ប្រទេស៣នៅអាស៊ានធ្លាប់មានមេដឹកនាំស្រីក្រោយសង្គ្រាមលោកលើកទី២

2015-07-14 23:15:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសនីមួយៗនៅតំបន់អាស៊ាន សុទ្ធតែមានប្រវត្តិសាស្ត្ររាប់ពាន់ឆ្នាំ និងប្ដូរមេដឹកនាំរាប់មិនអស់ ប៉ុន្តែកម្រឃើញមានមនុស្សស្រីណាស់។ យ៉ាងណាមិញ បើគិតត្រឹមក្រោយសង្គ្រាមលោកលើកទីពីរ ពោលគឺចាប់ពីឆ្នាំ១៩៤៥មក មានប្រទេសបីប៉ុណ្ណោះក្នុងតំបន់អាស៊ាន ដែលធ្លាប់មានមេដឹកនាំស្រី(ប្រធានាធិបតី ឬនាយករដ្ឋមន្ត្រី)។

១. ប្រទេសឥណ្ឌូណេស៊ី(មាន ១រូប)

លោកស្រី Megawati Sukarnoputri ជាប្រធានាធិបតីទី៥ និងជាមេដឹកនាំស្រីម្នាក់គត់របស់ប្រទេសឥណ្ឌូណេស៊ី ក្រោយសង្គ្រាមលោកលើកទី២។ មេដឹកនាំវ័យ ៦៨ឆ្នាំរូបនេះ ជាកូនស្រីបងគេរបស់លោក Sukarno ដែលជាប្រធានាធិបតីទីមួយរបស់ប្រទេសឥណ្ឌូណេស៊ី។ លោកស្រី Megawati ជាប់ឆ្នោតឡើងកាន់តំណែងចាប់ពីឆ្នាំ ២០០១ ដល់ឆ្នាំ២០០៤ ហើយក្រោយៗមកទៀតលោកស្រីបានឈរឈ្មោះដែរតែបរាជ័យ។

២. ប្រទេសថៃ(មាន ១រូប)

លោកស្រី Yingluck Shinawatra គឺជានាយករដ្ឋមន្ត្រីស្រីទីមួយរបស់ប្រទេសថៃ ដែលឡើងកាន់តំណែងកាលពីខែសីហា ឆ្នាំ២០១១ រហូតដល់ខែឧសភា ឆ្នាំ២០១៤។ ដឹកនាំប្រទេសបានជិត ៣ឆ្នាំ សមាជិកគណបក្ស Pheu Thai វ័យ៤៨ឆ្នាំរូបនេះ ត្រូវតុលាការធម្មនុញ្ញសម្រេចដកចេញពីតំណែង បន្ទាប់ពីរកឃើញថាលោកស្រីប្រើប្រាស់អំណាចដោយបំពាន។

៣. ប្រទេសហ្វីលីពីន(មាន ២រូប)

- លោកស្រី Corazon Aquino

លោកស្រី Corazon Aquino គឺជាប្រធានាធិបតីទី១១ របស់ប្រទេសហ្វីលីពីន ដែលឡើងកាន់តំណែងកាលពីថ្ងៃទី២៥ ខែកុម្ភៈ ឆ្នាំ១៩៨៦ រហូតដល់ថ្ងៃទី៣០ ខែមិថុនា ឆ្នាំ១៩៩២។ អតីតមេដឹកនាំវ័យ ៧៦ឆ្នាំរូបនេះ មានកូនប្រុសឈ្មោះ Benigno Aquino III ដែលប្រធានាធិបតីទី១៥ របស់ប្រទេសហ្វីលីពីននាពេលបច្ចុប្បន្ន។

- លោកស្រី Gloria Macapagal-Arroyo

លោកស្រី Gloria Macapagal-Arroyo គឺជាប្រធានាធិបតីទី១៤ របស់ប្រទេសហ្វីលីពីន ដែលឡើងកាន់តំណែងកាលពីថ្ងៃទី២០ ខែមករា ឆ្នាំ២០០១ រហូតដល់ថ្ងៃទី៣០ ខែមិថុនា ឆ្នាំ២០១០។ អតីតមេដឹកនាំវ័យ ៦៨ឆ្នាំរូបនេះ គឺជាកូនស្រីរបស់ប្រធានាធិបតីទី៩ Diosdado Macapaga។

ចុចអាន៖ បុគ្គលឆ្នើមពីររូបគត់នៅអាស៊ាន ជាម្ចាស់ពានរង្វាន់ណូបែលសន្តិភាព

ដោយ៖ គង់ វិសាល ប្រភព៖ asianhistory