រកឃើញក្រុមខ្លាំង AK ថ្មីមួយទៀតត្រៀមប្រកួតមិត្តភាពជាមួយក្រុមម៉ាឡេស៊ី

2015-06-26 19:11:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ទីបំផុតក្រុម CriminalX បានជាប់ឈ្មោះជាបេក្ខភាពទី២ ដែលត្រូវចូលរួមប្រកួតមិត្តភាពអន្តរជាតិកីឡាអេឡិចត្រូនិច វិញ្ញាសាហ្គេម AK ជាមួយប្រទេសម៉ាឡេស៊ី ក្នុងដើមខែកក្ដដាខាងមុខនេះ ជាមួយក្រុមជើងខ្លាំងមួយទៀតគឺក្រុម Youwillknow បន្ទាប់ពីឈ្នះគ្រប់ប្រកួតក្នុងជម្រុះ (AK friendly Match) នៅព្រឹកថ្ងៃទី ២៦ ខែ មិថុនា ឆ្នាំ ២០១៥ នេះនៅ The Arena ជាន់ទី២ អាគារ BBWold ព្រះមុន្នីវង្ស។

ក្រុម CriminalX

យោងតាមលោក អ៊ៅ លីហ៊រ តំណាងគណៈកម្មការប្រកួតបានឱ្យដឹងថា តាមពិតក្រុម Youwillknow ជាក្រុមលេខ ៣ ក្នុងកីឡាអេឡិចត្រូនិកអន្តរជាតិ MATIC 2015 នៅប្រទេសចិនកាលពីដើមឆ្នាំ ត្រូវចាប់ដៃគូជាមួយ ក្រុម Secret ជាក្រុមជើងឯកក្នុងព្រឹត្តិការណ៍នេះដូចគ្នា។ ប៉ុន្តែគម្រោងត្រូវផ្លាស់ប្ដូរវិញដោយសារសមាជិករបស់ក្រុម Secret មួយចំនួនមានភារកិច្ចត្រូវបំពេញមិនអាចខកខានបាន ទើបក្រុមដកខ្លួនចេញ។

ការប្រកួតជម្រុះព្រឹកមិញនេះ មានក្រុមចូលរួមចំនួន ៤ ដែលសុទ្ធតែជើងខ្លាំងមានពិន្ទុច្រើនជាងគេក្នុងការប្រកួត Team Challage Sever ដែលបើកឱ្យក្រុមចូលរួមបង្ហាញសមត្ថភាពរាល់ថ្ងៃចាប់ពីម៉ោង ២ រសៀល ដល់ ៦ យប់។ ការប្រកួតនេះតម្រូវឱ្យក្រុមទាំង ៤ ជួបគ្នាទាំង ៣ ប្រកួត ហើយក្រុមមានពិន្ទុច្រើនជាងគេ នឹងមានឈ្មោះជំនួសឱ្យក្រុម Secret។ ក្រុមទាំង ៤ នោះមាន TKH_[Over], The_HeadShot, [G]-Dragon និងក្រុម CriminalX។

លទ្ធផលប្រកួតជម្រុះ
ផែនទី	ក្រុមប្រកួត
Sea-Maid Town	TKH_[Over]	០ – ៣	The_HeadShot
Huangpu Terminal	CriminalX	៣ – ០	[G]-Dragon
Huangpu Terminal	TKH_[Over]	០ – ៣	CriminalX
Huangpu Terminal	The_HeadShot	៣ – ២	[G]-Dragon
Sea-Maid Town	TKH_[Over]	០ – ៣	[G]-Dragon
Frontier City	The_HeadShot	០ – ៣	CriminalX

ក្រោយដណ្ដើមបាន ជ័យជម្នះ លោក លីអន ប្រធានក្រុម CriminalX បានប្រាប់ថា៖ «ការប្រកួតជម្រុះនេះមិនងាយស្រួលទេ តែជ័យជម្នះទាំងអស់នេះបានមកពីការសហការគ្នារបស់សមាជិកទាំងមូល ជាពិសេសការចេះជួយគ្នា យោគយល់គ្នា និង យល់ចិត្តគ្នា»។ លោកក៏ផ្ដាំផ្ញើអរគុណទៅខាងអ្នករៀបចំកម្មវិធី ដែលបង្កើតព្រឹត្តិការណ៍ប្រកួតនេះឡើង ដើម្បីឱ្យគ្រប់ក្រុមបានបង្ហាញស្នាដៃរបស់ខ្លួន។ ការប្រកួតមិត្តភាពអន្តរជាតិរវាងតំណាងក្រុមកម្ពុជា និង ម៉ាឡេស៊ី នឹងធ្វើឡើងតាម Sever អនឡាញ ដោយមានផ្សាយផ្ទាល់លើ Sabay TV។ សម្រាប់ក្រុមកម្ពុជាប្រកួតនៅ The Arena ហើយអ្នកចូលរួមទស្សនាការប្រកួតផ្ទាល់អាចនឹងឈ្នះរង្វាន់អនុស្សាវរីយ៍ផងដែរ។ ចំពោះការបរិច្ឆេទជាក់លាក់ខាងគណៈកម្មាការរៀបចំការប្រកួតនឹងជម្រាបជូនក្នុងពេលឆាប់ៗនេះ។