អ្នកជំនាញថា ប៉ែន ចំរុង ឡប់ដាច់គេ២ឆ្នាំចុងក្រោយ

2015-07-01 21:41:57
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកជំនាញខាងវិស័យភាពយន្តលោក ទិត្យ ធារិទ្ធ បានពោលសរសើរ តារាសម្ដែងវោហាមិនចេះរីងស្ងួត ប៉ែន ចំរុង ក្នុងកម្មវិធីក្រុងពាលីរឿង "អាមោកលក់មុំា" ថាជាតារាដែលពូកែសម្ដែងតួឡប់ៗដាច់គេ២ឆ្នាំចុងក្រោយនេះ។

អ្នកដឹកនាំរឿង ទិត្យ ធារិទ្ធ មានប្រសាសន៍ដូច្នេះ ក្រោយពីសង្កេតឃើញថា តារាមានដើមកំណើតនៅខេត្តបាត់ដំបងខាងលើនេះ ក្រសោបបានតំណែងតួឯកក្នុងរឿងបែបកំប្លែងមានចរិតឡិបឡុបស្ទើរទាំងអស់ក្នុងនារយៈកាលចុងក្រោយនេះ និងត្រូវបានគេប្រសិទ្ធិនាមជាតារាឡប់ៗ និងពេលខ្លះត្រូវគេហៅថា "អាឡប់" ទៀតផង"។

ប្រការនេះ លោក ធារិទ្ធ បានពន្យល់ថា ចំរុង មិនមែនប្រភេទជាតួកំប្លែងទេ ប៉ុន្តែជាតួម្នាក់ដែលពូកែសម្ដែង ពូកែចូលតួ និងមានគំនិតច្នៃប្រឌិតក្នុងការសម្ដែង ចេះបង្កើតតួថ្មីមួយតាមសាច់រឿង។ លោកថា តារាប្រុសរូបនេះ ហាក់មានទេពកោសល្យធម្មជាតិខាងសម្ដែងឡប់ៗ មានស្ទីល និងតិចនិកសម្ដែងអាចឆ្លើយតបនូវអ្វីដែលក្រុមការងារចង់បាន ខុសពីតារាមួយចំនួនទៀតដែលធម្មជាតិរបស់ពួកគេ ពិបាកចូលតួ។

ដូច្នេះហើយ តាមការសង្កេតរបស់លោក ២ឆ្នាំចុងក្រោយនេះ លោកសង្កេតឃើញថា ប៉ែន ចំរុង បានវ៉ាដាច់តារាប្រុសផ្សេងទៀត លើការសម្ដែងរបៀបឡប់ៗ ក្នុងនោះមានទស្សនិកជនគាំទ្រច្រើនទៀតផង។

"ក្រៅពីហ្នឹង ធម្មជាតិគាត់ពិបាកសម្ដែង ដូចពូរ៉ូអីចឹង យើងចង់ឲ្យគាត់លេងកំប្លែង តែគាត់ពិបាកនឹងធ្វើ តែដូចនេះ(ចំរុង) គាត់ងាយនឹងធ្វើ ដូចគាត់មានដុងពីធម្មជាតិអីចឹង។ អីចឹងពីរឆ្នាំចុងក្រោយ គាត់លេចធ្លោ...ខ្ញុំទទួលស្គាល់ថាគាត់អាចសម្ដែងបានក្នុងតួឡប់ៗ គឺគ្រាន់តែឡប់ៗទេ តែបើឲ្យលេងកំប្លែងឲ្យគេសើចមិនថាយ៉ាងម៉េចទេ!។ ទិត្យ ធារិទ្ធ ថ្លែង។

សាមីខ្លូនលោក ប៉ែន ចំរុង បានប្រាប់ថា លោកបានដឹងលឺខ្លះៗពីបញ្ហានេះ ហើយបានមានចំណាប់អារម្មណ៍ថា៖"ខ្ញុំសប្បាយចិត្តណាស់ព្រោះមួយរយៈចុងក្រោយនេះខ្ញុំទទួលបានការសម្ដែងបែបលក្ខណៈឡប់ៗចឹងច្រើនមែន។ បើត្រលប់ទៅ៨ឬ១០ឆ្នាំមុនខ្ញុំជាតួម្នាក់ដែលសម្ដែងជាតួត្រឹមត្រូវកម្សត់មនោសញ្ចេតនាទឹកភ្នែក គឺខ្ញុំធ្លាប់បានច្រើនមកហើយ"។

តារារូបនេះ បន្តថា ដំបូង មានការទើសទាល់ខ្លះដែរពេលដែលទស្សនិកជនហៅរូបលោកថាឡប់។ប៉ុន្តែពេលដែលគិតយូរ លោកបែរជាត្រេកអរវិញ ព្រោះយល់ថា ប្រិយមិត្តពេញចិត្តនឹងការសម្ដែងរបស់ខ្លួន ទើបពួកគេហៅបែបនេះ។ ចំរុង បន្ថែមថា "ខ្ញុំទទួលរាល់ការរិះគន់គ្រប់ទម្រង់រូបភាពទាំងអស់ អាចប្រាប់ខ្ញុំពេលដែលបានជួបផ្ទាល់ខលតាមទូរសព្ទឬតាមប្រព័ន្ធបណ្ដាញសង្គមហ៊្វេសប៊ុកឬតាមបណ្ដាញសារព័ត៌មាននានា"៕

អត្ថបទ៖ ថា ម៉ាលីដា