មាស សុខសោភា ជិះឃើញភ្លាម ចុះចូលចែកអំណោយភ្លែត

2015-06-17 16:06:04
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបំពេញការងារចប់រួចរាល់ មាស សុខសោភា ក៏បានត្រលប់មកភ្នំពេញវិញប៉ុន្តែនៅតាមផ្លូវនៃខេត្តមណ្ឌលគីរី នាងបានឃើញសាលារៀនមួយមើលទៅមានសភាពយ៉ាប់យ៉ឺន ដូច្នេះក៏ចូលទៅចែកអំណោយផ្ទាល់ខ្លួនភ្លែតតែម្តង។

តារាចម្រៀងសម្លេងស្រទន់ មាស សុខសោភាបានប្រាប់ពីអារម្មណ៍ថាពេលនោះនាងមិនអាចបន្តដំណើរទៅមុខបានទៀតទេ សាលារៀននោះនៅដក់ជាប់ក្នុងចិត្តខណៈពេលដែលរូបនាងបានជិះហួស៥គីឡូម៉ែត្រទៅហើយ។ ដោយសារតែបែបនេះ សោភា និងក្រុមការងារក៏បានត្រលប់ឡានមកវិញនាំយកនូវថវិកាផ្ទាល់ខ្លួនតិចតួចជូនដល់សាលាដែលនៅតំបន់ដាច់ស្រយាលនោះ។

ក្នុងនាមជាតារាល្បីម្នាក់ដែលត្រូវបានទស្សនិកជនទទួលស្គាល់ និងគាំទ្រ រហូតបានឈ្នះពាន២ឆ្នាំជាប់គ្នានៅក្នុងកម្មវិធីអាណាចក្រតារា សោភា បានប្រាប់ថា ពេលខ្លះនាងមិនបានជួយអ្វីដល់សង្គមច្រើនក៏ពិតមែនប៉ុន្តែបើមានការងារអ្វីដែលអាចជួយបានមាស សុខសោភានឹងធ្វើជានិច្ច។“ខ្ញុំសប្បាយចិត្តនឹងធ្វើរាល់ការងារទាំងនោះហើយវាកើតចេញពីចិត្តនិងចរិតរបស់ខ្ញុំអ្វីដែលខ្ញុំអាចជួយបានខ្ញុំនឹងជួយ"។ សោភា ថ្លែង។

តារាស្រីមកពីខេត្តកំពង់ស្ពឺរូបនេះ បន្តថាទៀត "ម្យ៉ាងទៀតខ្ញុំជាមនុស្សរបស់មហាជនដែលពួកគាត់មានការស្រលាញ់រាប់អានហើយខ្ញុំចង់បង្ហាញមុខទៅដល់ពួកគាត់ផ្ទាល់ៗ ត្បិតថាពេលខ្លះមានការប្រគំតន្ត្រីនៅតាមខេត្តមិនសូវមានពេលគ្រប់គ្រាន់ និងជិតស្និទ្ធជាមួយពួកគាត់ក៏ដោយ"។ សោភា ថ្លែង។

រូបភាព៖ facebook សោភា

តាមសាមីខ្លួន បានឲ្យដឹងទៀតថា នេះមិនមែនជាលើកទីមួយទេដែលនឹងបានធ្វើកិច្ចការការងារសង្គម គឺច្រើនដងហើយដែលនាងបានចូលរួមចំណែកជាមួយនឹងការងារសង្គម ក្នុងនោះពេលដែលនាងបានទៅដល់កន្លែងរស់នៅរបស់ប្រជាពលរដ្ឋពេលណា ពួកគាត់មានការស្វាគមន៍រាក់ទាក់ជានិច្ច។ នាង អះអាងទៀតថា នាងនឹងបន្តកិច្ចការនេះតាមនិស្ស័យ និងសមត្ថភាពផ្ទាល់ខ្លួនទៀត មិនឈប់ឡើយ៕

អត្ថបទ៖ ថា ម៉ាលីដា