ស្លាប់ ៨០% ក្នុងគ្រោះថ្នាក់ចរាចរណ៍ ជាអ្នកជិះម៉ូតូអត់ពាក់មួកការពារ

2015-07-16 12:13:31
ចំនួនមតិ 0 | ចំនួនចែករំលែក 0

ចន្លោះមិនឃើញ

តួលេខអ្នកស្លាប់ (អ្នកជិះម៉ូតូ) ដែលមិនបានពាក់មួកសុវត្ថិភាព ក្នុងគ្រោះថ្នាក់ចរាចរណ៍ ក្នុងមួយឆ្នាំៗ គឺមានចំនួនប្រហែលពី ៧០% ទៅ ៨០% ក្នុងចំនួនអ្នកស្លាប់ជិះម៉ូតូសរុប។ នេះបើតាមការដឹងពី លោក គឹម បញ្ញា នាយកអង្គការមូលនិធិបង្ការរបួស អាស៊ី ប្រចាំនៅកម្ពុជា។

លោក គឹម បញ្ញា មានប្រសាសន៍ថា ជាទូទៅក្នុងមួយឆ្នាំៗ អ្នកបើកបរម៉ូតូចន្លោះពី ១២០០ នាក់ - ១៦០០ នាក់ បានស្លាប់ដោយគ្រោះថ្នាក់ចរាចរណ៍ ហើយក្នុងនេះប្រហែល ៧០% ទៅ ៨០% ជាអ្នកមិនបានពាក់មួកការពារ។

លោក គឹម បញ្ញា នាយកអង្គការមូលនិធិបង្ការរបួស អាស៊ី ប្រចាំនៅកម្ពុជា

ក្នុងវេទិកាថ្នាក់និពន្ធនាយកសារព័ត៌មាន ស្ដីពី "រួមគ្នាជំរុញការពាក់មួកសុវត្ថិភាពនៅកម្ពុជា" គម្រោង "ភ្នាក់ងារជំរុញឱ្យមានការប្រែប្រួលជាវិជ្ជមាន" រៀបចំឡើងដោយ ក្លឹបអ្នកកាសែតកម្ពុជា សហការជាមួយអង្គការ AIP នៅ សណ្ឋាគារ Intercontinental ព្រឹកថ្ងៃទី ១៥ ខែ កក្ដដា ម្សិលមិញ លោកថ្លែងថា ចាប់តាំងពីឆ្នាំ ២០០៤ មក គ្រោះថ្នាក់ចរាចរណ៍ ជាបញ្ហាចម្បងនៅទូទាំងពិភពលោក ដែលបង្កឱ្យមនុស្សស្លាប់ របួស ពិការរាប់ពាន់រាប់ម៉ឺននាក់។ ចំណែកនៅកម្ពុជា បើតាមរបាយការណ៍បណ្ដោះអាសន្ន របស់គណៈកម្មាធិការជាតិ សុវត្ថិភាពចរាចរណ៍ផ្លូវគោក មានជនរងគ្រោះជាង ២០០០ នាក់ បានស្លាប់ ដែលនេះជាចំនួនកើនឡើង ១០០% ក្នុងរយៈពេល៩ឆ្នាំចុងក្រោយ។

លោកបន្ថែមថា "ស្របពេលដែលយើងកត់សម្គាល់ឃើញថា អត្រាការស្លាប់នៃជំងឺផ្សេងៗដូចជា គ្រាប់មីន គ្រុនចាញ់ អេដស៍ មានការធ្លាក់ចុះ បែរជាអ្នកស្លាប់ដោយគ្រោះថ្នាក់ចរាចរណ៍មានកំណើន"។

លោកបន្តថា តាមអ្វីដែលអង្គការ មូលនិធិបង្ការរបួសអាស៊ី រកឃើញ គឺអ្នកស្លាប់ដោយគ្រោះថ្នាក់ចរាចរណ៍មានចំនួន ៣០ ដង ច្រើនជាងអ្នកស្លាប់ដោយសារ ជំងឺគ្រុនចាញ់ គ្រុនឈាម គ្រាប់មីនបញ្ចូលគ្នា ហើយជនរងគ្រោះជិះម៉ូតូមិនដល់ ២០% ទេ ដែលបានពាក់មួកសុវត្ថិភាព។ ជនរងគ្រោះភាគច្រើន ស្លាប់ដោយការប៉ះទង្គិចក្បាល។

ដើម្បីកាត់បន្ថយអត្រាមរណភាព ក្នុងគ្រោះថ្នាក់ចរាចរណ៍ អង្គការ AIP បានបង្កើតគម្រោងបី ទី១ គម្រោង "មួកសុវត្ថិភាពមួយ ជួយជីវិតបានម្នាក់" ទី២ គម្រោង "សុវត្ថិភាពចរាចរណ៍លើដងផ្លូវ សហគមន៍មានសុវត្ថិភាព" និង ទី៣ គម្រោង " ភ្នាក់ងារជំរុញឱ្យមានការប្រែប្រួលជាវិជ្ជមាន" ក្នុងបំណងជួយបង្កើនការយល់ដឹង ដល់ពលរដ្ឋខ្មែរ និង បានធ្វើសកម្មភាពចែកចាយមួកសុវត្ថិភាព នៅតំបន់នានាក្នុងប្រទេសកម្ពុជា។

ច្បាប់ចរាចរណ៍ផ្លូវគោកថ្មី ដែលតម្រូវឲ្យអ្នករួមដំណើរ គិតទាំងកុមារអាយុចាប់ពី ៣ ឆ្នាំឡើងទៅ ពាក់មួកសុវត្ថិភាព បានអនុម័តហើយ កាលពី ខែមករា ឆ្នាំ ២០១៥ តែមិនទាន់អនុវត្តនៅឡើយ ហើយច្បាប់នេះនឹងចាប់អនុវត្តនៅដើមឆ្នាំ២០១៦។

ជាមធ្យមអ្នកស្លាប់ក្នុងគ្រោះថ្នាក់ចរាចរណ៍ទូទៅមាន ៦នាក់ ក្នុងមួយថ្ងៃ ហើយចំនួននេះនឹងកើនឡើង ប្រសិនបើគ្មានវិធានការទប់ស្កាត់សមស្រប។ បើសិនច្បាប់នេះត្រូវបានអនុវត្តប្រកបដោយប្រសិទ្ធភាព ក្នុងឆ្នាំ ២០១៥ នេះ អង្គការខាងលើរំពឹងថា អត្រានៃការពាក់មួកសុវត្ថិភាព ក្នុងចំណោមអ្នករួមដំណើរ តាមទោចក្រយានយន្ត នឹងកើនឡើងពី ៧% ដល់ ៥៥% ក្នុងឆ្នាំ ២០១៥ ហើយបន្តកើន ៥% នៅរាល់ឆ្នាំបន្ទាប់។

ក្នុងឱកាសនេះដែរលោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអនុប្រធាន គណៈកម្មាធិការជាតិ សុវត្ថិភាពចរាចរណ៍ផ្លូវគោក ថ្លែងថា កាលពីឆ្នាំទៅមិញ អ្នកស្លាប់ទូទៅក្នុងគ្រោះថ្នាក់ចរាចរណ៍ មានជាង ២០០០ នាក់ ហើយលោកជំទាវបន្ថែមទៀតថា គ្រោះថ្នាក់ចរាចរណ៍ ធ្វើឱ្យរដ្ឋខាតបង់ថវិកាជាតិជាង ៣០០ លានដុល្លារក្នុងមួយឆ្នាំៗ។

គួរបញ្ជាក់ថា នៅឆ្នាំ២០១៤ មានគ្រោះថ្នាក់ចរាចរណ៍ចំនួន ៤.៦៤៥ ករណី និងជនរងគ្រោះចំនួន ១៥.៣១៥ នាក់។ ក្នុងចំណោមជនរងគ្រោះមានអ្នកស្លាប់ចំនួន ២.២២៦ នាក់ និងរបួសធ្ងន់ ៦.០០៥ នាក់ (គិតជាមធ្យមភាគមានអ្នកស្លាប់ច្រើនជាង ៦នាក់ និងរបួសធ្ងន់ជិត ១៧នាក់ក្នុងមួយថ្ងៃ)។ ចំនួនអ្នកស្លាប់បានកើនឡើង ១៤% និងអ្នករបួសធ្ងន់បានកើនឡើង ៦% បើធៀបនឹងឆ្នាំ២០១៣។

លោក កៃ គឹមសុង និពន្ធនាយកកាសែតភ្នំពេញប៉ុស្ដិ៍

ក្រោយទទួលតួលេខពីចំនួនអ្នកស្លាប់ ២.២២៦ នាក់ លោក កៃ គឹមសុង និពន្ធនាយកកាសែតភ្នំពេញប៉ុស្ដិ៍ បានសម្ដែងក្ដីរន្ធត់ដោយលើកឡើងថា ចំនួននេះស្មើនឹងជនរងគ្រោះស្លាប់ ក្នុងឧប្បត្តិហេតុធ្លាក់យន្តហោះចំនួនប្រាំ។ យ៉ាងណាលោកនិយាយថា អ្នកសារព័ត៌មាន ត្រូវតែបន្តជួយលើបញ្ហានេះ តាមរយៈការផលិតជាអត្ថបទ និងរូបភាព ដើម្បីឆ្លុះបញ្ចាំងពីផលប៉ះពាល់នៃគ្រោះថ្នាក់ចរាចរណ៍។ ចំណែកទូរទស្សន៍ និង វិទ្យុ អាចធ្វើជាស្ពត ឬនិពន្ធជារឿងខ្លីៗ ដើម្បីដាស់តឿន និងណែនាំឱ្យ ពលរដ្ឋខ្មែរ ឱ្យយល់ពីតម្លៃជីវិត និងចេះពាក់មួកសុវត្ថិភាពការពារ ពេលបើកបរ។

ខាងក្រោមនេះ គឺជា រូបភាព គណៈអធិបតី អ្នកកាសែត ភ្ញៀវជាតិ និង អន្ដរជាតិ ដែលចូលរួមកម្មវិធីកម្មវិធី វេទិកាថ្នាក់និពន្ធនាយកសារព័ត៌មានស្ដីពី "រួមគ្នាជំរុញការពាក់មួកសុវត្ថិភាពនៅកម្ពុជា"៖