បើចង់ Trekking គួរយករបស់អ្វីតាមខ្លួនខ្លះហ្ន៎?

2015-07-10 22:50:28
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្វីជា Trekking? អ្នកធ្លាប់ Trekking ដែរឬទេ? មិត្តអ្នកអានខ្លះប្រហែលជាធ្លាប់ ខណៈអ្នកខ្លះបែបមិនដែលសាកល្បងទេ។ ពាក្យនេះចង់សំដៅទៅលើដំណើរកម្សាន្ត តាមភ្នំ តាមព្រៃប្រឹក្សា ដោយថ្មើរជើង។ចំពោះដំណើរកម្សាន្តនេះដែរ គឺគេបង្កើតឡើងសម្រាប់ផ្ដល់ជូន អ្នកចង់បានបទពិសោធន៍ថ្មី ប្លែកនិងអ្នកចូលចិត្តធម្មជាតិ ប៉ុន្តែអ្នកគួរយល់ដឹងដែរថា របស់អ្វីខ្លះគួរដាក់តាមខ្លួន?

លោកកាណាល់ អ្នកផ្ដល់ពត៌មានខាង Trekking នៅរមណីយដ្ឋានធម្មជាតិគិរីរម្យ ប្រាប់ថា ភ្ញៀវអាចដាក់របស់របរនានាដូចខាងក្រោម៖

សកម្មភាព Trekking នៅគិរីរម្យ

១. ទឹក ភេសជ្ជ និងអាហារ ពេលដើរព្រៃ ឬឡើងភ្នំ អ្នកដំណើរច្បាស់ជាស្រែកទឹក ដូច្នេះអ្នកត្រូវដាក់ទឹកឬភេសជ្ជជាប់ខ្លួន ១ដប ឬ ២ដបជានិច្ច។ ចំណែកអាហារក៏សំខាន់ដែរ ហើយអ្នកអាចដាក់អាហារក្រៀមញ៉ាំ កំដរមាត់ដើម្បីកុំឱ្យឆាប់ហេវហត់អស់កម្លាំង។

២. អាវដៃវែង បើទោះរដូវភ្លៀងឬក្ដៅ អ្នកត្រូវអាវឱ្យជិតៗ ព្រោះក្នុងព្រៃភ្នំ អាកាសធាតុត្រជាក់ ដែលអាចឱ្យអ្នកផ្ដាសាយ ឬឈឺ និងដើម្បីការពារសត្វល្អិតផងដែរ។

៣. ថ្នាំការពារ

-ថ្នាំការពារសត្វល្អិតទិចឬខាំ៖ ក្នុងព្រៃសំបូរសត្វល្អិតច្រើន ដែលបង្កឱ្យមានការព្រួយបារម្ភ ម៉្លោះហើយថ្នាំការពារសត្វល្អិត ជារបស់ដែល Trekker មិនគួរមើលរំលង។

-ថ្នាំបង្ការជំងឺ៖ ដើរព្រៃភ្នំអាចកើតជំងឺផ្សេងៗ ដូចជាគ្រុនក្ដៅ ឈឺក្បាល កើតខ្យល់ និងរាករូសជាដើម។ កុំចោលថ្នាំប្រភេទនេះឱ្យសោះ។

-ថ្នាំរបួស៖ អំឡុងពេលធ្វើដំណើរកម្សាន្ត Trekker អាចដួលដាច់រលាត់ស្បែក ឬមុត ដូច្នេះអ្នកត្រូវដាក់ថ្នាំលាប និងលាងរបួសតាមខ្លួន។

៤. អាវភ្លៀង និង ឆត្រ

នៅតាមតំបន់ព្រៃភ្នំ អាកាសធាតុមានការប្រែប្រួល ដូចនេះសូមកុំចោលអាវភ្លៀវឱ្យសោះ។ សម្រាប់ខែក្ដៅ ភ្លៀវអាចយកឆត្រទៅជាមួយ។

៥. ផ្សេងៗ ចំណុចនេះ Trekker អាចយករបស់ផ្សេងៗជាប់ខ្លួនដូចជា ខ្សែ ដែកកេះ កន្ត្រៃ កូនកាំបិត ជាដើម ទុកប្រើប្រាស់ក្នុងពេលចាំបាច់ណាមួយ។

លោកកាណាល់និយាយថា នៅគិរីរម្យមានតំបន់ Trekking ចំនួនពីរ គឺវង្សតូចចម្ងាយ៥គីឡូ ដើររយៈ ២ ទៅ ៣ ម៉ោង រីឯវង្សធំចម្ងាយ ១០គីឡូម៉ែត្រ ដើរប្រហែល ៤ ទៅ ៥ ម៉ោង។ លោកថាអ្នកដំណើរ ត្រូវពាក់អាវវែង ស្បែកជើងឃ្លុប ស្រោមជើង ឱ្យបានត្រឹមត្រូវ ជៀសវាងពាក់អាវដៃខ្លី និងស្បែកជើងសង្រែក។ មួយទៀត Trekker គួរកាន់មែកឈើ ឬដំបងមួយក្នុងដៃ ដើម្បីទប់លំនឹង និងការពារសត្វផ្សេងៗ។

៦តំបន់នៅ កំពត ទេសភាពអស់ទាស់ អ្នកទេសចរណ៍ពិបាកបំភ្លេច

អត្ថបទ៖ អ៊ុំ សុភក្តិ