ក្មេងប្រុសម្នាក់យំស្ទើរគាំង ពេលដឹងថា Van Persie ចាកចេញពី Man Utd
- 2015-07-12 23:11:38
- ចំនួនមតិ 0 | ចំនួនចែករំលែក 0
ក្មេងប្រុសម្នាក់យំស្ទើរគាំង ពេលដឹងថា Van Persie ចាកចេញពី Man Utd
ចន្លោះមិនឃើញ
នៅថ្ងៃអាទិត្យនេះ ខ្សែប្រយុទ្ធសញ្ជាតិហុល្លង់ Robin van Persie ដែលរួមទ្រនំជាមួយក្រុមបិសាចក្រហម Manchester United តាំងពីឆ្នាំ២០១២ នឹងចាកចេញទៅក្រុង Istanbul ប្រទេសទួរគី ដើម្បីបំពេញសំណុំលិខិតផ្ទេរចុងក្រោយ។ ដំណឹងនេះ បានធ្វើឲ្យអ្នកគាំទ្រជាច្រើនហាក់មិនសប្បាយចិត្ត ហើយក្មេងតូចម្នាក់ក្នុងចំណោមនោះបានយំស្ទើរគាំង ពេលដឹងថាតារាក្នុងចិត្តខ្លួនចាកចេញពី Old Trafford។
ក្មេងតូចដែលជាអ្នកគាំទ្រក្រុមបិសាចក្រហមរូបនេះឈ្មោះ Louis Diamond ទើបមានអាយុ ៤ឆ្នាំប៉ុណ្ណោះ ប៉ុន្តែបែរជាមានអារម្មណ៍ស្រណោះចំពោះកីឡាករម្នាក់ស្ទើរមិនគួរឲ្យជឿ។ អ្នកគាំទ្រវ័យក្មេងរបស់ក្រុមលោក Louis van Gaal រូបនេះ បានសម្រក់ទឹកភ្នែក ដោយភាពរំជើបរំជួលកាលពីយប់មិញ នៅពេលទទួលដំណឹងថាខ្សែប្រយុទ្ធ Van Persie នឹងចាកចេញពីក្រុម។
ឪពុកម្ដាយរបស់ក្មេងតូច បានផ្ដិតយកទិដ្ឋភាពនេះ រួចបង្ហោះចូលបណ្ដាញសង្គម ធ្វើឲ្យមនុស្សជាច្រើនកើតក្ដីអាណិត។ ឪពុករបស់ Louis លោក Sam Diamond គឺជាអ្នកគាំទ្រម្នាក់របស់ក្រុម Manchester United តាំងពីដើមរៀងមក ហើយកូនប្រុសរបស់លោក រួមទាំងប្អូនស្រីពីរនាក់ទៀត Charlie(អាយុ ៣ឆ្នាំ) Sonny(អាយុ ១០ខែ) ក៏អាចជាអ្នកគាំទ្រក្រុមបិសាចក្រហមដែរ ព្រោះលោកបានបញ្ចូលឈ្មោះរួចទៅហើយ។
“ខ្ញុំកើតនៅ Manchester ដូច្នេះហើយ ក្រុម Manchester United គឺជាឈាមរបស់ខ្ញុំ"។ ឪពុកវ័យ ៣៥ឆ្នាំបញ្ជាក់។ លោកបានបន្តទៀតថា "ជាយូរមកហើយ Louis អាចចាំបានថា យើងច្រៀងចម្រៀងបាល់ទាត់ជាមួយគ្នា ហើយនៅពេលយើងលេងបាល់នៅសួន គេធ្វើជា Robin van Persie ឯខ្ញុំវិញធ្វើជាអ្នកចាំទី David de Gea”។
ខ្សែប្រយុទ្ធជម្រើសជាតិហុល្លង់ Robin van Persie តែងតែជាវីរបុរសក្នុងចិត្ត Louis ដូចនេះហើយទើបគេពិបាកចិត្តខ្លាំង ពេលឮដំណឹងចាកចេញទៅរួមអាជីពជាមួយក្រុមថ្មីនៅទួរគី Fenerbahce៕
ចុចអាន៖ Man Utd លក់ Van Persie ទៅឲ្យក្លិបមួយក្នុងលីកកំពូលទួរគី
ប្រែសម្រួល៖ គង់ វិសាល ប្រភព៖ Mirror