Ronaldo ត្រូវប្រជាជនអូស្ត្រាលីសរសើរថារួសរាយរាក់ទាក់

2015-07-18 14:30:15
ចំនួនមតិ 0 | ចំនួនចែករំលែក 0

ចន្លោះមិនឃើញ

Cristiano Ronaldo បានទៅដល់ប្រទេសអូស្ត្រាលីប៉ុន្មានថ្ងៃមកហើយ ដើម្បីត្រៀមខ្លួនប្រកួតពានរង្វាន់ International Champions Cup។ វត្តមានរបស់កីឡាករ Real Madrid រូបនេះត្រូវបានប្រជាជនអូស្ត្រាលីដែលបានឃើញ សរសើរថាជាមនុស្សរួសរាយ និងរាក់ទាក់គួរឱ្យរាប់អានខ្លាំងណាស់។

ម្ចាស់ហាងលក់អីវ៉ាន់ថតជាមួយ Ronaldo

កាលពីម្សិលមិញនេះ Ronaldo បានចូលទៅទិញអីវ៉ាន់ក្នុងហាងតូចមួយក្បែរកន្លែងហ្វឹកហាត់ត្រៀមប្រកួតនៅល្ងាចនេះ។ ភ្លាមនោះម្ចាស់ហាងភ្ញាក់ខ្លួនខ្ញាកដោយសារតែឃើញកីឡាករល្បីឈ្មោះមានលុយរាប់លានដុល្លារ ចូលទៅទិញអីវ៉ាន់ក្នុងហាងរបស់លោក។ ដោយអផងភ័យផង លោក Beckett ដែលជាម្ចាស់ហាងបានដើរទៅនិយាយជាមួយ ហើយក៏បានសន្ទនាគ្នាយ៉ាងសប្បាយរីករាយពីរឿងបាល់ទាត់ផងដែរ។ ក្រោយពីនោះមក ម្ចាស់ហាងខាងលើបានប្រាប់ទៅកាសែត Fairfax ថាកីឡាករវ័យ៣០ឆ្នាំរូបនេះពិតជារួសរាយខ្លាំងណាស់ ហើយក៏មិនប្រកាន់ខ្លួនដែរ។

ស្រីស្រស់ម្ចាស់គណនី Instagram ឈ្មោះ janetprasetio

ងាកទៅខាងស្រីស្រស់ម្នាក់ទៀតដែលមានគណនី Instagram ឈ្មោះ janetprasetio ដែលបានជួបផ្ទាល់ជាមួយអតីតកីឡាករ Manchester United ខាងលើ បានបញ្ជាក់ឱ្យដឹងដែរថាបុរសកូនមួយរូបនេះត្បិតតែមានរឿងអាស្រូវជាមួយស្រីច្រើនមែន ប៉ុន្តែជាក់ស្ដែងរូបគេពិតជាគួរសមខ្លាំងណាស់។ នារីមុខស្រស់រូបនោះបានបន្តទៀតថា រូបនាងនឹងទៅគាំទ្រ Real Madrid នៅថ្ងៃល្ងាចនេះ ហើយជូនពរ Ronaldo ឱ្យមានសំណាងល្អ។

ប្អូនស្រីរបស់ម្ចាស់គណនី Instagram ឈ្មោះ tahliaoverboard

ដូចទៅនឹងស្រីស្រស់ខាងលើដែរ នារីម្នាក់ទៀតដែលមានគណនី Instagram ឈ្មោះ tahliaoverboard បាននិយាយដែរថាប្អូនស្រីរបស់នាងបានទៅជួបផ្ទាល់ជាមួយកីឡាករសញ្ជាតិព័រទុយហ្គាល់រូបនេះអំឡុងពេលក្រុម Real Madrid ធ្វើកម្មវិធីចុះហត្ថលេខាឱ្យអ្នកគាំទ្រ។ ហើយចាប់តាំងពីបានជួបកីឡាកររូបនេះមក ប្អូនស្រីរបស់នាងតែងតែនិយាយពី Ronaldo មិនដាច់ពីមាត់នោះទេ។

ម្ចាស់ហាងកាត់សក់ឈ្មោះថា Angela Sassano

ចំពោះកន្លែងកាត់សក់វិញ Ronaldo បានចូលទៅកាត់សក់ក្នុងហាងមួយឈ្មោះថា Kings Domain ។ ម្ចាស់ហាងនោះឈ្មោះថា Angela Sassano បាននិយាយថារូបនាងសឹងតែមិនជឿនឹងភ្នែកនៅពេលដែលឃើញកំពូលកីឡាករម្នាក់បានចូលមកហាងតួចតាចរបស់នាង។ នារីរូបនោះបានបន្តទៀតថា កីឡាករម្ចាស់ពាន Ballon d'Or ៣សម័យរូបនេះពិតជាមនុស្សធម្មតាខ្លាំងណាស់ រូបគេសួរនាំនាងដូចភ្ញៀវដទៃទៀតដែរហើយថែមទាំងនិយាយច្រើនទៀត។ ចំពោះការកាត់សក់នោះ Ronaldo ឱ្យ Sassano ១០០ដុល្លារ។

នៅពេលយប់វិញ មានគេរៀបចំបន្ទប់ VIP មួយឱ្យ Ronaldo ក្នុងក្លិបកម្សាន្តល្បីឈ្មោះមួយនៅក្នុងក្រុង ប៉ុន្តែបែរជាត្រូវកីឡាកររូបនេះបដិសេធទៅវិញ ហើយក៏ទៅចូលលេងបៀ poker នៅកន្លែងសាមញ្ញមួយ។

ទង្វើប៉ុន្មានខាងលើនេះហើយ ដែលត្រូវបានកាសែតនៅអូស្ត្រាលីចុះផ្សាយថាប្រជាជននៅក្នុងប្រទេសនេះសប្បាយរីករាយចំពោះវត្តមានរបស់ Cristiano Ronaldo និងក្លិប Real Madrid ណាស់។ ចំពោះការប្រកួតពានរង្វាន់ International Champions Cup វិញប្រកួតដំបូងរបស់ Real Madrid នឹងត្រូវប៉ះ Roma នៅល្ងាចម៉ោង៤រសៀលនេះ ៕

ចុចអាន៖ ក្មេងតូចម្នាក់ហូរទឹកភ្នែក ពេលជួប Ronaldo នៅអូស្ត្រាលី

ប្រែសម្រួល៖ មុន្នី រម្យ ប្រភព៖ theage , foxsports