ក្នុង​មួយ​សប្ដាហ៍​មក​នេះ ​ព័ត៌មាន​ដែល​ចុះ​ផ្សាយ​ថា Sergio Ramos ​នឹង​ចាកចេញ​ពី Real Madrid ​កាន់​តែ​មាន​ច្រើន​ឡើង​ៗ ខណៈ​ដែល​កាល​ពី​ដើម​សប្ដាហ៍​ ឮ​ថា​ចង់​ទៅ Barcelona ​រី​ឯ​ពេល​នេះ​វិញ​ចង់​ទៅ​លេង​នៅ Manchester United ​វិញ រហូត​ដល់​ហ៊ាន​សុំ​ម្ចាស់​ក្លិប​ Real ​ចាកចេញ​ទៀត​ផង។ តែ​ទោះ​ជា​យ៉ាង​នេះ​ក្ដី អ្វី​ដែល​ប្រាកដ​ប្រជា​គឺ​មិន​ទាន់​មាន​នៅ​ឡើយ​ទេ ទើប​ធ្វើ​ឱ្យ​មាន​មតិ​មួយ​ចំនួន​បែរ​ជា​យល់​ផ្សេង​ថា នេះ​គ្រាន់​តែ​ជា​យុទ្ធសាស្ត្រ​មួយ​របស់​ខ្សែ​ការពារ​រូប​នេះ​ចង់​បន្ត​កុងត្រា ​និង​បាន​ប្រាក់​បៀវត្សរ៍​ច្រើន​ជាង​មុន​ប៉ុណ្ណោះ។

យោង​​ទៅ​តាម​ការ​វិភាគ​របស់​វិបសាយ Goal ​បាន​បក​ស្រាយ​ដូច​ខាង​ក្រោម​នេះ៖

Ramos ​អាច​នឹង​ចាកចេញ​ពី Real Madrid ​មែន ប្រសិន​បើ​រូបគេ​ពិត​ជា​មាន​ចិត្ត​ចង់​ចាកចេញ​មែន ​ព្រោះ​ក្លិប​បិសាច​ក្រហម​ពិត​ជា​ត្រូវ​ការ​រូប​គេ​ពិត​ប្រាកដ​ណាស់។ តែ​ផ្ទុយ​ទៅ​វិញ វា​ក៏​អាច​ជា​វិធី​សាស្ត្រ​របស់​អតីត​កីឡាករ Sevilla ​រូប​នេះ​ក៏​ថា​បាន​ដែរ ព្រោះ​ថា​ក្នុង​វិស័យ​បាល់ទាត់​មិន​ខ្វះ​ទេ កីឡាករ​ដែល​ថា​ចង់​ចាកចេញ​ណាស់​តែ​ចុង​​ក្រោយ​បែរ​ជា​បន្ត​កុងត្រា​នៅ​ក្លិប​ចាស់​ទៀត​នោះ។

តួយ៉ាង​ដូច​កីឡាករ Dani Alves ​អីចឹង ​តាំង​ពី​ជិត​ចប់​រដូវ​កាល​មុន​មក​ហើយ​ដែល​មាន​ក្លិប​ធំ​ៗ​ជា​ច្រើន​ចង់​បាន​រូប​គេ​ទៅ ហើយ​ក៏​លេច​ឮ​ថា​សុទ្ធ​តែ​ព្រមព្រៀង​លក្ខខ័ណ្ឌ​ផ្ទាល់​ខ្លួន​ហើយ​ទៀត​ផង តែ​ចុង​ក្រោយ​នៅ​តែ​ត​កុងត្រា​ជាមួយ Barcelona ​ដដែល បន្ទាប់​ពី​ម្ចាស់​ក្លិប​និង​កីឡាករ​មួយ​ចំនួន​ជួយ​និយាយ ​និង​ផ្ដល់​ប្រាក់​លើក​ទឹក​ចិត្ត។

ឧទាហរណ៍​មួយ​ទៀត​កាល​ពី​ឆ្នាំ​២០១០ ក្រុម​ Man Utd ​និង​ Bayern Munich ​លេច​ឮ​ថា​ព្រមព្រៀង​គ្នា​រួចរាល់​អស់​ហើយ​ក្នុង​ការ​ផ្ទេរ​កីឡាករ Bastian Schweinsteiger ​ពី Munich ​មក​ Old Trafford ​តែ​ចុង​បញ្ចប់​នៅ​តែ​ខ្សែ​បម្រើ​រូប​នេះ​នៅ​លេង​នៅ​អាល្លឺម៉ង់​ដដែល ដោយ​បន្ត​កុងត្រា​ត្រឹម​តែ​ពេល​២៤​ម៉ោង​ចុង​ក្រោយ​ប៉ុណ្ណោះ។

បើ​គេ​ក្រឡេក​មើល​ទៅ​លើ​ប្រាក់​បៀវត្សរ៍​ប្រចាំ​សប្ដាហ៍​របស់ Ramos ធៀប​នឹង​មិត្ត​រួមក្រុម​របស់​ខ្លួន​​នា​រដូវកាល ២០១៤/១៥ ឃើញ​ថា ​​ខ្សែ​ការពារ ​និង​កាន់​តួនាទី​ជា​អនុប្រធាន​ក្រុម (បន្ទាប់​ពី អ្នក​ចាំ​ទី​ដៃ​ស្អិត Iker Casillas) មាន​គំលាត​ខុស​គ្នា​ឆ្ងាយ ឬ​ជាង ២ដង​បើ​ធៀប​នឹង​ Ronaldo។

-Sergio Ramos   ប្រាក់​ប្រចាំ​អាទិត្យ​បាន ១៤០ ០០០ផោន (ជាប់​ពន្ធ) -Cristiano Ronaldo  ​ប្រាក់​ប្រចាំ​អាទិត្យ​បាន ២៨៨ ០០០ផោន (ក្រោយ​​ពន្ធ) -Gareth Bale  ប្រាក់​ប្រចាំ​អាទិត្យ​បាន ២៥៦ ​០០០ផោន (ជាប់​ពន្ធ)

មួយ​វិញ​ទៀត Real Madrid ​មុន​នឹង​អាច​ទិញ​​ខ្សែ​ការពារ​វ័យ​២៩​ឆ្នាំ​រូប​នេះ​​ពី Sevilla ​មក​បាន​កាល​ពី​ឆ្នាំ​ ២០០៥ ​គឺ​មិន​ងាយ​នោះ​ទេ ពោល​គឺ​ក្លិប​ត្រូវ​ពិភាក្សា​ជាមួយ​សាមី​ខ្លួន​ផង ​និង​ស្នើ​សុំ Sevilla ​ជា​ច្រើន​លើក​ទើប​អាច​បញ្ចុះបញ្ចូល​ឱ្យ​លក់​កីឡាករ​ពាក់​អាវ​លេខ​៤​នេះ​បាន។ ហើយ​រយៈ​ពេល​១០​ឆ្នាំ​មក​នេះ រូប​គេ​ក៏​បាន​ជួយ​ក្លិប​លើក​ពាន​មិន​តិច​នោះ​ដែរ ហើយ​ដោយ​សារ​តែ​មាន Ramos ​នេះ​ហើយ ទើប​អាច​ជួយ​អធិរាជ​ស​លើក​ពាន UEFA Champions League ​បាន​សម្រេច​ជា​លើក​ទី​១០​ក្នុង​ប្រវត្តិសាស្ត្រ​របស់​ក្លិប។

ហេតុ​ផល​ខាង​លើ​នេះ​ ស​បញ្ជាក់​ឱ្យ​ឃើញ​ថា​ក្នុង​វិស័យ​បាល់ទាត់ ប្រសិន​បើ​មិន​ទាន់​មាន​ការ​ចុះ​កុងត្រា​លើ​ក្រដាស​ស្នាម​អ្វី​ទេ​នោះ ​គឺ​អាច​ប្រែប្រួល​បាន​គ្រប់​វិនាទី​ទាំង​អស់ មិន​ថា​រឿង​អ្វី​នោះ​ទេ។ ដូច​ករណី Ramos ​កំពុង​រសើប​គ្រប់​កន្លែង​នេះ​អីចឹង​ថា​មាន​ភាគរយ​ខ្ពស់​នឹង​ទៅ​លេង​នៅ Man Utd ​បន្ទាប់​ពី​ចាកចេញ​ពី Real Madrid ​ប៉ុន្តែ​ក៏​អាច​និយាយ​បាន​ថា​នេះ​គ្រាន់​តែ​ជា​យុទ្ធសាស្ត្រ​របស់​ភ្នាក់ងារ​កីឡាករ​ដើម្បី​ចរចា​លក្ខខណ្ឌ​ផ្ទាល់​ខ្លួន​ជាមួយ​ក្លិប​ចាស់​ដើម្បី​បាន​ប្រាក់​ប្រចាំ​ឆ្នាំ​ច្រើន​ជាង​មុន​ក៏​ថា​បាន​ដែរ។

ចុះ​ចំពោះ​ប្រិយមិត្ត​វិញ គិត​ថា​រឿង​កំពូល​ខ្សែ​ការពារ Ramos ​ចាកចេញ​ពី Real ​ទៅ​ Man Utd ​នោះ​គឺ​ជា​រឿង​ពិត​ឬ​ជា​យុទ្ធសាស្ត្រ​របស់​កីឡាករ​ដើម្បី​ចរចា​ជាមួយ​ក្លិប​ចាស់?

ចុចអាន៖Ramos ​សុំ​ Real ​ដើរ​ចេញ ខណៈ​ Man Utd ​ឱ្យ​តម្លៃ​ខ្លួន​ជិត​៥៥​លាន​ដុល្លារ​

​ប្រែ​សម្រួល៖ មុន្នី រម្យ ប្រភព៖ goal, Marca