គ្រួសារ អេ ភូថង និយាយស្ទើរមិនចេញ ក្រៅពីអរគុណម្ចាស់ជំនួយម៉ូតូមួយគ្រឿងនិងអង្ករ

2015-07-21 16:39:38
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រី សំាង សុម៉ាលី និងស្វាមី អេ ភូថង មានអារម្មណ៍រំភើបរីករាយរកអ្វីប្រៀបផ្ទឹមពុំបានដែលមានសប្បុរជនបានផ្ដល់ម៉ូតូមួយគ្រឿងសម្រាប់ធ្វើដំណើរ និងអង្ករសម្រាប់ផ្គត់ផ្គង់ក្លិបកីឡាប្រដាល់ អេ ភូថង កាលពីម្សិលមិញ។

អ្នកស្រី សាំង សុម៉ាលី និង លោក អេ ភូថង ជិះម៉ូតូចាស់របស់លោក

អ្នកស្រី សាំង សុម៉ាលី ប្រពន្ធរបស់លោក អេ ភូថង បានឲ្យដឹងថា គ្រួសាររបស់អ្នកស្រីសូមអរគុណយ៉ាងជ្រាលជ្រៅបំផុតចំពោះលោក ប៉ែន កាក់ ដែលបានជួយឧបត្ថម្ភម៉ូតូមួយគ្រឿងកាលពីម្សិលមិញនៅផ្ទះរបស់លោក ប៉ែន កាក់ និងអ្នកស្រី នី វណ្ណ បានផ្ដល់អង្ករមួយបាវទម្ងន់៥០គីឡូក្រាម។ អ្នកស្រី នីវណ្ណ បានទាក់ទងតាមរយៈទូរសព្ទមកលោក អេ ភូថង កាលពី២ថ្ងៃមុនឲ្យទៅយកអង្ករនៅផ្ទះរបស់អ្នកស្រីផ្ទាល់។ អ្នកស្រី និងក្រុមគ្រួសាររំភើបចិត្តឥតឧបមារកអ្វីប្រៀបផ្ទឹមពុំបានឡើយ។

អ្នកស្រីបន្តថា លោក ប៉ែន កាក់ បានទាក់ទងមកលោក អេ ភូថង កាលពី៣ថ្ងៃមុនម្ដងហើយ ប៉ុន្តែដោយសារពួកគាត់ជាប់រវល់ក៏មិនបានទៅយកម៉ូតូភ្លាមៗ។ កាលពីម្សិលមិញលោក ប៉ែន កាក់ បានទាក់ទងមកលោកម្ដងទៀតហើយ ពួកគាត់ក៏បានទៅយកម៉ូតូនៅផ្ទះរបស់លោកប៉ែន កាក់ប្រហែលម៉ោង៥ល្ងាច។

អ្នកស្រី សាំង សុម៉ាលី បាននិយាយថា ៖«ខ្ញុំមិនដឹងនិយាយថាម៉េចទេ បើខ្ញុំមិនចេះនិយាយផង មានតែម្រាមដៃដប់ លើកដៃសំពះអរគុណដល់អ្នកជួយតែប៉ុណ្ណោះ។ ខ្ញុំសឹងតែស្រក់ទឹកភ្នែករកអ្វីនិយាយមិនរួច ក្រោយមានគេនៅចាំឈ្មោះប្ដីរបស់ខ្ញុំ ហើយមានអ្នកជួយផ្ដល់ម៉ូតូ និងមានទាំងអ្នកជួយផ្ដល់អង្ករទៀត។ តាំងពីជួបមុខអ្នកជួយរហូតដល់ពេលចេញមកផ្ទះវិញ ខ្ញុំមិនដឹងនិយាយអីដឹងត្រឹមថា អរគុណ អរគុណ ជាប់រហូត ព្រោះរកពាក្យនិយាយមិនបាន»។

លោក ប៉ែន កាក់ បាននិយាយថា ៖«នេះជាអំពើល្អដែលខ្ញុំបាទតែងតែធ្វើជាប្រចាំ ម៉ូតូនេះជាលើកទី១៦ ហើយដែលខ្ញុំបាទ (ប៉ែនកាក់) តែងតែជួយ និងបរិច្ចាគសម្រាប់អ្នកតស៊ូបម្រើជាតិ ហើយមានការខ្វះខាត ជាពិសេសដូចលោក អេ ភូថង។ ថ្ងៃនេះគាត់លែងពិបាកទៅបង្ហាត់សិស្ស និងទៅបំពេញភារកិច្ចជាអាជ្ញាកណ្ដាលតាមប៉ុស្តិ៍ទូរទស្សន៍នានា ដើម្បីបានកម្រៃចិញ្ចឹមគ្រួសារ និងបន្តអាជីពជាគ្រូបង្វឹកតទៅទៀត។ ថ្វីត្បិតវាមិនច្រើន ឲ្យតែជួយអ្នកខ្វះខាតបាន ខ្ញុំមិនកន្តើយនឹងជួយអ្នកខ្វះខាត និងជាតិឡើយ»៕