Lenovo ផលិត Tablet ដំបូងដែលមាន Projector ភ្ជាប់មកជាមួយ

2014-10-11 16:45:18
ចំនួនមតិ 0 | ចំនួនចែករំលែក 0

ចន្លោះមិនឃើញ

Lenovo កំពុងបោះជំហានទៅមុខមួយជំហានក្នុងការផលិត Tablet ជំនាន់ថ្មីរបស់ខ្លួនដោយបំពាក់ Projector ក្នុងនោះស្រាប់។ Yoga Tablet 2 Pro ទំហំ ១៣ អ៊ីញរបស់ក្រុមហ៊ុនដដែល មានបំពាក់ pico projector នៅខាងក្នុងមកជាមួយតែម្តង។

គំនិតច្នៃបង្កើតថ្មីនេះបានធ្វើឲ្យ Lenovo ជាក្រុមហ៊ុនដំបូងគេដែលបង្កើត Tablet មាន projector។ Projector ដែលភ្ជាប់មកជាមួយនឹង Tablet នឹងដំណើរការនៅពេលអ្នកចុចប៊ូតុងក្បែរគែម ឬបញ្ជាតាមរយៈ Software នៅលើ Tablet ផ្ទាល់។ វាអាចមានលទ្ធភាពបញ្ចាំងរូបភាពទៅក្រៅដល់ទំហំ ៥០ អ៊ីញ និងមានប៊ូតុងមួយសម្រាប់ជួយសម្រួលទំហំរូបភាព។

ក្រឡេកមកមកមើលលក្ខណៈសម្បត្តិរបស់ Tablet ថ្មីនេះគឺមានអេក្រង់ ១៣ អ៊ីញ ប្រភេទ better-than-HD និង Resolution 2560x1440 pixel តែចំពោះរូបភាពពេលបញ្ចាំងចេញពី projector មានកម្រិត pixel ទាបជាងនេះ។ វាប្រើប្រព័ន្ធប្រតិបត្តិការ Android។ ចំពោះថាមពលថ្មគឺអាចប្រើបាន ៣ ម៉ោងបើបើក Projector តែបើសិនមិនប្រើ Projector វិញគឺប្រើបាន ១៥ ម៉ោង។

Yoga Tablet 2 Pro នឹងមានដាក់លក់នៅចុងខែតុលានេះនៅអាមេរិក និងអឺរ៉ុប។ ចំពោះតម្លៃលក់ដំបូងនៅអង់គ្លេសគឺ ៤៩៩ ដុល្លារ។ ដោយឡែកតម្លៃលក់នៅអូស្ត្រាលីអំឡុងពាក់កណ្ដាលខែតុលាគឺ ៧៩៩ ដុល្លារ៕