តារាវាយតប់ សុខ សុវណ្ណាដែន ត្រៀមថតភាពយន្តវាយតប់ហុងកុង

2015-06-08 17:32:29
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងវាយតប់ សុខ សុវណ្ណាដែន ប្រាប់ថា លោកកំពុងមានភាពសប្បាយរីករាយក្រោយទើបទទួលបានការងារថ្មីទៀត ដោយត្រៀមចូលរួមសម្ដែងភាពយន្តរបស់ហុងកុងមួយរឿងដែលមកថតនៅស្រុកខ្មែរ។

ភាពយន្តខាងលើនេះ មិនទាន់ត្រូវបានបញ្ចេញឲ្យដឹងថាមានចំណងជើងអ្វីនៅឡើយទេ ប៉ុន្តែតារាសម្ដែងដែលយកវត្តជាទីជម្រករូបនេះ ប្រាប់ថា លោកបានចូលខ្លួនទៅសម្ដែងសាកល្បងជាមួយក្រុមផលិតរបស់គេរួចហើយ ហើយក៏ទទួលបានលទ្ធផលល្អដែរ។

ដែន ថ្លែងថា “មានតួសម្ដែងច្រើននាក់ណាស់បង ដែលបានទៅចូលរួមសម្ដែងសាកល្បងឲ្យគេមើល អ្នកខ្លះធ្វើច្រើនដងបានត្រូវ ខ្លះគេអត់យកតែម្ដង តែខ្ញុំដឹងម៉េចដែរ លេងតែម្ដងត្រូវហ្មង!”។ ក្រៅពីមិនទាន់បញ្ចេញឲ្យដឹងពីចំណងជើង សាច់រឿងយ៉ាងណា ក៏មិនទាន់ត្រូវបានបញ្ចេញឲ្យដឹងដែរ។ ដូច្នេះហើយ សុខ សុវណ្ណាដែន ថ្លែងថា សូម្បីលោកដើរជាតួអ្វីក៏មិនទាន់ដឹងច្បាស់ដែរ តែលោកសង្ស័យខ្លួនឯងថា អាចជាតួវាយតប់ដែលត្រូវនឹងជំនាញរបស់លោក។

លោក បន្តថា ការជួបគ្នាលើកដំបូងរវាងលោក និងក្រុមអ្នកផលិតមកពីហុងកុងសប្ដាហ៍មុននេះ គឺមិនទាន់បាននិយាយគ្នាអីវែងឆ្ងាយ ក្រៅតែពីការសម្ដែងសាកល្បងឲ្យពួកគេមើលទេ អីចឹងហើយបច្ចុប្បន្ន គឺលោកកំពុងរង់ចាំ ការកោះហៅនិយាយពីកុងត្រា និងពិភាក្សាការងារផ្សេងៗដែលពាក់ព័ន្ធដែរ ក្រោយលោកបានជាប់ក្នុងការសម្ដែងសាកល្បង។

" គេយកហើយ...ប៉ុន្តែគ្រាន់តែមិនទាន់បានជួបគ្នានិយាយលម្អិតការងារផ្សេងៗហ្នឹងណា គេថានឹងហៅឆាប់ៗ អាចសប្ដាហ៍នេះ ឬសប្ដាហ៍ក្រោយអីហ្នឹង អីចឹងហើយខ្ញុំកំពុងតែចាំដែរហ្នឹង!”។ សុវណ្ណាដែន ថ្លែង។

សុវណ្ណាដែន ពេលចូលរួមថតរឿង "ល្បុកតោចម្លែក"(រូបថត៖ FB សុវណ្ណាដែន)

នេះមិនមែនជាលើកទី១ទេ ដែលតារាសម្ដែងមកពីខេត្តស្វាយរៀងរូបនេះ បានសម្ដែងភាពយន្តធ្វើជាអ្នកប្រយុទ្ធ។ សាមីខ្លួនបានបញ្ចេញឲ្យដឹងថា លោកក៏ត្រូវធ្លាប់បានផលិតកម្មក្នុងមួយហៅឲ្យសម្ដែងជាតួឯកក្នុងរឿងប្រយុទ្ធស៊ីសាច់ហុតឈាមគ្នាមានចំណងជើងថា "លុតដែកថែប" ដែរ។ ប៉ុន្តែទន្ទឹមរឿងនេះ ត្រូវពន្យារពេលម្ដងហើយម្ដងទៀត សុវណ្ណាដែន ក៏បានចូលរួមសម្ដែងភាពយន្តប្រយុទ្ធប្រើក្បាច់គុនដូនតាមួយរឿងដែរនាពេលថ្មីៗនេះ នោះគឺរឿង "ល្បុកតោចម្លែក"។

ដែន ប្រាប់ថា រឿងនេះ លោកបានចូលរួមសម្ដែងជាមួយតារាក្បាច់គុន កីឡាប្រដាល់ល្បីៗជាច្រើនរូបទៀត ហើយថា "ល្បុកតោចម្លែក" ថតជិតចប់ ដែលនឹងអាចដាក់បញ្ចាំងជូនប្រិយមិត្តទស្សនាក្នុងរយៈពេលមិនយូរខាងមុខនេះហើយ៕

អត្ថបទ៖ ទារិកា