លោកគ្រូ ជ័យ ថាវី បង្ហើបគន្លឹះប្រឡងជាប់បាក់ឌុបឆ្នាំនេះ
- 2015-07-13 16:14:40
- ចំនួនមតិ 0 | ចំនួនចែករំលែក 0
លោកគ្រូ ជ័យ ថាវី បង្ហើបគន្លឹះប្រឡងជាប់បាក់ឌុបឆ្នាំនេះ
ចន្លោះមិនឃើញ
នៅថ្ងៃ២៤សីហា ឆ្នាំ២០១៥ ការប្រលងបាក់ឌុបនឹងចាប់ផ្ដើម ដែលការប្រលងនៅតែរឹតបន្តឹងដូចឆ្នាំមុនដែរ។ លោក ជ័យ ថាវី គ្រូបង្រៀននៅសាលាជ័យថាវី បានផ្ដល់ជាគន្លឹះសំខាន់ៗសម្រាប់សិស្សដើម្បីជាទុនប្រលងជាប់បាក់ឌុបឆ្នាំនេះ។
លោកគ្រូ ជ័យ ថាវី កំពុងបង្រៀនសិស្ស
លោកគ្រូ បានផ្ដល់ជាដំបូន្មានថា ការប្រលងគឺក្រសួងបានចេញសេចក្ដីប្រកាសរួចហើយថាមិនអនុញ្ញាតឲ្យលួចចម្លងឬបើកសំណៅឯកសារឡើយ ដូច្នេះសិស្សត្រូវខិតខំប្រឹងប្រែងរៀនសូត្រ ក្រៅពីរៀននៅសាលា ត្រូវរៀនបន្ថែមនៅផ្ទះដោយអនុវត្តលំហាត់កិច្ចការឲ្យបានច្រើន។ ត្រូវរៀនគុណចែកលេខឬសការេឲ្យបានច្បាស់ ដោយសារក្រសួងមិនអនុញ្ញាតឲ្យប្រើម៉ាស៊ីនគិតលេខឡើយ។ លើសពីនេះ គួរស្វែងរកវិញ្ញាសាធ្លាប់ចេញប្រលងរួចមកមើលឡើងវិញ ដើម្បីដឹងពីតិចនិកនៃវិញ្ញាសា និងប្រឹងស្វ័យសិក្សាឲ្យបានច្រើនជារៀងរាល់ថ្ងៃ។
លោក គ្រូ បានបន្ថែមថា សិស្សភាគច្រើននៅតាមខេត្តមានការព្រួយបារម្ភខ្លាចមិនអាចទទួលចំណេះដឹងបានដូចសិស្សនៅទីក្រុងពេលប្រលងបាក់ឌុបនេះ ខ្លះចង់ឡើងមកភ្នំពេញរៀននឹងគេប៉ុន្តែគ្មានប្រាក់ តែលោកគ្រូថា សូមកុំបារម្ភអី ដោយសារនៅពេលលោកគ្រូឃើញវិញ្ញាសាល្អៗ លោកគ្រូផុសតាមអ៊ីនធឺណេតដែរ ដូច្នេះពួកគេអាចយកទៅមើលបន្ថែមបាន។ ម្យ៉ាងទៀត លោកគ្រូថា ទោះរៀនជាមួយលោកគ្រូ ឬរៀននៅទីណាក៏អាចមានសមត្ថភាពដូចគ្នាព្រោះនៅតាមខេត្តបច្ចុប្បន្នមានគ្រូល្អៗច្រើនណាស់មកបង្រៀន ព្រមទាំងមានឯកសារបង្រៀនប្រហាក់ប្រហែលនឹងលោកគ្រូដែរទេ។ "ការប្រលងនឹងទទួលបានជោគជ័យ ប្រសិនសិស្សប្រឹងប្រែងរៀនជាប់លាប់និងយកចិត្តទុកដាក់ស្ដាប់គ្រូពន្យល់ ទោះរៀននៅទីណាមិនសំខាន់ដែរ។ ហើយបើប្រឹងរៀនទោះវិញ្ញាសាបែបណា ចេញច្រកណាក៏សិស្សអាចធ្វើបានដែរ បើសិស្សពិតជាបានសិក្សារៀនសូត្រអំឡុងមុនបាក់ឌុបនេះមែន "។
ក្រសួងអប់រំយុវជននិងកីឡា បានប្រកាសថា ការប្រឡងមធ្យមសិក្សាទុតិយភូមិឬបាក់ឌុប នៅឆ្នាំ២០១៥ នេះ នឹងបន្តអនុវត្តទៅតាមគោលការណ៍កំណែទម្រង់ដដែល ប៉ុន្តែមិនមានការប្រឡងជាលើកទី២ ដូចឆ្នាំមុនទៀតទេ ។ ចំពោះការប្រឡងបាក់ឌុបលើកទី១ នៅឆ្នាំ២០១៤ មានបេក្ខជនប្រឡងជាប់តែចំនួន ២៣១២៦ នាក់ប៉ុណ្ណោះ ដែលស្មើនឹង ២៥,៧២ ភាគរយនៃចំនួនបេក្ខជនចូលរួមប្រឡង សរុបចំនួន ៨៩៩៣៧ នាក់ហើយការប្រឡងនេះទៀតសោតមានសិស្សជាប់និទ្ទេស «A» ត្រឹមតែ ១១ នាក់ប៉ុណ្ណោះ។ ចំណែកឯការប្រឡងលើក ទី២ មានសិស្សប្រឡងជាប់ចំនួន ១៧,៩៤ ភាគរយ ក្នុងចំណោមបេក្ខជនដែលប្រឡងសរុបជាង ៦៨ ០០០ នាក់៕
សូមអាន ៖ លោក ជ័យ ថាវី គ្រូបង្រៀនគួរល្បីឈ្មោះប្រចាំនៅកម្ពុជា ជានរណា?
អត្ថបទ៖ លឹម សុនា