បុគ្គលឆ្នើមពីររូបគត់នៅអាស៊ាន ជាម្ចាស់ពានរង្វាន់ណូបែលសន្តិភាព

2014-10-17 18:49:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានរង្វាន់ណូបែលសន្តិភាពអន្តរជាតិ ត្រូវបានប្រគល់ជូនបុគ្គលឆ្នើមនានាដែលលះបង់កម្លាំងកាយចិត្ត ស្វែងរកប្រយោជន៍ជូនសង្គមជាតិ និងពិភពលោកទាំងមូល។ ជនទាំងឡាយ ដែលទទួលបានជយលាភីកំពូលក្នុងលោកនេះ ពោរពេញទៅដោយកិត្តិនាមល្បីរន្ទឺគ្រប់ទិសទី។ អាស៊ានដែលមាន ១០ប្រទេសជាសមាជិក ក៏មានបុគ្គលពីររូបធ្លាប់ទទួលបានពានរង្វាន់កិត្តិយសនេះដែរ។

បុគ្គលឆ្នើមពីររូបរបស់អាស៊ាន ដែលទទួលពានរង្វាន់ណូបែលសន្តិភាពនោះមាន ជនជាតិវៀតណាមម្នាក់ និងជនជាតិមីយ៉ាន់ម៉ាម្នាក់។ អ្វីដែលកាន់តែគួរឲ្យចាប់អារម្មណ៍ខ្លាំង គឺម្ចាស់ជយលាភីទាំងពីររូប សុទ្ធតែត្រូវជាប់ឈ្មោះក្នុងកំណត់ត្រាប្រវត្តិសាស្ត្រប្លែកគេនៃពានរង្វាន់ណូបែល។ លោក Le Duc Tho (ជនជាតិវៀតណាម) ជាបុគ្គលមួយរូបក្នុងចំណោមម្ចាស់ពានរង្វាន់ ២រូប ដែលបដិសេធមិនទទួលយកពានរង្វាន់របស់ខ្លួន។ ចំណែកលោកស្រី Aung San Suu Kyi (ជនជាតិមីយ៉ាន់ម៉ា) គឺជាបុគ្គលមួយរូបក្នុងចំណោមម្ចាស់ពានរង្វាន់ ៣រូប ដែលកំពុងជាប់ឃុំឃាំងពេលប្រកាសផ្ដល់ពានរង្វាន់។

១. លោក Le Duc Tho (ជនជាតិវៀតណាម)

លោក Le Duc Tho

លោក Le Duc Tho កើតនៅថ្ងៃទី១៤ ខែតុលា ឆ្នាំ១៩១១ និងស្លាប់ទៅវិញនៅថ្ងៃទី១៣ ខែតុលា ឆ្នាំ១៩៩០។ ជនជាតិវៀតណាមរូបនេះ ជាបុគ្គលដំបូងគេនៅអាស៊ី ដែលត្រូវគណៈកម្មការសម្រេចផ្ដល់ពានរង្វាន់ណូបែលសន្តិភាព។

មូលហេតុដែលលោកត្រូវជ្រើសរើសជាម្ចាស់ជយលាភី គឺដោយសារលោកជាបុគ្គលសំខាន់មួយរូបដែលនាំឲ្យមានកិច្ចព្រមព្រៀងសន្តិភាពទីក្រុងប៉ារីសនៅថ្ងៃទី២៣ ខែមករា ឆ្នាំ១៩៧៣ បញ្ចប់ជម្លោះរវាងវៀតណាមខាងជើង និងវៀតណាមខាងត្បូង ហើយនិងបញ្ឈប់ការជ្រៀតជ្រែកពីទាហានអាមេរិក។ ក្នុងឱកាសនោះ ក៏មានការចូលរួមពីភាគីអាមេរិកតំណាងដោយរដ្ឋមន្ត្រីការបរទេស Henry Kissinger ផងដែរ។

លោក Le Duc Tho និងលោក Henry Kissinger ត្រូវបានគណៈកម្មការប្រកាសប្រគល់ពានរង្វាន់ណូបែលសន្តិភាពរួមគ្នាក្នុងឆ្នាំ១៩៧៣ ដដែល។ ទោះយ៉ាងណា ជនជាតិវៀតណាមដែលជួយសាងសន្តិភាពបង្រួបបង្រួបវៀតណាមទាំងពីរ បានបដិសេធមិនទទួលយករង្វាន់កិត្តិយសនោះទេ។ លោកបានបញ្ជាក់ថា សន្តិភាពមិនទាន់កើតឡើងនៅឡើយ ហើយសហរដ្ឋអាមេរិក និងរដ្ឋាភិបាលវៀតណាមខាងត្បូង នៅតែរំលោភបំពានកិច្ចព្រមព្រៀងសន្តិភាពទីក្រុងប៉ារីស។

២. លោកស្រី Aung San Suu Kyi (ជនជាតិមីយ៉ាន់ម៉ា)

លោកស្រី Aung San Suu Kyi

លោកស្រី Aung San Suu Kyi កើតនៅថ្ងៃទី១៩ ខែមិថុនា ឆ្នាំ១៩៤៥។ បច្ចុប្បន្នលោកស្រីគឺជាមេដឹកនាំគណបក្សសម្ព័ន្ធប្រជាធិបតេយ្យ ដែលជាគណបក្សប្រឆាំងដ៏ធំមួយរបស់មីយ៉ាន់ម៉ា។ នៅថ្ងៃទី២៧ ខែមិថុនា ឆ្នាំ១៩៩០ គណបក្សរបស់លោកស្រី Suu Kyi បានទទួលសំឡេងគាំទ្រការបោះឆ្នោតជាតិ៥៩% និង៨១% នៃការបោះឆ្នោតជ្រើសរើសសមាជិកសភា។

ទោះយ៉ាងណា ពេលនោះអ្នកនយោបាយស្រីដ៏មានឥទ្ធិពលរូបនេះ បានជាប់ឃុំឃាំងដោយរបបយោធាបាត់ទៅហើយ។ ចន្លោះពីថ្ងៃទី២០ ខែកក្កដា ឆ្នាំ១៩៨៩ រហូតដល់មានការដោះលែងលើកចុងក្រោយថ្ងៃទី១៣ ខែវិច្ឆិកា ឆ្នាំ២០១០ លោកស្រី Suu Kyi ត្រូវជាប់ឃុំខ្លួនជាច្រើនដងសរុបរយៈពេល ១៥ឆ្នាំ។

មូលហេតុដែលលោកស្រីត្រូវជ្រើសរើសជាម្ចាស់ជយលាភីពានរង្វាន់ណូបែលសន្តិភាពក្នុងឆ្នាំ១៩៩១ គឺដោយសារលោកស្រី Aung San Suu Kyi បានតស៊ូទាមទារលទ្ធិប្រជាធិបតេយ្យដោយអហិង្សា និងស្វែងរកការគោរពសិទ្ធិមនុស្សក្នុងប្រទេសមីយ៉ាន់ម៉ា។ ប៉ុន្តែ អំឡុងពេលកំពុងប្រកាសជយលាភីជាម្ចាស់ពានរង្វាន់ សមាជិកសភាជាប់ឆ្នោតក្នុងឆ្នាំ២០១២ រូបនេះ កំពុងជាប់ឃុំឃាំងនៅឡើយ។ ទីបំផុត នៅថ្ងៃទី១៦ ខែមិថុនា ឆ្នាំ២០១២ លោកស្រីបានទៅទទួលយកពានរង្វាន់ណូបែលសន្តិភាពរបស់ខ្លួន ដែលមានរយៈពេល ២១ឆ្នាំក្រោយពេលគណៈកម្មការប្រកាសប្រគល់ឲ្យ៕

ប្រវត្តិពានរង្វាន់ណូបែលអន្តរជាតិ ដែលមនុស្សគ្រប់រូបតែងស្រមៃចង់បាន៖ ចុចអាន

នារីវ័យក្មេងបំផុតក្នុងប្រវត្តិសាស្ត្រ ទទួលបានពានរង្វាន់ណូបែលសន្តិភាព៖ ចុចអាន

ប្រែសម្រួល៖ គង់ វិសាល

ប្រភព. nobelprize, dailymail