អនុក្រឹត្យថ្មី តម្លៃផាកពិន័យចរាចរណ៍កើនឡើងគុណនឹង ៥ តែស្ថិតនៅក្នុងដំណាក់កាលណែនាំ

2015-07-15 23:06:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីរឹតបន្តឹងសុវត្ថិភាពចរាចរណ៍ និង ការគោរពច្បាប់ចរាចរណ៍ឲ្យមានប្រសិទ្ធភាព អនុក្រឹត្យថ្មីនឹងបង្កើនតម្លៃផាកពិន័យខ្ពស់ជាងមុនដល់ ៥ ដង ប៉ុន្ដែ អនុក្រឹត្យថ្មីនេះ ស្ថិតនៅក្នុងដំណាក់កាលណែនាំនៅឡើយ រហូតដល់ថ្ងៃទី ១ ខែ មករា ឆ្នាំ ២០១៦ ទើបចាប់ផ្ដើមអនុវត្ត។

អនុក្រឹត្យថ្មីស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោកថ្មីនឹងផាកពិន័យអ្នកល្មើសច្បាប់ចន្លោះពី ១ម៉ឺន ៥ ពាន់ រៀល ដល់ ១២ ម៉ឺន រៀល។

ឯកឧត្ដម ឧត្ដមសេនីយ៍ឯកបណ្ឌិត រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ

យោងតាមប្រសាសន៍ ឯកឧត្ដម ឧត្ដមសេនីយ៍ឯកបណ្ឌិត រុន រ័ត្នវាសនា ប្រធាននាយកដ្ឋាននគរបាលចរាចរណ៍ និង សណ្ដាប់ធ្នាប់សាធារណៈ បានឲ្យដឹងថា ការបង្កើនតម្លៃផាកពិន័យដ៏ខ្ពស់បែបនេះ គឺដើម្បីជំរុញឲ្យគោរពច្បាប់សំដៅការកាត់បន្ថយគ្រោះថ្នាក់ចរាចរណ៍កាន់តែប្រសើរ។ លោកបានបញ្ជាក់ដូច្នេះ៖ «កន្លងមកយើងឃើញថា តម្លៃផាកពិន័យចរាចរណ៍គឺ មានតម្លៃទាបដែលធ្វើឲ្យអ្នកមានលុយគិតថា មិនបាច់គោរពក៏បានដែរ ព្រោះបើផាកក៏មិនអស់ច្រើនដែរ។ ដូច្នេះ ប្រជាពលរដ្ឋគោរពច្បាប់ចរាចរណ៍ក្នុងកម្រិតធូររលុង»។

ឯកឧត្តមបន្ថែមថា បើការផាកពិន័យកើនច្រើនដូច្នេះគឺអាចកាត់បន្ថយការមិនគោរពច្បាប់ចរាចរណ៍បានប្រសើរជាងមុន។

ឯកឧត្ដមឧត្ដមសេនីយ៍ឯកលើកឡើងដូច្នេះ៖ «ពីមុនតម្លៃផាកពិន័យចន្លោះពី ៣ពាន់ ដល់១ ម៉ឺន ៥ ពាន់រៀលទេ។ ចំពោះអនុក្រឹត្យថ្មី ដែលត្រៀមនឹងអនុវត្តនៅដើមឆ្នាំក្រោយនេះ នឹងផាកពិន័យតិចបំផុតក៏ត្រឹម ១ ម៉ឺន ៥ ពាន់ រៀលដែរ ហើយបើគាត់ខុសច្រើន គឺត្រូវបូកបញ្ចូលគ្នារហូតដល់តម្លៃខ្ពស់បំផុត ១២ ម៉ឺនរៀលក៏មាន។ អីចឹង ចង់មិនចង់ក៏គាត់ត្រូវគោរពឲ្យបានខ្ជាប់ខ្ជួនជាងមុនដែរ ព្រោះពួកគាត់ខ្លាចខាតបង់ប្រាក់កាសច្រើន»។

ថ្នាក់ដឹកនាំចរាចរណ៍ផ្លូវគោកខាងលើបានឲ្យដឹងដែរថា បើទោះជាតម្លៃការផាកពិន័យថ្មីកើនខ្ពស់ជាងមុនច្រើនក្ដី តែបើប្រៀបធៀបនឹងប្រទេសជិតខាងគឺ នៅទាបជាងគេនៅឡើយ។

ច្បាប់ការផាកពិន័យថ្មីនេះមិនទាន់ត្រូវយកមកអនុវត្តភ្លាមៗទេគឺ ត្រូវរង់ចាំដល់ថ្ងៃទី ១ ខែ មករា ឆ្នាំ ២០១៦ ទើបចាប់ផ្ដើមអនុវត្ត ហើយរយៈពេលពីពេលនេះដល់ដំណាច់ឆ្នាំ គឺជាពេលផ្សព្វផ្សាយឲ្យប្រជាពលរដ្ឋបានជ្រួតជ្រាបតាំងពីថ្នាក់រាជធានី ដល់មូលដ្ឋាន។ ការផាកពិន័យចន្លោះពេលនេះដល់ចុងឆ្នាំ ២០១៥ គឺយកតាមតម្លៃការផាកពិន័យអនុក្រឹត្យការពិន័យអន្តរការណ៍ចាស់៕

អាន៖ ៣ សន្លឹកបង្ហាញពីសុជីវធម៌តាមដងផ្លូវគួរយកជាគំរូ

អត្ថបទ៖ ប្រាក់ ចាន់សីហា