្រាកដ។ ការសម្ដែងបទ "As Long As You Love Me” ខាងក្រោមនេះអាចបង្ហាញបានថាទឹកដមសំឡេង និងការច្រៀងរបស់គេល្អប៉ុណ្ណា៖

៩. Adam Lambert

បើទោះជាមិនបានទទួលជយលាភីក្នុងកម្មវិធី American Idol ពិតមែន ប៉ុន្តែ Adam បានបង្ហាញអ្នកគាំទ្រម្ដងហើយម្ដងទៀតថា គេពិតជាតារាចម្រៀងដ៏មានសំឡេងពីរោះមិនធម្មតា។ ទស្សនាការសម្ដែងផ្ទាល់របស់គេក្នុងបទ "What Do You Want From Me”៖

១០. Rihanna

ស្ទីលតុបតែងខ្លួនរបស់នាងបានផ្លាស់ប្ដូរជាច្រើនតាំងពីចូលច្រៀងនៅឆ្នាំ២០០៥មក ប៉ុន្តែអ្វីដែលមិនផ្លាស់ប្ដូរគឺសំឡេងរបស់នាង គឺនៅតែពីរោះជានិច្ច។ ខាងក្រោមនេះគឺជាការសម្ដែងបទចម្រៀងល្បីដំបូងៗរបស់នាងមួយបទ គឺបទ "Take A Bow”៖

១១. Sam Smith

Sam Smith គឺជាតារាចម្រៀងជំនាន់ថ្មី ដែលទទួលបានជោគជ័យយ៉ាងធំធេងនាពេលបច្ចុប្បន្ន។ បទចម្រៀងរបស់គេភាគច្រើនគឺជាបទមនោសញ្ចេតនា ហើយសំឡេងរបស់គេក៏បង្កប់ដោយមនោសញ្ចេតនាមិនធម្មតាដែរ។ ទស្សនាការសម្ដែងផ្ទាល់របស់គេក្នុងបទ "I'm Not The Only One”៖